ئێکەتیا ئەوروپی تاقیگەھەک بۆ پشکنینێن کۆرۆنایێ ل دھۆکێ ڤەکر
دھۆک-KDP.info- ئەڤرۆ٢/١١/٢٠٢٠ ب ئامادەبوونا (د.عەلی تەتەر) پارێزگارێ دھۆکێ د ناڤ نەخۆشخانا لالاڤ دا ل پارێزگەھا دھۆکێ، تاقیگەھەکا تایبەت بۆ پشکنینێن کۆرۆنایێ ھاتە ڤەکرن.
د.عەلی تەتەر، پارێزگارێ دھۆکێ د پرێس کۆنفرانسەکی دا دیار کر کو پارێ ڤێ تاقیگەھێ ژلایێ ئێکەتیا ئەوروپی ڤە ب ھەڤکاری دگەل رێکخراوا (AISPO NGO) ھاتیە دابینکرن و گۆت: "نەخۆشخانا لالاڤ یا تایبەت ب نەخۆشێن کۆرۆنایێ ژلایێ کۆمپانیا لالاڤ ڤە ھاتیە چێکرن، بەلێ ئەو کەلوپەلێن دناڤ نەخۆشخانێ دا وەکو پێدڤیێن نۆشداری و ئامیرە و کارگەھا ئۆکسجینێ و نۆشدار و کارمەند و ھتد... ژلایێ حکومەتا ھەرێما کوردستانێ ڤە بۆ ڤێ نەخۆشخانێ ھاتینە دابینکرن".
ناڤھاتی ئاماژە دا وێ چەندێ کو ئەگەرێ سەرەکی یێ بەلاڤبوونا ڤایرۆسێ کۆرۆنایێ ل ھەرێما کوردستانێ ب گشتی و پارێزگەھا دھۆکێ ب تایبەتی خرڤەبوونێن نە پێدڤی نە ئەوێن کو ل کافێ و ھۆلێن شەھیانان و ھتد.... دھێنە ئەنجامدان، بەلێ ژبەر وان کاودانێن نوکە ھەرێما کوردستانێ تێدا دەرباز دبیت ئەو نەشێن پتر گڤاشتنێ ل سەر خەلکی بکەن ژ بەر کو ھندەک تشت یێن ھەین ژیانا رۆژانە یا خەلکی یا پێڤە گرێدایە و گۆت: "نوکە ئەم نەچارین دگەل کۆرۆنایێ بژین و پێگێریێ ب مەرج و رێنمایێن ساخلەمیێ بکەین و دەزگەھێن پەیوەندیدار نوکە ب تووندی یێ دوڤچوونا وان جھێن پارێزگەھا دھۆکێ دکەن یێن کو خرڤەبوون لێ دھێنە ئەنجامدان و ھەر کەس و جھەکێ پێگیریێ ب مەرج و رێنمایێن ساخلەمیێ نەکەت دێ ل دووڤ یاسایێ سەرەردەری دگەل ھێتەکرن".
ژ ئالیێ خوە ڤە د.نزار عسمەت رێڤەبەرێ گشتی یێ ساخلەمیێ ل پارێزگەھا دھۆکێ د ھەمان پرێس کۆنفرانس دا خویا کر کو دھەیاما بۆری دا ئێکەتیا ئەوروپی گەلەک پرۆژێن گرێدایی ب کەرتێ ساخلەمیێ ڤە ل سەرانسەری پارێزگەھا دھۆکێ ئەنجامداینە و گۆت: "پارێ تاقیگەھا تایبەت ب ڤایرۆسێ کۆرۆنایێ ڤە یا کو ئەڤرۆ ل نەخۆشخانا لالاڤ ھاتیە ڤەکرن ھەر ژ لایێ ئێکەتیا ناڤھاتی ڤە ب ھاریکاریا رێکخراوا (AISPO NGO) ھاتیە دابینکرن کو نێزیکی ٢٠٠ ھزار یۆرۆیان ل ڤێ تاقیگەھێ ھاتینە مەزاختن".
ناڤھاتی خویا کر کو رێژا توشبوونێ ب ڤایرۆسێ کۆرۆنایێ ل پارێزگەھا دھۆکێ رۆژ بۆ رۆژێ د زێدەبوونێ دایە و ب مخابنی ڤە رۆژانە مە حالەتێن مرنێ ژی ھەنە، بەلێ ئەم ب ھەمی شیانێن خوە ڤە یێ بزاڤان دکەین ژمارا تووشبوویان ب ڤایرۆسێ کۆرۆنایێ کێم بکەین.
رێوار محەمەد رەشید
