ماجد سەید سالح: ھەر گرۆپەکێ گەشتیاری یێ پێگێریێ ب رێنمایێن ساخلەمیێ نەکەت نابیت بھێتە د ناڤ پارێزگەھا دھۆکێ دا
دھۆک-kDP.info- جێگرێ پارێزگارێ دھۆکێ ب وەکالەت ئاشکرا کر کو بەری ھەر کەسەک بھێتە د ناڤ ھەرێما کوردستانێ دا ل دەرگەھێن سنووری پشکنینا ڤایرۆسێ کۆرۆنایێ بۆ دھێتەکرن و ھەکە ئەو کەس یێ بیانی بیت و پشکنینا وی پۆزەتیڤ دەرکەڤیت رێ پێناھێتەدان بھێتە د ناڤ ھەرێمێ دا، بەلێ ھەکە ئەو کەس ھەلگرێ رەگەزناما عیراقی بیت و پشکنینا وی پۆزەتیف ژی ب دەرکەڤیت دێ رێ پێ ھێتەدان بھێتە د ناڤ ھەرێما کوردستانێ دا ب مەرجەکی دڤێت خوە کەرەنین بکەت و گۆت: "ھەر گرۆپەکێ گەشتیاری یێ پێگێریێ ب رێنمایێن ساخلەمیێ نەکەت نابیت بھێتە دناڤ پارێزگەھا دھۆکێ دا".
ماجد سەید سالح، جێگرێ پارێزگارێ دھۆکێ ب وەکالەت ئەڤرۆ رۆژا ٢٦/١٠/٢٠٢٠ دپرێس کۆنفرانسەکی دا ل دۆر رێنمایێن نوو یێن خوەپاراستنێ ژ ڤایرۆسێ کۆرۆنایێ ل پارێزگەھا دھۆکێ ئاشکرا کر کو رۆژ بۆ رۆژێ رێژا تووشبوونێ ب ڤایرۆسێ کۆرۆنایێ ل ھەرێما کوردستانێ ب گشتی و پارێزگەھا دھۆکێ ب تایبەتی د زێدەبوونێ دایە ژ بەر ڤێ چەندێ پشتی وان وەکو ژوورا ئۆپەراسیۆنا بەرھەنگاربوونا ڤایرۆسێ کۆرۆنایێ ل پارێزگەھا دھۆکێ کۆمبوونەک ل ژێر رووناھیا دووماھی بەیانناما وەرزاەتا ناڤخۆ یا حکومەتا ھەرێما کوردستانێ دەرکەفتی ئەنجامدایی بڕیار دا کو ھەر کەس و جھەکێ پێگێریێ ب مەرج و رێنمایێن ساخلەمیێ نەکەت ب رێکا پێکئینانا چەندین لیژنان ژ سازیێن جودا یێن حکومەتێ سزا بدەن، ھەروەسا نابیت چ گرۆپێن گەشتیاری یێن بھێنە د ناڤ پارێزگەھا دھۆکێ دا ھەکە پێگێریێ ب رێنمایێن ساخلەمیێ نەکەن بۆ ڤێ مەرەمێ ژی ھەمی زالگەھێن سنوورێ پارێزگەھا دھۆکێ ھاتینە ئاگەھدارکرن و گۆت: "بەری نوکە مە گەلەک ئاسانکاری بۆ وەلاتیان کربوون بۆ ڤەکرنا گەلەک جھان کو ل دووڤ مەرجێن ساخلەمیێ کارێ خوە ئەنجام بدەن، بەلێ جھێ داخێ یە خەلک و خودانێن وان جھان ھەتا رادەیەکی پێگیریێ ب ڤان رێنمایان ناکەن ژ بەر ڤێ چەندێ ھەر جھەکێ بازرگانی یان ھۆلێن شەھیانان و ھتد... ب پێگیریێ ب رێنمایێن ساخلەمیێ نەکەن دێ ھێنە سزادان".
ناڤھاتی ئاماژە دا وێ چەندێ کو ھندەک ژ وان کەسێن ل پارێزگەھا دھۆکێ تووشی ڤایرۆسێ کۆرۆنایێ بووین خوە کەرەنین ناکەن و بێ کو ماسیکی یان دەستگۆرکان بکەنێ تێکەلیێ ل گەل خەلکی دکەن و ئەڤە ژی گونەھەکا مەزنە د دەرھەقێ خەلکەکێ ساخلەم دا دھێتەکرن و گۆت: "نابیت ب ھیچ رەنگەکی کۆمبوون و کۆنفرانس و خرڤەبوون بھێنە ئەنجامدان و یاریێن تەپاپێ یان ھەر یایریەکا دی یا ھەبیت دڤێت بێ ئامادەبوونا جەماوەری بھێتە ئەنجامدان".
رێوار محەمەد رەشید
