ئەمریکا پشکا چاڤدێریا چڕ بۆ نەخۆشێن کۆرۆنایێ ل دهۆکێ ڤەکر

دهۆک-KDP.info- پشکا چاڤدێڕیا چڕ بۆ نەخۆشێن کۆرۆنایێ، ئەڤرۆ رۆژا 12/10/2020 ب ئامادەبوونا قۆنسلێ گشتی یێ ئەمریکا ل هەرێما کوردستانێ و وەزیرێ ساخلەمیێ یێ هەرێما کوردستانێ و پارێزگارێ دهۆکێ ل تەنیشت نەخۆشخانا تایبەتمەند یا چارەسەیا نەخۆشێن کۆرۆنایێ ل دهۆکێ هاتە ڤەکرن.

د.نزار عسمەت، رێڤەبەرێ گشتی یێ ساخلەمیێ ل پارێزگەها دهۆکێ ئاشکرا کر کو پشکا چاڤدێریا چڕ بۆ نەخۆشێن کۆرۆنایێ ل دهۆکێ ب پشتەڤانیا دارایی یا ئاژانسا ئەمریکی یا گەشەپێدانا نێڤدەولەتی ڤە هاتیە دابینکرن و ئەڤ پرۆژە ژلایێ پرۆگرامێن نەتەوێن ئێکگرتی یێ گەشەپێدانێ ل عیراقێ ب هەڤکاری دگەل رێڤەبەریا گشتی یا ساخلەمیا پارێزگەها دهۆکێ هاتیە جێبەجێکرن و گۆت: "ئەڤ پرۆژە یێ پێکهاتیە ژ 20 ژوورێن چاڤدێریا چڕ بۆ توشبوویێن ڤایرۆسێ کۆرۆنایێ کو ل سەر رووبەرێ گشتی یێ دووهزار مەترێن دوجار ب گۆژمێ ملیۆنەک و 100 هزار دۆلاران هاتیە چێکرن.

د.عەلی تەتەر، پارێزگارێ دهۆکێ ژی ل رێورەسمێن ڤەکرنا پشکا چاڤدێریا چڕ بۆ نەخۆشێن کۆرۆنایێ ل دهۆکێ سۆپاسیا حکومەتا هەرێما کوردستانێ و هەمی رێکخراوان کر بۆ وێ پشتەڤانیا ل کەرتێ ساخلەمیێ دکەن ب تایبەتی ژی ئاژانسا گەشەپێدانا نێڤدەولەتی یا ویلایەتێن ئێکگرتی کو پارێ پێدڤی بۆ پشکا چاڤدێریا چڕ بۆ نەخۆشێن کۆرۆنایێ ل دهۆکێ دابینکری و د پەیڤەکێ دا داخواز ژ خەلکی کر دگەل حکومەتا هەرێما کوردستانێ دهاریکاربن و پێگێریێ ب رێنمایێن ساخلەمیێ بکەن بۆ خۆپاراستن ژ ڤایرۆسێ کۆرۆنایێ و گۆت: "مخابن ئەو عەزیزێن مە ژ ئەگەرێ ڤایرۆسێ کۆرۆنایێ ژ دەست داین پترن ژ وان عەزیزێن مە ل شەرێ دژی تیرۆرستێن داعش ژ دەست داین".

روب والەر، قۆنسلێ گشتی یێ ئەمریکا ل هەرێما کوردستانێ د پەیڤەکێ دا ئاشکرا کر کو ڤەکرنا پشکا چاڤدێریا چڕ بۆ نەخۆشێن کۆرۆنایێ ل دهۆکێ رەنگڤەدانا بەردەوامیا پاپەندیا ویلایەتێن ئێکگرتی یە بۆ خەلکێ هەرێما کوردستانێ دژی ڤایرۆسێ کۆرۆنایێ کو پارێ چێکرنا ڤێ پشکا ناڤهاتی ژ لایێ ئاژانسا گەشەپێدانا نێڤدەولەتی یا ویلایەتێن ئێکگرتی ڤە هاتیە تەرخانکرن و گۆت: "کەلوپەلێن گرنگێن نۆشداری ل پشکا چاڤدێریا چڕ بۆ نەخۆشێن کۆرۆنایێ ل دهۆکێ هاتینە دابینکرن کو دێ هاریکاریا ستافێ پرۆفشنال و چاڤنەترسێ ساخلەمیا دهۆکێ کەت بۆ چارەسەرکرنا نەخۆشان".

ناڤهاتی ئاماژە دا وێ چەندێ کو ویلایەتێن ئێکگرتی یێن ئەمریکا ب رێکا ئاژانسا گەشەپێدانا نێڤدەولەتی یا ویلایەتێن ئێکگرتی، هاریکاری ب کۆژمێ 60 ملیۆن دۆلاران بۆ حکومەتا هەرێما کوردستانێ و حکومەتا عیراقا فیدڕال بۆ بەرهەنگاربوونا ڤایرۆسێ کۆرۆنایێ دابینکرینە.

د.سامان بەرزنجی، وەزیرێ ساخلەمیا حکومەتا هەرێما کوردستانێ ژی پەیڤەک پێشکێشکر و تێدا دیار کر کو ئەو د پاپەندن ب دابینکرنا هەمی پێدڤیێن ساخلەمیێ و زێدەکرنا تەختان ل پشکێن چاڤدێریا چڕ، بەلێ مخابن رۆژ بۆ رۆژێ ژمارا تووشبوویان ب ڤایرۆسێ کۆرۆنایێ ل هەرێما کوردستانێ بەر ب زێدەبوونێ ڤە دچیت و گۆت: "د هەیڤێن بۆری دا هەتا نوکە پتری 530 هزار پشکنینێن تاقیگەهێ بۆ دەسنیشانکرنا گۆمانلێکریێن ڤایرۆسێ کۆرۆنایێ ل هەرێما کوردستانێ هاتینە ئەنجامدان کو 55 هزار و 745 توشبوو ب ڤایرۆسێ کۆرۆنایێ هاتینە تۆمارکرن و هەتا نوکە نێزیکی 19 هزار توشبوویێن هەمان ڤایرۆس ل ژێر چارەسەریا نۆشداران دانە، ژ بەر ڤێ چەندێ داخوازێ ژ هەمی خەلکێ هەرێما کوردستانێ دکەم بۆ خۆ پاراستن ژ ڤی ڤایرۆسی پتر پێگێریێ ب مەرج و رێنمایێن ساخلەمیێ بکەن".

-

-

 

رێوار محەمەد رەشید