رۆژا جیهانی یا دانعەمران ل دهۆکێ هاتە ساخکرن

دهۆک-KDP.info- رێڤەبەریا چاڤدێری و گەشەپێدانا جڤاکی ل پارێزگەها دهۆکێ ئەڤرۆ رۆژا 1/10/2020 رۆژا جیهانی یا دانعەمران ب ئەنجامدانا چەندین چالاکیان ساخکر.

سەباح محەمەد عەلی، رێڤەبەرێ مالا دانعەمران ل پارێزگەها دهۆکێ بۆ مالپەرێ فەرمیێ پارتی دیموکراتی کوردستان دیار کر کو ئەڤە بۆ دەمێ دو سالانە رۆژا جیهانی یا دانعەمران ل پارێزگەها دهۆکێ ساخ دکەن کو نوکە 23 کەسێن دانعەمر ل مالا دانعەمران ل پارێزگەها دهۆکێ دژین کو 11 ئافرەتن و 12 زەلامن و ب باشترین شێوە سەرەدەریی و خزمەتا وان دهێتەکرن و گۆت: "ب ڤێ هەلکەفتێ ئەڤرۆ مە چەندین دیاری ل سەر دانعەمران بەلاڤکرن، هەروەسا مە نامیلکەکا کار و چالاکیێن مالا دانعەمران ژی ل سەر ئامادەبوویان بەلاڤکر سەرەرایی ڤێ چەندێ پەردە ل سەر کەڤالەکی ژی ل مالا دانعەمران هاتە راکرن کو دەربڕینێ ژ ژیانا دانعەمران دکەت، ب ڤێ چەندێ ژی مە دڤێت بۆ هەمی خەلکی دیار کەین کو دانعەمر بتنێ نینن و پتر ژ هەر کەسەکێ دی چاڤدێریا وان دهێتەکرن".

ناڤهاتی ئاماژە دا وێ چەندێ کو ل هەیاما بۆری چەندین دانعەمرێن ل مالا دانعەمران ل پارێزگەها دهۆکێ دژین تووشی ڤایرۆسێ کۆرۆنایێ ببوون، بەلێ نوکە رەوشا وان یا باشە و ل رۆژێن بۆری پشکنینێن وان هاتنەکرن هەمی نێگەتیڤ دەرکەفتن، ئانکو نوکە هەلگرێن ڤایرۆسێ کۆرۆنایێ نینن و رەوشا ساخلەمیا وان یا باشە.

-

-

-

رێوار محەمەد رەشید