150 ھزار گۆل دێ ل باژێرێ دھۆکێ ھێنە چاندن
دھۆک-KDP.info- رێڤەبەرێ ئەندازەیا پارکان ل دھۆکێ دیار کر کو ھەموو ڤەدیتن بۆ چێکرنا پارکا ئالۆکا ل باژێرێ دھۆکێ ب دووماھی ھاتینە کو دێ ل سەر رووبەرێ 650 دۆنەمێن ئەردی ھێتە چێکرن و گۆت: "ل دەستپێکا ھەیڤا بھێت ئانکو پشتی چەند رۆژێن دی دێ دەست ب چاندنا 150 ھزار گۆلێن وەرزی د ناڤ سەنتەرێ باژیرێ دھۆکێ دا کەین".
ھۆگر ئیسلام، رێڤەبەرێ ئەندازەیا پارکان ل دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو د ھەیاما بۆری دا ژ بەر گرتنەبەرا رێکارێن ساخلەمیێ بۆ خوە پاراستن ژ ڤایرۆسی کۆرۆنایێ ئەو نەشیاینە وەکو پێدڤی کارێ خوە ئەنجام بدەن، بەلێ سەرەرایی ڤێ چەندێ ھەر ژ دەستپێکا سالا 2020 و ھەتا نوکە وان 29 ھزار 336 گۆلێن ھەردەم و 180 ھزار گۆلێن وەرزی ل باژێرێ دھۆکێ چاندینە و ل دەستپێکا ھەیڤا ئوکتۆبەرا ئەڤ سالە ئانکو پشتی چەند رۆژێن دی دێ 150 ھزار گۆلێن دی یێن وەرزی ل باژێرێ دھۆکێ چینن و ھەمی بەرھەڤی بۆ ڤێ مەرەمێ کرینە و گۆت: "نوکە مە دەست ب چاندنا ژمارەکا بەرچاڤ یا داران ژی ل ئۆڤەرپاسا جادا بارزان ل نێزیک فەرماندا دھۆک کریە".
ناڤھاتی ئاماژە دا وێ چەندێ کو 160 پارک و باخچە ل سەنتەرێ باژێرێ دھۆکێ ھەنە و ھەمی ل ژێر چاڤدێریا رێڤەبەریا وان دھێنە ب رێڤەبرن و د خزمەتا وەلاتی و گەشتیاران دانە و گۆت: "رێژا کەسکاتی ل باژیرێ دھۆکێ د دەمێ کێمتر ژ 10 سالێن بۆری دا بتنێ 3.8% بوو، بەلێ ب ھاریکاری و پشتەڤانیا ھەمی لایەنێن پەیوەندیدار دگەل مە دا نوکە ئەڤ رێژە بوویە 14%، لێ ئەم پێدڤی ب چێکرنا 160 باخچە و پارکێن دی نە ھەتا ئەڤ رێژە دگەھیتە 21% کو رێژا ستاندارتە بۆ باژێرێ دھۆکێ و مە پلانێن باش ژی بۆ ڤێ مەرەمێ داناینە، لێ چەند رووبەرێ باژێرێ دھۆکێ بەرفرەھتر لێ بھێت بێگۆمان دڤێت ئەو رێژا مە دیار کری ژی پتر لێ بھێت".
رێڤەبەرێ ئەندازەیا پارکان ل دھۆکێ خویا کر کو ھەمی ڤەدیتن وان ل دۆر پارکا ئالۆکا پێشکێشی وەزارەتا شارەوانی و گەشتوگۆزار یا حکومەتا ھەرێما کوردستانێ کرینە کو دێ ل سەر رووبەرێ نێزیکی 650 دۆنەمێن ئەردی ھێتە دروستکرن، بەلێ ژ ڤی رووبەری بتنێ 370 ھزار مەترێن چارگۆشە یێن بۆ کەسکاتیێ ھاتینە تەرخانکرن و ئەو رووبەرێ مای ژی دێ ئاڤاھی و خارنگەە و کافێ و یاریێن زارۆیان و ھتد... لێ ھێنە دروستکرن، لێ ھەتا نوکە ژ بەر قەیرانا دارایی یا سەر ب ھەرێما کوردستانێ دا ھاتی ئەو نەشیاینە دەست ب چێکرنا وێ پارکێ بکەن، چونکو ل دووڤ دووماھی ڤەدیتنا وان بۆ وێ پارکێ کری نێزیکی 140 ملیۆن دۆلاران دێ لێ ھێنە مەزاختن، سەرەرایی ڤێ چەندێ پارکەکا مەزن دێ ل جھێ پیشەسازیا ترۆمبێلان ل تاخێ بەرۆشکێ یێ د ناڤ سەنتەرێ باژێرێ دھۆکێ ژی دا ھێتە چێکرن و ل دەمەکێ نێزیک ھەمی ڤەدیتن دێ ژ لایێ وان ڤە بۆ وێ پارکێ ژی ھێنەکرن.
رێوار محەمەد رەشید
