شینوارەکێ ل سەر دەمێ زەردەشتیان ل دهۆکێ هاتە دیتن

دهۆک-KDP.info- رێڤەبەرێ شینواران ل پارێزگەها دهۆکێ ئاشکرا کر کو ژ ئەنجامێ پرۆژێ رووپیڤی یێ جهێن شینواری ل کنارێن خابوور (EHAS) یێ زانکۆیا توبینگن دگەل رێڤەبەریا شینوارێن پارێزگەها دهۆکێ ئەنجامدای شینوارەکێ ل سەر دەمێ زەردەشتیان کو دیرۆکا وی بۆ هزار سالان بەری زایینی د زڤریت ل قەزا (سێمێلێ) یا سەر ب پارێزگەها دهۆکێ ڤە هاتە دیتن.

د. حەسەن ئەحمەد قاسم، رێڤەبەرێ شینواران ل پارێزگەها دهۆکێ ئەڤرۆ رۆژا 21/12/2020 د پرێس کۆنفرانسەکی دا ئاشکرا کر کو زانایێن شینواری یێن کورد و ئەلمان ئەڤ پارچا شینواری ل قەزا سێمێلێ یا سەر ب پارێزگەها دهۆکێ ڤە دیتیە، ئەڤ شینوارە بەرەکە دهێتە هژمارتن ژ دەگمەنترین شینوارێن دەڤەرێ کو وێنێ پاشا یان رەبەنەکێ زەردەشتی ل سەر هاتیە نەخشاندن و دەربڕینێ ژ رەوشەنبیری و هزر و شارستانیەتا دەڤەرێ دکەن د وی سەردەمی دا و گۆت: "دیتنا ڤی شینواری باشترین بەڵگەیە ل سەر سەرکەفتنا کارێ هەڤپشک ل هەرێما کوردستانێ د بوارێ لێگەڕیانا شینوار و پاشمایێن مرۆڤێن کەڤن و ئەڤ بەڵگە هاندەرەکە بۆ ئەنجامدانا پتر ڤەکۆلین و لێگەڕیانا ژ پێخەمەت ب دەستڤەئینانا پتر پێزانینان ل سەر شینوارێن زەردەشتی".

ناڤهاتی ئاماژە دا وێ چەندێ کو ل هاڤینا سالا2016 ئەڤ نەخشە بەرە ژ لایێ تیمێ پیڤەریێ ڤە هاتبوو دیتن و ب هاریکاریا دەزگەهێن ئێمناهیێ بۆ مۆزەخانا دهۆک یا نیشتیمانی هاتبوو ڤەگوهاستن و ل وێرێ ڤەکۆلینێن دەستپێکی ل سەر هاتبوونە ئەنجامدان.

رێوار محەمەد رەشید