١٤ سەرۆک باژێرڤانی ل پارێزگەھا دھۆکێ ھاتنە گوھۆڕین
دھۆک-KDP.info- بەرپرسێ راگەھاندنێ ل رێڤەبەریا گشتی یا باژێرڤانیان ل پارێزگەھا دھۆکێ دیار کر کو پشتی (د.عەلی تەتەر) پارێزگارێ دھۆکێ ئەڤرۆ رۆژا ٢٦/١٠/٢٠٢٠ کۆمبوونەک ب بەرھەڤبوونا رێڤەبەرێ گشتی یێ باژێرڤانیان ل پارێزگەھا دھۆکێ ئەنجامدایی، بڕیار ھاتەدان ١٤ سەرۆک باژێرڤانی ل سنوورێ پارێزگەھا دھۆکێ بھێنە گوھۆڕین.
ئەمیر ئەترووشی، بەرپرسێ راگەھاندنێ ل رێڤەبەریا گشتی یا باژێرڤانیان ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو د ھەیاما بۆری دا بەرنامەک ھاتبوو دانانان کو سەرۆکێن باژێرڤانیێن سنوورێ پارێزگەھا دھۆکێ بھێنە گوھۆڕین و ئەڤرۆ د قۆناغا ئێکێ دا بڕیار ھاتەدان ١٤ سەرۆکێن باژێرڤانیێن سنوورێ پارێزگەھا دھۆکێ بھێنە گوھۆڕین و گۆت: "ئەڤ سەرۆکێن نوو یێن بۆ ڤان باژێرڤانیان ھاتینە دانان د خودان شیانن و مە باوەریا ھەی کو دێ کارێن باش ل دووڤ شیانان ل سنوورێن باژێرڤانیێن خوە ئەنجام دەن".
ناڤھاتی ئاماژە دا وێ چەندێ کو ئەڤ سەرۆک باژێرڤانیێن نوو ھاتینە دانان دێ د ڤێ حەفتیێ دا دەست بکار بن و گۆت: "ل دەمەکێ نێزیک دێ ھژمارەکا دی ژی یا سەرۆکێن باژێرڤانیان ل سنوورێ پارێزگەھا دھۆکێ ھێنە گوھۆڕین".
رێوار محەمەد رەشید
