سڤێن کراوسپێ: بەهرا پتریا هاریکاریێن وەلاتێ ئەلمانیا بۆ پارێزگەها دهۆکێ هاتینە تەرخانکرن

دهۆک-KDP.info- ب مەرەما ژ نێزیک ئاگەهداربوون ل سەر رەوشا پەیمانگەها چارەسەریێن دەرونی و تراوما ل زانکۆیا دهۆک ئەڤرۆ رۆژا 7/10/2020 (سڤێن کراوسپێ) قۆنسلێ گشتی یێ وەلاتێ ئەلمانیا ل هەرێما کوردستانێ سەرەدانا سەنتەرێ ناڤهاتی کر ژ لایێ پ.د.مسلح دهۆکی سەرۆکێ زانکۆیا دهۆک ڤە هاتە پێشۆازیکرن.

سڤێن کراوسپێ، قۆنسلێ گشتی یێ وەلاتێ ئەلمانیا ل هەرێما کوردستانێ د پرێس کۆنفرانسەکی دا ئاشکرا کر کو کارێ پەیمانگەها چارەسەریێن دەرونی و تراوما ل زانکۆیا دهۆک بۆ وان وەکو وەلاتێ ئەلمانیا گەلەک یێ گرنگە ژ بەر ڤێ چەندێ پشتەڤانیا پەیمانگەها ناڤهاتی دکەن و گۆت: "مە وەکو وەلاتێ ئەلمانیا د شەش سالێن بۆری دا ب کۆژمێ پتری 500 ملیۆن یۆرۆیان هاریکاری پێشکێشی هەرێما کوردستانێ کرینە و کو بەهرا پتریا ڤان هاریکاریان ژی بۆ پارێزگەها دهۆکێ هاتینە تەرخانکرن، ژ بەر کو پارێزگەها دهۆکێ پتر ژ پارێزگەهێن هەولێر و سلێمانیێ ئاوارە و پەنابەر لێ هەنە و پێدڤی ب هاریکاریێ بوون". 

ژ ئالیێ خوە ڤە پ.د. مسلح دهۆکی، سەرۆکێ زانکۆیا دهۆک د هەمان پرێس کۆنفرانس دا ئاشکرا کر کو سێ پرۆژێن باوەرنامێن هەڤپشک د ناڤبەرا زانکۆیا دهۆک و زانکۆیێن وەلاتێ ئەلمانیا دا هەنە و گۆت: "ئەڤرۆ مە داخۆاز ژ قۆنسلێ گشتی یێ وەلاتێ ئەلامانیا کر کو ئاسانکاریێن زێدەتر بۆ مە بکەت ب مەرەما وێ چەندێ زانکۆیا دهۆک بشێت پتر پەیوەندیان دگەل زانکۆ و پەیمانگەهێن وەلاتێ ئەلمانیا گرێدەت".

سەرۆکێ زانکۆیا دهۆک ئاماژە دا وێ چەندێ ژی کو بەری نوکە ئەو کەسێن پێدڤی ب چارەسەریا دەرونی دبوون بۆ ژ دەرڤەی وەلاتی دهاتنە رەوانەکرن و ئاریشە ژ ڤێ چەندێ پەیدادبوون، چونکو هندەک کەس دەمێ دهاتنە رەوانەکرن ڤەنەدگەڕیان و سەرەرایی ڤێ چەندێ پارەکێ مەزن ژی لێ دهاتە مەزاختن، بەلێ نوکە پەیمانگەها چارەسەریێن دەرونی و تراوما ل زانکۆیا دهۆک چارەسەریا وان نەخۆشان دکەت یێن کو تووشی ئاریشێن دەرونی بووین چ ل سەر ئاستێ عیراقێ و هەرێما کوردستانێ ب گشتی و پارێزگەها دهۆکێ و  برایێن مە یێن کوردێن ئێزدی یێن ژ هێرشێن دراندانە یێن تیرۆرستێن داعش ب تایبەتی ل سەنتەرێ ناڤهاتی دهێنە چارەسەرکرن".

 

ڕێوار محەمەد ڕەشید