نێچیرڤان بارزانى جه‌ژنا ڕۆژى یێن ئێزى پیرۆز دكه‌ت
هەولێر-KDP.info- جه‌ژنا ڕۆژى یێن ئێزى، ل ڕێزداران میرێ ئێزدییان و بابێ شێخ و جڤاتا ڕووحانى و هه‌موو خوشك و برایێن ئێزدى ل كوردستانێ و ل هه‌ر ده‌ره‌كه جیهانێ بن، بتایبه‌تى ژى ل مالبات و كه‌سوكارێن قوربانى یێن ئێزدى یێن ده‌ستێ تیرۆرێ، پیرۆز دكه‌م. هیڤیدارم ئه‌ڤ جه‌ژن و جه‌ژ‌نێن بهێن، ئارامیێ دگه‌ل خۆ بینن و دویماهیا هه‌موو نه‌خۆشیان بن، ژیان و ئاڤه‌دانى ڤه‌گه‌ڕنه وار و جهێن ئێزدییان و هه‌موو ده‌رێن ژبه‌ر شه‌ڕێ تیرۆرێ زیان دیتى و ئاواره‌یێن كه‌مپان ڤه‌گه‌ڕنه سه‌ر مال و گوند و باژاڕێن خۆ یێن ته‌نا و ئاڤه‌دانكرى.
جاره‌كه دى ژى هه‌مى ئێزدییان پشتڕاست دكه‌م كو هندى خوشك و برایه‌كێ مه یێ ئێزدى وندا، ڕه‌ڤاندى و بێسه‌روشوون مابیت، ئه‌م دێ لسه‌ر هه‌‌ولێن خۆ یێن ڕزگاركرن و ڤه‌گه‌ڕاندن و ئه‌شكه‌ره‌كرنا چاره‌نڤیسێ وان به‌رده‌وام بین، هه‌روه‌ها ژى دێ هه‌موو هه‌ولا ده‌ین و به‌رده‌وام دێ كار كه‌ین داكو كولتوورێ پێكڤه‌ژیانێ و هه‌ڤقه‌بوولكرنا پێكهاتێن ئۆلى و نه‌ته‌ویى ل كوردستانێ دپاراستى بن و بێنه فره‌هكرن و كوردستان هه‌ر بمینیت وڵاتێ هه‌موو پێكهاته‌یان.
جه‌ژن پیرۆز بیت و هه‌ر سال ب خێر و خۆشى.
نێچیرڤان بارزانى
سه‌رۆكێ هه‌رێما كوردستانێ
2020/12/17
