ئەنجومەنێ پارێزگەھا دھۆکێ دانوستاندن ل دۆر بابەتێ سیستەمێ نوو یێ ئەنجومەنێ باژێرڤانیان کر
دھۆک-KDP.info- ئەنجومەنێ پارێزگەھا دھۆکێ ئەڤرۆ ٤/١١/٢٠٢٠ کۆمبوونا خوە یا ژمارە (١٠٧) ل دۆر پەسەندکرنا سکرتێرەکێ نوو بۆ ئەنجومەنێ ناڤھاتی و بەرفرەھکرنا چەندین گوندان ل سنوورێ پارێزگەھا دھۆکێ ئەنجامدا و د ھەمان کۆمبوون دا دانوستاندن ل دۆر بابەتێ سیستەمێ نوو یێ ئەنجومەنێ باژێرڤانیان ل ھەرێما کوردستانێ ھاتەکرن.
فەھیم عەبدوللا حەمو، سەرۆکێ ئەنجومەنێ پارێزگەھا دھۆکێ د پرێس کۆنفرانسەکی دا ئاشکرا کر کو بەری نوکە پۆستێ سکرتێرێ ئەنجومەنێ پارێزگەھا دھۆکێ د دەستێن یەکگرتوویا ئیسلامی دابوو، بەلێ پشتی د حکومەتا خوەجھی یا پارێزگەھا دھۆکێ دا نەماین، ئەڤرۆ ب تێکرایا دەنگێن ئەندامێن ئەنجومەنێ پارێزگەھا دھۆکێ یێن کو د کۆمبوونێ دا ئامادەبووین (رزگار سدقی شکر) ژ فراکسیۆنا پارتی دیموکراتی کوردستان ل جھێ (عەبدولسەمەد تێلی) وەکو سکرتێرێ نوو یێ جڤاتا پارێزگەھا دھۆکێ ھاتە پەسەندکرن.
ناڤھاتی ئاشکرا کر کو ھەر د کۆمبوونا ئەڤرۆ یا جڤاتا پارێزگەھا دھۆکێ دا بەرفرەھکرنا سنوورێن ھەر ئێک ژ گوندێن (چمبلکێ) و (گردەپانێ) و (ناڤشکێ) و (پێدە) ل سنوورێ پارێزگەھا دھۆکێ ب تێکرایا دەنگێن ئەندامێن ئەنجومەنێ پارێزگەھا دھۆکێ ھاتە پەسەندکرن پشتی ھەمی رێکارێن یاسایی ب دووماھی ھاتین، ھەروەسا ل دووماھیا ڤێ کۆمبوونێ ژی دانوستاندن ل دۆر بابەتێ سیستەمێ نوو یێ ئەنجومەنێ باژێرڤانیان ل ھەرێما کوردستانێ ھاتەکرن، بەلێ ئەڤ سیستەمە ب تێکرایا دەنگان ژ لایێ ئەنجومەنێ پارێزگەھا دھۆکێ ڤە نەھاتە پەسەندکرن، ژ بەر کو گەلەک خال د ڤی پەیرەوی دا ھەنە د بەرژەوەندیا خەلکێ پارێزگەھا دھۆکێ دا نینن و گۆت: "بۆ ڤێ مەرەمێ ژی لژنەک ل ئەنجومەنێ پارێزگەھا دھۆکێ ھاتە پێکئینان و ھەتا ب ھووری بەرسڤا ھەمی تێبینیێن مە ل دۆر ڤی سیستەمی نەھێتەدان ئەم پەسەند ناکەین".
رێوار محەمەد رەشید
