''د کەشەکی ئارامدا ئێزدییان جەژنا خۆ ل کوردستانێ گێڕا''
دهۆک-KDP.info- پشتی سێ رۆژان ژ رۆژیبوون بۆ خودێ، ئێزدییان ب دەڤ گرتی، دلەکی پاک و خاوێن لاڤ بۆ خودێ دکرن، هەر ژ بەری رۆژهەلاتێ هەتا رۆژئاڤابوونێ ئێزدییان رۆژیێن ئێزی گرتن.
'' سپێدەهێیەکییە زووییە، ''پیر خەلات، ئٶڵدارەکی ئێزدییە، دەست وچاڤێن خوە، ب ئاڤا سازگار و پاکا لالشێ و ئێزدیخانێ جوانکرینە، پشتینیەک گرێداییە، و دوعا ''پشت گڕێدانێ دکەت، پاشان ژی دوعایا ''فەجرێ'' دکەت، بەریا رۆژ ژی بهەلێت و ئەلەندێن سپێدەهیان بگەهنە گەردوونی پیر خەلات، دوعایا ''سپێدی ژی دکەت.
پشتی ڤان هەموو لاڤ و دوعایان بۆ خودێ، پیر خەلات، ل گەل رێهـ و سپی و ماقولێن گوندی، سەرەدانا مەزار پیرۆزێن خۆێێن گوندی دکەن، ل وێرێ ژی خوارنەکا تایبەت دخۆن ب ناڤێ ''سمات''.
پیر خەلات، ب جلێن کوردی، سیمانەکی پڕی گڕنژین و دلەکی پاک، ل گەل زەلامێن گوندی مال ب مال دگەڕێن، جەژنا ئێکوودوو پێرۆز دکەن.
هەر کەس د گوندێ واندا، دلمان و نەخۆشییەک ل گەل ئێک هەبیت، پیرخەلات ل گەل گوندییان پێک دئینن، و ناهێلن هیچ نەخۆشییەک دناڤبەرا وان دا بمینت.
پیر خەلات، گرنگییا سەرەدانکرنا مال ب مال ژبلی کو عورفەکی جڤاکی بت، ئەو ب کارەکی ب پێکڤەژیانا ئاینی و ئیتنیکی بۆ هەموو ئۆل مەزهەبان دبینت، ئەو ب سەبەقەکە قەولێ''پادشا''یێ ئێزدییان ڤێ یەکێ شرۆڤە و ڕاڤە دکەت، و دبێژت، پادشایێ من ئێکی ئەمینە....ژبا وی دهێتن مزگینە ...بۆ هەموو موخلقا و چەندین دینا.
ب باورییا پیری، ئەڤ سەبەقە ئاینێ ئێزدییان پێکڤەژیانا ئاینی کوویرتر و موکمتر لێ دکەت، و دبێژیت؛ چونکی ئەم هەمی پێکڤە دژین، و دڤێت ئەم هزرا پێکڤەژیان و لیبۆرینێ بەرفرەهتر ژ ڕامانێن وێ لێ بکەین و کوویرتر هزر تێدابکەین، بەڵاڤکرنا شریناهیان دجەژنێ دا ڕامانا خۆشیێ یە دناڤ هەموو کەسان دا، پیر خەلات بۆ ماڵپەری فەرمیی یێ پارتی دیموکراتی کوردستان وەسا گۆت.
'' میتۆلۆژیییا ئێزدییان زێدەتر گرنگیی دایە، باوری و دوعا بۆ هەموو مرۆڤاییەتیێ، و دڤێت هەموو ماڵەکا ئێزدیی، نان و خوارن تێکەلێ ئێک بکەن، ڕامان ژ هندێ کو باوری و مانەوە ل گەل ئێک هێشتا مایە، ئەو وسا دبێژیت.
پشتی هەڤت ساڵان ژ ئاوارەییێ؛ ئێزدییان جەژنا رۆژیێن ئێزدیی ب خوارنێن فولکلۆری و گێڕانا قەول و بەیت و قەسیدەیێن ئاینی گێڕا، هەڕچەندە ب بریارا میر و جڤاتا ڕۆحانیا ئێزدییان هیچ خڕڤەبوون و ئاهەنگ بڕێڤەنەچوون ژبەر بەژیکا کۆرۆنایێ.
کوردێن ئێزدی د دوماهیکا هەیڤا ١٢ـێ دا یا هەموو ساڵەکێ ''سێ شەم، و چارشەم و پێنچ شەم''ب رۆژی دبن و ئینێی ژی دکەنە جەژن.
نها ئێزدیین شنگال زێدەتری ٨٠%ـی ئاوارەیی پاڕیزگەها دهۆکێ نە، چاڤێ وان ل ڤەگەڕیانا ئەولەهی و تەناهیێیە ژبۆ ناڤچەیێن وان هەتا کو ڤەگەڕنە سەر مال و مولکێن خۆ.
هەڤدەم، هەتا نها زێدەتر ژ ٢٥٠٠ کەسێن ئێزدیی دناڤا دەستێ داعشێ دانە، و کەسووکارێن وان چاڤێن وان ل ڤەگەڕیانا وانە، سەرۆکێ هەڕێما کوردستانێ نیچیرڤان بارزانی ژی دڤێ جەژنێ دا پەیاماک بەڵاڤکر، و تێدا دیارکر، جاره‌كه دى ژى هه‌مى ئێزدییان پشتڕاست دكه‌م كو هندى خوشك و برایه‌كێ مه یێ ئێزدى وندا، ڕه‌ڤاندى و بێسه‌روشوون مابیت، ئه‌م دێ لسه‌ر هه‌‌ولێن خۆ یێن ڕزگاركرن و ڤه‌گه‌ڕاندن و ئه‌شكه‌ره‌كرنا چاره‌نڤیسێ وان به‌رده‌وام بین، هه‌روه‌ها ژى دێ هه‌موو هه‌ولا ده‌ین و به‌رده‌وام دێ كار كه‌ین داكو كولتوورێ پێكڤه‌ژیانێ و هه‌ڤقه‌بوولكرنا پێكهاتێن ئۆلى و نه‌ته‌ویى ل كوردستانێ دپاراستى بن و بێنه فره‌هكرن و كوردستان هه‌ر بمینیت وڵاتێ هه‌موو پێكهاته‌یان.
کــاروان بــاعەدری
