پتری سێ ملیار دیناران ل سەر خێزانێن هەژار ل دهۆکێ دێ هێنە بەلاڤکرن
دهۆک-KDP.info- پارێزگەرێ دهۆکێ د پرێس کۆنفرانسەکی دا هاریکاریێن سەرۆکێ حکومەتا هەرێما کوردستانێ یێن کو بۆ هەژارێن پارێزگەها دهۆکێ تەرخانکرین راگەهاندن و گۆت: "122 هزار خێزانێن پارێزگەها دهۆکێ دێ ژ ڤان هاریکاریان د مفادار بن".
د. عەلی تەتەر، پارێزگەرێ دهۆکێ ئەڤرۆ رۆژا 6/10/2020 د پرێس کۆنفرانسەکی دا ئاشکرا کر کو سێ ملیار و 500 ملیۆن دینارن دێ ل سەر 35 هزار خێزانێن هەژارێن پارێزگەها دهۆکێ هێنە بەلاڤکرن کو ژ ڤی کۆژمێ دیارکری 100 هزار دینار بۆ هەر خێزانەکێ هاتینە تەرخانکرن، هەروەسا 87 هزار خێزانێن دی یێن هەمان پارێزگەه دێ ئاهێن خوارنێ وەرگرن.
پارێزگەرێ دهۆکێ ئاماژە دا وێ چەندێ ژی کو هاریکاریێن حکومەتا هەرێما کوردستانێ ل سەر خێزانێن هەژار بەری نوکە ژی هاتینە بەلاڤکرن و دێ د بەردەوام بن و گۆت: "رێژا هەژاریێ ل پارێزگەها دهۆکێ ب وی رەنگی نینە کو هندەک ژێدەر بێ پیڤەرێن زانستی بەحس دکەن، نوکە ژی دبێژم پارێزگەها دهۆکێ ژ هەمی پارێزگەهێن دی یێن عیراقێ بۆ خوەشیا ژیانێ ل رێزا ئێکێ دهێت، بەلێ رەنگە پارێزگەهێن هەولێر و سلێمانیێ یێن هەرێما کوردستانێ بۆ خۆشیا ژیانێ ل بەری پارێزگەها دهۆکێ بهێن".
رێوار محەمەد رەشید
