د. عەلی تەتەر: ھەر رێڤەبەریەکا پێگێریێ ب رێکارێن ساخلەمیێ نەکەت دێ رێکارێن یاسایی ل ھەمبەر ھێنە وەرگرتن
دھۆک-KDP.info- پارێزگارێ دھۆکێ ئاشکرا کر کو ل دووماھیا ڤێ ھەیڤێ دێ د کۆمبوونەکێ دا بڕیار ل دۆر دەستپێکرنا پرۆسا خواندنێ ل قوتابخانە و زانکۆ و پەیمانگەھان ھێتەدان و گۆت: "چەندین لیژنە دێ ھێنە پێکئینان و دێ دوڤچوونا جھێن گشتی و رێڤەبەریێن میری کەن داکو ئاستێ پاپەندبوونا وان ب مەرج و رێنمایێن ساخلەمیێ بزانن و ھەر جە و رێڤەبەریەکا پێگیر نەبیت دێ پێرابوونێن یاسایی ل ھەمبەر ھێنە وەرگرتن".
د.عەلی تەتەر، پارێزگارێ دھۆکێ ئەڤرۆ رۆژا ١٩/١٠/٢٠٢٠ د پرێس کۆنفرانسەکی دا ل دۆر رێنمایێن نوویێن ژوورا ئۆپەراسیۆنان بەرھەنگاربوونا ڤایرۆسێ کۆرۆنایێ ل پارێزگەھا دھۆکێ دیار کر کو ئەڤرۆ ژوورا بەرھەنگاربوونا ڤایرۆسێ کۆرۆنایێ ل پارێزگەھا دھۆکێ کۆمبوونەکا دی ئەنجام دا ب مەرەما بجھئینانا ئەو رێکارێن ژ لایێ وەزارەتا ساخلەمیا حکومەتا ھەرێما کوردستانێ ڤە ھاتینە دەرکرن و بۆ بجھئینانا ڤان رێنمایان ژی مە پێدڤی ب ھاریکاریا ھەمی لایان ھەیە، ل دەستپێکێ مە پێدڤی یا ب ھاریکاریا وەلاتیێن خوە ھەیی، چونکو کەس نەشێت وەکو وەلاتیان بخوە خوە ب پارێزیت، باشترین رێک ژی ھەتا نوکە ل سەر ئاستێ جیھانێ بۆ خوەپاراستنێ ژ ڤایرۆسێ کۆرۆنایێ خوەپاراستنا کەسی یە و ھەکە وەلاتیێن مە پێگێریێ ب رێنمایێن ساخلەمیێ نەکەن دێ حکومەتا ھەرێما کوردستانێ نەچاربیت چەندین رێکاران بۆ پاراستنا گیانێ وەلاتیان گریتەبەر و گۆت: "ل ڤێ دووماھیێ سالا نوو یا خواندنێ ل ھندەک قوتابخانان یا دەستپێکری کو قووناغا ئێکێ و دویێ بنەرەت و شەشێ ئامادەیی د ناڤ پۆلان دا دخوینن و پشتی بۆرینا دو حەفتیێن دی دێ کۆمبوونەکا دی ئەنجامدەین بۆ وێ چەندێ داکو بزانین دێ ب چ شێوە سەرەدەریێ دگەل دەستپێکرنا پرۆسا خواندنێ ل زانکۆ و پەیمانگەە و قوتابخانان کەین و قووناغێن نوکە د ناڤ پۆلان دا دخوینن دێ بنە پیڤەر بۆ بڕیاردانێ ل دۆر پرۆسا خواندنێ کا ب چو شێوە ھاتینە کۆنترۆلکرن و ھەتا چ رادە پێگیری ب رێنمایێن خوەپاراستنێ ژڤایرۆسێ کۆرۆنایێ کریە، چونکو دو ملیۆن کەس دێ دەست ب پرۆسا خواندنێ کەن، ژ بەر ڤێ چەندێ ژی ئەم داخوازێ ژ ھەمی مامۆستایێن خوە دکەین ژبلی ئەرکێ خوە یێ پەروەردەیی ب کارێ شیرەتکاریێ ژی رابن بۆ وێ چەندێ خەلکێ مە پتر پێگێریێ ب رێنمایێن ساخلەمیێ بکەت".
ناڤھاتی گۆت: "دامودەزگەھێن مە یێن ئێمناھیێ و قایمقام و رێڤەبەرێن ناحیان ل سنوورێ پارێزگەھا دھۆکێ ھاتینە راسپاردن کو ھندەک لژنان پێک بینن ب مەرەما وێ چەندێ سەرەدانا جھێن گشتی وەکو مارکێت و مۆل و ھتد.... و رێڤەبەریێن میری بکەن و ھەر جھەک یان کەسەک یان رێڤەبەریەکا پێگێریێ ب رێنمایێن ساخلەمیێ نەکەت و ببیتە ئەگەر کو زیان بگەھیتە وەلاتیان دێ پێرابوونێن یاسایی ل ھەمبەر ھێنە وەرگرتن، ژ بەر ڤێ چەندێ ھیڤیدکەم ئەم ھەمی ھەست ب بەرپرسارەتیێ بکەین".
پارێزگارێ دھۆکێ خویا کر کو د بوارێ وەرزشی دا بڕیار ھاتیە دان کو دەمێ ھەر بزاڤ و چالاکیەکا وەرزشی دھێتە ئەنجام دان نابیت جەماوەر لێ ئامادە ببیت و ھەر یانەکا جەماوەری د چالاکیێن خوە دا ئامادە بکەت دێ پێرابوونێن یاسایی ل ھەمبەر ھێنە وەرگرتن.
رێوار محەمەد رەشید
