جان دۆست بۆ KDP.info: دڤێت ئەم هەرێما کوردستانێ وەکا چاڤێ خۆ بپارێزین
بەرلین-KDP.info- جان دۆست، چاڤدێرێ سیاسی و نڤیسەرێ دیارێ کورد، د کورتە هەڤپەیڤینەکا ماڵپەڕی فەرمیێ پارتی دیموکراتی کوردستان دا دبێژیت، ھەرێما کوردستانێ پارچەکا ئازادە ژ وەلاتێ مە، دڤێت ئەم ب چاڤێن خوە بپارێزن.
جان دۆستی، چەند مژارەک ل دۆر دوماهی پێشهات و بوویەرێن ل کوردستان و ناڤچەیێ و ل سەر ئاستێ کوردان دروست دبن، ل گەل ماڵپەڕی فەرمیێ پارتی دیموکراتی کوردستان، نەرین و بۆچۆنێن خۆ دیارکرن.
KDP.info: ھەرێما کوردستانێ ھەرێمەک دەستورییە پێدڤیە چاوا کورد ڤێ ھەرێمێ بپارێزن؟
جاندۆست: ھەرێما کوردستانێ، ژبۆ ھەموو کوردان ل ھەر دەڤەرا دونیایێ دەستکەفتەکا دیرۆکییا مەزنە. ژبۆ ھەر کوردەکی ئەڤ ھەرێما ئازاد دیوارەکە، ئەو ستوونا کوردەواریێیە. نابیت کو کەسەک یان ھێزەک ئارامییا وێ لێک تێکبدەت. دڤێت ژ ئالییێ ھەر کوردەکی ڤە بهێتە پاراستن.
KDP.info: سەرۆک بارزانی براکووژی حەرام کریە بەلێ هندەک ئالی ب دەرفەت د بینن و ئێرشی ھەرێما کوردستانێ دکەن، تو بۆ ڤێ چەندێ چ دبێژی؟
جاندۆست: بێ گومانن ئەڤا پەکەکە دکەت خراپە، مخابن ژ دەستپێکا سالێن ھەشتێیان دا پەکەکە ل ھندەک دەڤەرێن ھەرێمێ ب جھ بوو. دۆز ئەو بوو کو خەباتا خۆیا چەکداری ل وێرێ دەست پێ بکەت و ل دژی دەولەتا ترکیا شەڕی بکەت. بەلێ سەد جاری مخابن کو ھەبوونا پەکەکێ ل ھەرێما کوردستانێ، ب تایبەتی پشتی ساڵێن نۆتان ئێدی نە بۆ خێرا کوردانە. دڤێت جەماوەرێن پەکەکێ ب خوە ژ ڤێ یەکێ ھشیار بن و بزانن کو تەڤگەرا پەکەکێ ل ھەرێما کوردستانێ هەموو ژی د خزمەتا دژمنێ کوردان دایە.
KDP.info: رۆڵێ نڤیسکار و سیاسەتمەداران د یەکڕێزییی و پاراستنا کوردان چاوا د نرخینی؟
جاندۆست: نڤیسکار و رەوشەنبیر دەنگێ گەلێ خوە نە. گەلەک جاران گاڤا کو ئەز شاشیێن ھێزێن سیاسی، وەک پەکەکە و پەیەدە دئینم زمان، دبێژنە من خوە دووری سیاسەتێ بکە. ئەڤا ئەز دکم نە نێزیکبوونا سیاسەتێیە، ئەو ئەرکێ رەوشەنبیرییێیە و ئەز پێ رادبم. دڤێت ئەز بانگ بکەم، ب دەنگێ بلند بۆ شاشییێن مەزن ببێژم (نـــا).
KDP.info: پێدڤیە کوردێن پارچێن دی چاوا پشتەڤانیێ ل ھەرێما کوردستانێ بکن؟
جاندۆست: ھەرێما کوردستانێ پارچەیەکا ئازادە ژ وەلاتێ مە، دڤێت ئەم ب چاڤێن خوە بپارێزن، مینا کو کلێ چاڤێن مە بیت، رۆناهیا چاڤێن مە بیت. بۆ کوردان ھەموویان هەرێم دیوار و ستارگەهەکە پاراستنێیە.
هەڤپەیڤیین: کاروان باعەدری
