سوبەھی رۆژا ئالایێ کوردستانێ دێ ل ھەرێمێ ھێتە ساخکرن
دھۆک-KDP.info-بەرپرسێ گشتیێ دەزگەھێ پاراستنا ئالایێ کوردستانێ ئاشکرا کر کو رۆژا ئالایێ کوردستانێ سوبەھی رۆژا ١٧/١٢/٢٠٢٠ دێ ب ئەنجامدانا چەندین چالاکیێن جوراوجور ل سەرانسەری ھەرێما کوردستانێ ھێتە ساخکرن.
پەلەوان شێخ مەمی، بەرپرسێ گشتیێ دەزگەھێ پاراستنا ئالایێ کوردستانێ بۆ مالپەرێ فەرمیێ پارتی دیموکراتی کوردستان دیار کر کو سوبەھی دوور ژ بەرژەوەندیێن حزبایەتی و ب پشکداریا لایەنێن سیاسی دێ رۆژا ئالایێ کوردستانێ ل سەرانسەری ھەرێما کوردستانێ ھێتە ساخکرن و ل دەمژمێر ١٠:٥٥ سپێدێ دێ ئالایێ کوردستانێ ل ھەمی پارێزگەھێن ھەرێما کوردستانێ ژ لایێ نڤیسینگەھێن ب سەر دەزگەھێ وان ڤە ھێتە بلندکرن و گۆت: "ژ بەر کارەساتا حەلەبجە کو تێدا پێنج ھزار کەسێن بێ گۆنەە ب چەکێ کێمایی شەھیدببوون مە ئەڤ دەمە بۆ بلندکرنا ئالایی ھەلبژارت".
ناڤھاتی ئاماژە دا وێ چەندێ کو ھەر د چارچۆڤێ ساخکرنا ڤێ رۆژێ دا دێ چەندین پەیڤ ھێنە خواندن، ھەروەسا دێ ئالایێن کوردستانێ ل سەر کرێکاران ھێنە بەلاڤکرن، ژ بەر کو کرێکار ب داھاتەکێ کێم یێ خزمەتەکا مەزن پێشکێشی ھەرێما کوردستانێ دکەن.
ل دووماھیێ پەلەوانی خویا کر کو بۆ جارا ئێکێ ل سالا ٢٠٠٧ دەزگەھێ پاراستنا ئالایێ کوردستانێ رۆژا ١٧/١٢ کو ژ لایێ پەرلەمانێ کوردستانێ ڤە وەکو رۆژا ئالایێ کوردستانێ ھاتیە دەسنیشانکرن ساخکربوو، نوکە دەزگەھێ ناڤھاتی ٣٠ نڤیسینگەھێن فەرمی و نەفەرمی ل سەرانسەری ھەرێما کوردستانێ و باکوور و رۆژئاڤایێ کوردستانێ ھەنە.
رێوار محەمەد رەشید
