ب کۆژمێ ٣٣ ملیۆن دۆلاران پرۆژەکێ ئاڤێ ل دھۆکێ ھاتە ڤەکرن
دھۆک-KDP.info- پرۆژێ ئاڤا ناحیا فەیدیێ یا سەر ب قەزا سێمێلێ ڤە ل پارێزگەھا دھۆکێ ئەڤرۆ رۆژا ١٠/١٢/٢٠٢٠ ب ئامادەبوونا (د. ساسان عەونی) وەزیرێ شارەوانی و گەشت و گۆزار یێ حکومەتا ھەرێما کوردستانێ قۆنسلێن وەلاتێن ئەلمانیا و فەرەنسا و سەرۆکێ رێکخراوا GIZ ل عیراقێ و (د. عەلی تەتەر) پارێزگارێ دھۆکێ ب کۆژمێ ٣٣ ملیۆن دۆلاران ھاتە ڤەکرن.
د. عەلی تەتەر، پارێزگارێ دھۆکێ د پەیڤەکێ دا ئاشکرا کر کو خوشحالین ئەم ئەڤرۆ ل ڤێرێ ئامادەبووین بۆ ڤەکرنا پرۆژەکێ ستراتیژی یێ ئاڤا فەیدیێ ژ لایێ ھەر دو وەلاتێن دوست ئەلمانیا و فەرەنسا ڤە ب کۆژمێ ٣٣ ملیۆن دۆلاران ھاتیە چێکرن و گۆت: "ئەڤ پرۆژە یێ ئاڤا ڤەخوارنێ یە و پتری ٢٠٠ ھزار کەسان ژ ئاوارە و پەنابەرێن ل سنوورێ پارێزگەھا دھۆکێ دێ ژێ مفادار بن".
پارێزگارێ دھۆکێ ئاماژە دا وێ چەندێ کو ئەڤ پرۆژە دێ بیتە بارسڤکیەک ل سەر تۆرێن دی یێن ئاڤێ یێن کو ل پارێزگەھا دھۆکێ ھەین و گۆت: "ئەڤ پرۆژە بتنێ ئاڤێ بۆ ٢٠٠ ھزار پەنابەر و ئاواران پێشکێش ناکەت، بەلکو ھەر د ناڤ وان دا ژی کۆمەلگەھێن گرنگ ھەنە کو خەلکەک ژ دەڤەرێن جودا جودا ھاتین د ناڤ دا دژین دێ مفایی ژ ڤی پرۆژەیی بینن".
ژ ئالیێ خوە ڤە د. ساسان عەونی، وەزیرێ شارەوانی و گەشت و گۆزار ل حکومەتا ھەرێما کوردستانێ د پەیڤەکێ دا ئاشکرا کر کو ئەڤ پرۆژێ ستراتیژیێ ئاڤێ ل ناحیا فەیدیێ یێ کو ژ لایێ ھەر دو وەلاتێن ئەلمانیا لاو فەرەنسا ڤە ھاتیە چێکرن ھەتا رادەیەکی دێ ئاریشا کێم ئاڤیێ ل دەڤەرێ چارەسەر کەت و سەرەرایی ڤێ چەندێ چەندین کەمپێن ئاواران و کومەلگەە ژی دێ ژ ڤی پرۆژەیی مفاداربن و گۆت: "ئەڤ پرۆژە یێ پێکھاتیە وێستگەھا ڤاڤارتنێ و تانکێ کۆمکرنا ئاڤێ و یەکەیا کلۆری و بۆریێن ڤەگوھاستنێ بۆ تانکێ سەرەکی یێ بەلاڤکرنا ئاڤێ و کێشانا ھێلا ئاڤێ بۆ جھێن پێدڤی ئەڤ پرۆژە ب کۆژمێ ٣٣ ھزار دۆلاران د دەمێ ھزار و ٣٤ رۆژان دا ھاتە بجھئینان و کەفتە کاری".
رێوار محەمەد رەشید
