سەنتەرەک بۆ زارۆیێن خودان پێدڤیێن تایبەت ل دھۆکێ ھاتە ڤەکرن
دھۆک-KDP.info- پرۆژێ نووژەنکرنا پشکا چارەسەریا سرۆشتی ل سەنتەرێ زوودەما دەستنیشانکرنا پەککەفتنێ ل پارێزگەھا دھۆکێ ئەڤرۆ ١٧/١١/٢٠٢٠ ب ئامادەبوونا (ماجد سەید سالح) جێگرێ پارێزگارێ دھۆکێ ب وەکالەت و نوونەرێ رێکخراوا AISPO یا ئیتالی ھاتە ڤەکرن و د ھەمان دەم دا پرۆژێ دانانا سیستەمەکی بۆ دوڤچوونا توندوتیژیا دژی زارۆیێن پەککەفتی ھاتە راگەھاندن.
ماجد سەید سالح، جێگرێ پارێزگارێ دھۆکێ ب وەکالەت د پرێس کۆنفرانسەکی دا ئاشکرا کر کو د سالێن بۆری دا پشکا چارەسەریا سرۆشتی ل سەنتەرێ زوودەما دەستنیشانکرنا پەککەفتنێ ل پارێزگەھا دھۆکێ گەلەک خزمەتا زارۆیێن پارێزگەھا دھۆکێ و دەشتا نەینەوا کریە و ئەڤرۆ جھێ دلخوەشیێ یە پێنگاڤەکا دی ھاتە ھاڤێتن بۆ پتر پێشخستنا ڤی سەنتەری، رەنگە ئەڤ سەنتەرە ب رووبەری ڤە یێ بچووک بیت، بەلێ خزمەتەکا گەلەک مەزن دکەت و گۆت: "د ھەیڤێن بۆری دا نۆشدار و کارمەندێن ساخلەمیێ خزمەتەکا مەزن ئەنجامدایە ژ پێخەمەت پاراستنا گیانێ وەلاتیان ژ ڤایرۆسێ کۆرۆنایێ و دووبارە داخوازێ ژ ھەموو وەلاتیان دکەن پتر پێگیریێ ب مەرج و رێنمایێن ساخلەمیێ بکەن بۆ خوەپاراستن ژ ڤایرۆسێ کۆرۆنایێ".
ژ ئالیێ خوە ڤە د. نزار عسمەت، رێڤەبەرێ گشتی یێ ساخلەمیێ ل پارێزگەھا دھۆکێ د ھەمان پرێس کۆنفرانس دا خویا کر کو بەشی چارەسەریا فیزیایی ل سەنتەرێ نەخۆشێن پەککەفتیان ل دھۆکێ ژ لایێ رێکخراوا AISPO یا ئیتالی ڤە ب کوژمێ ٢٠٠ ھزار یۆرۆیان ھاتیە دروستکرن و نووژەنکرن و ھەموو کەرەستێن پێدڤی د ناڤ ڤی سەنتەری دا بۆ خزمەتکرنا زارۆکان ھاتینە دابینکرن و گۆت: "رێکخراوا AISPO یا ئیتالی رابوویە ب دابینکرنا بەشێ چارەسەریا فیزیایی ب راھێنانێن نێڤدەولەتی و ھاریکاریا ھونەری و ھاریکاریا تەکنیکی یا پێشکەفتی بۆ زارۆیێن خودان پێدڤیێن تایبەت یێن ھەمە جۆر و یاری و کەلوپەلێن ناڤخۆیی، ھەروەسا ژی کاری نووژەنکرنێ ژی ئەنجامدایە بۆ باشترکرنا خزمەتێن دەستنیشانکری و چارەسەکرنێ کو ئەڤ کارە ب ھەماھەنگی دگەل نەخۆشخانا ھیڤی یا زارۆیان ل پارێزگەھا دھۆکێ دھێتە ئەنجامدان" .
رێوار محەمەد رەشید
