بەرێ بنیاتی بۆ ھژمارەکا پرۆژێن خزمەتگۆزاری ل زاخۆ ھاتە دانان
دھۆک-KDP.info- د.عەلی تەتەر، پارێزگارێ دھۆکێ ئەڤرۆ رۆژا ٣/١٢/٢٠٢٠ ب ئامادەبوونا (بوتان محسن) قائیمقامێ قەزا زاخۆ و (دیار بەحری) رێڤەبەرێ گشتی یێ باژێرڤانیان ل پارێزگەھا دھۆکێ بەرێ بنیاتی بۆ ھژمارەکا پرۆژێن خزمەتگۆزاری ل قەزا زاخۆ دانا و ھەروەسا سەرەدانا پرۆژێ گەشتیاری یێ (زەمبیل فرۆش) ژی ل ناحیا باتیفا کر کو ژ لایێ کەرتێ تایبەت ڤە ھاتیە چێکرن.
د. عەلی تەتەر، پارێزگارێ دھۆکێ د پرێس کۆنفرانسەکی دا ئاشکرا کر کو پشتی سەرەدانا سەرۆکێ حکومەتا ھەرێما کوردستانێ بۆ قەزا زاخۆ رازەمەندی ل سەر بجھئینانا ھژمارەکا پرۆژێن باش یێن خزمەتگۆزاری ھاتەکرن کو ئەڤ پرۆژە دێ چارەسەریا چەندین ئاریشێن رۆژانە یێن وەلاتیان کەن و گۆت: "ھندەک ژوان پرۆژان ب شێوەیەکێ ڕاستەوخۆ ژلایێ حکومەتا ھەرێما کوردستانێ ڤە دگەل دامودەزگەھێن پەیوەندیدارێن حکومی ڤە ل سەرانسەری قەزا زاخۆ ھاتینە بجھئینان کو نوکە کار د چێکرنا ھندەک ژوان پرۆژان دا ب دووماھی ھاتیە و ھندەک ژی بەرەف دووماھیێ نە کو رەنگە ل حەفتیا بھێت ئەو ژی تەمام ببن و بکەڤنە د خزمەتا وەلاتیان دا، ھندەک پرۆژێن دی ژی نوکە ل قەزا زاخۆ دھێنە جێبەجێکرن کۆژمێ بجھئینانا وان گەلەک بوو ژبەر ڤێ چەندێ وەکو تەندەر ھاتبوونە ڕاگەھاندن و نوکە کار دچێکرنا وان پرۆژان ژی دا یێ بەردەوامە".
پارێزگارێ دھۆکێ ئاماژە دا وێ چەندێ کو ئەڤرۆ ژی ب مەرەما دانانا بەرێ بنیاتی بۆ چەندین پرۆژێن خزمەتگۆزاری وی سەرەدانا قەزا زاخۆ کریە ژوان پرۆژان بەرێ بنیاتی بۆ پرۆژێ سەخبێریکرن و بەرفرەھکرنا رێیا سەرەکی یا (ئیبراھیم خەلیل-زاخۆ) ب کۆژمێ (٧،٨٤٠،٠٠٠،٠٠٠) دیناران ل سەر بودجەیا حکومەتا ھەرێما کوردستانێ ھاتە دانان، ھەروەسا بەرێ بنیاتی بۆ ھەر ئێک ژ پرۆژێن چێکرنا جادا (٣٠) مەتری دگەل سۆلینێن ئاڤرێژ ل تاخێ ئەردەوان ب کۆژمێ (٢،٩٢٩،٥٢٤،٠٠٠) و چێکرنا کەلفەرتێن سندوقی ل تاخێ ئەردەوان ب کۆژمێ (٥،٤٩٦،٥٦٩،٠٠٠) دیناران ھاتە دانان و گۆت: "ھەر د چارچۆڤێ ڤێ سەرەدانێ دا بۆ قەزا زاخۆ بەرێ بنیاتی بۆ پرۆژێ چێکرنا ئاڤێ یێ سەرەکی بۆ ناحیا باتیفا ب کۆژمێ (٥،٧٨٨،٩٨٣،٠٠٠) دیناران ھاتە دانان".
د. عەلی تەتەر پارێزگارێ دھۆکێ د ھەمان پرێس کۆنفرانس دا خویا کر کو ل سەر رازەمەندیا سەرۆکێ حکومەتا ھەرێما کوردستانێ چەندین پرۆژێن دی یێن خزمەتگۆزاری دێ کەڤنە د بوارێ جێبەجێکرنێ دا، راستە ئەو پرۆژە دبچووکن، بەلێ دێ خزمەتەکا مەزن پێشکێشی خەلکی کەن و کۆژمێ ئێک ملیار دیناران دێ لێ ھێنە مەزاختن کو حەفت ژوان پرۆژان دێ ل ناحیا باتیفا ھێنە چێکرن و یێن دی ژی دێ ل ناحیا دەرکارێ کەڤنە د بوارێ جێبەجێکرنێ دا.
رێوار محەمەد رەشید
