ئاڤاکرنا 9 پرۆژێن بازرگانی ل دهۆکێ هاتە پەسەندکرن

دهۆک-KDP.info- رێڤەبەرێ گشتی یێ وەبەرهێنانێ ل پارێزگەها دهۆکێ ئاشکرا کر کو لیژنا ئاڤاهیێن بلند و تاواران ل پارێزگەها دهۆکێ ئەڤرۆ رۆژا 9/11/2020 کۆمبوونا خوە ب سەرپەرشتیا (د.عەلی تەتەر) پارێزگارێ دهۆکێ ئەنجام دا و د ڤێ کۆمبوونێ دا ئاڤاکرنا 9 پرۆژێن بازرگانی ل باژێرێ دهۆکێ هاتە پەسەندکرن.

کوردو ئیحسان، رێڤەبەرێ گشتی یێ وەبەرهێنانێ ل پارێزگەها دهۆکێ بۆ مالپەرێ فەرمیێ پارتی دیموکراتی کوردستان دیار کر کو د ڤێ کۆمبوونێ دا دانوستاندن ل دۆر مەرجێن نوو یێن ئاڤاکرنێ و داخوازیێن بازرگانان بۆ ئاڤاکرنا تاواران هاتەکرن و دووپاتی ل وێ چەندێ هاتەکرن کو دڤێت هه‌موو ئاڤاهیێن بلند وتاوه‌ر ل جهێن ڤه‌كرى و به‌رفرەهـ و ل دووڤ یاسا وستانده‌رێن جیهانى و شارستانى بهێنه‌ دورستكرن داکو روویەکێ جوان بدەنە باژێرێ دهۆکێ.

ناڤهاتی ئاماژە دا وێ چەندێ پشتی دانوستاندنەکا باش د ڤێ کۆمبوونێ دا هاتیەکرن لیژنا ئاڤاهیێن بلند و تاواران ل پارێزگەها دهۆکێ ئاڤاکرنا 9 پرۆژێن بازرگانی پەسەندکر کو ئەڤ پرۆژە هەموو دێ د ناڤ سەنتەرێ باژێرێ دهۆکێ دا هێنە ئاڤاکرن.

ل دووماهیێ رێڤەبەرێ گشتی یێ وەبەرهێنانێ ل پارێزگەها دهۆکێ خویا کر‌ کو ئەڤ پرۆژێن بازرگانی یێن دهێنە چێکرن مولکێ خەلکی نە، ئانکو حکومەتێ ئەرد بۆ ئاڤاکرنا پرۆژەیی نەدایە ڤان وەبەرهێنەران، بتنێ حکومەت چاڤدێریا وان دکەت کو ب شێوەیەکێ دروست و ل دووڤ رێنمایان بهێنە ئاڤاکرن و گۆت: "د پلانا مە دایە ل دەمێن بهێت پرۆژێن ب ڤی شێوەیی ل هەمی قەزایێن سەر ب پارێزگەها دهۆکێ ڤە ژی بهێنە ئاڤاکرن".

رێوار محەمەد رەشید