بەدرخان زاویتەیی: لیستەکا کوردستانی پێدڤیەکا گەلەک گرنگە بۆ ھەلبژارتنێن داھاتی یێن عیراقێ
دھۆک-KDP.info- چاڤدێرەکێ سیاسی دیار کر کو لیستەکا کوردستانی پێدڤیەکا گەلەک گرنگە بۆ ھەلبژارتنێن داھاتی یێن عیراقێ کو ژڤانە ل ھەیڤا خزیرانا سالا ٢٠٢١ بھێنە ئەنجامدان، بەلێ ھەکە لایەنێن سیاسی پشکداری وێ لیستا کوردستانی نەبوون بێ گۆمان ئەڤ بارگرانیە ھەموو دێ بۆ پارتی دیموکراتی کوردستان مینیت و دڤێت پارتی ھەموو سەنگێ خوە ب کاربینیت کو ئێدی ھەڤسەنگیێ ب پارێزیت و رێکێ نەدەت چ ھاوکێشێن دی یێن سیاسی ل سەر ھەرێما کوردستانێ و پارتی ب خوە ژی بھێنە سەپاندن.
بەدرخان زاویتەیی، چاڤدێرێ سیاسی بۆ مالپەرێ فەرمیێ پارتی دیموکراتی کوردستان دیار کر کو پشتی د ھەلبژارتنێن سالێن ٢٠٠٥ و ٢٠٠٩ پارتێن کوردی ب تایبەتی ژی پارتی دیموکراتی کوردستان و ئێکەتی نشتیمانی کوردستان ب ئێک لیست پشکداری ھەلبژارتنان بووین ھەموویان دیت کاودانێن کوردان ل بەغدا ب چ شێوە بوون و چەوا سەرەدەری دگەل مافێن دستووری یێن ھەرێما کوردستانێ دھاتەکرن، بەلێ پشتی ڤێ قووناغێ ل ھەلبژارتنێن ل سالێن ٢٠١٤ و ٢٠١٨ یێن کو ل عیراقێ ھاتینە ئەنجامدان، مخابن پەرتەوازەیەکا دیار ب لایەنێن کوردستانی ڤە یا دیاربوو کو ھندەک ئارمانج بۆ ڤێ مەرەمێ ھەبووینە و ئەو جورێ رەفتار و سەرەدەریکرنێ دگەل مافێن خەلکەکی، خەلک تووشی مەندەھۆشیێ کربوو ژ بەر ڤێ چەندێ خەلک ب ھەموو رەنگان چاڤەڕێ وێ چەندێ یە کو لیستەکا کوردستانی دروست ببیت ب تایبەتی ژی ژ پێخەمەت وێ چەندێ کو دەڤەرێن ماددێ ١٤٠ و ب تایبەتی ئەو کاودانێن نوکە ل کەرکووکێ ھەین نەمینن و گوھۆڕین ب سەردا بھێن و وەکو دەڤەرێن کوردستانی سەرەدەری دگەل بھێتەکرن، بەلێ ھەکە بھێت و لیستەکا کوردستانی یا ھەمە لایەن دھەلبژارتنێن داھاتی یێن عیراقێ دا دروست نەبوو چەند لایەنەک ژی تێدا پشکداربن دێ بیتە ئەگەر کو وێ ھەڤسەنگیا ھێزێ بگوھۆڕیت و ئێدی ئەو لایەنێن دی یێن دووری ڤێ لیستێ ژی بن کوردستانی ب خوە دێ وان سزادەن و رەفتارا وان یا خراب ل بەغدا ھیچ رەنگڤەدانەک نابیت وەکی ئەوا نوکە ئەو دکەن کو رۆژانە ب لێدوان و رەفتار و دیدارێن تەلەڤزیۆنی دژاتیا خەلکێ کوردستانێ و مافێن دستووری یێن ھەرێما کوردستانێ دکەن، لەوڕا ژی لیستەکا کوردستانی پێدڤیەکا گەلەک گرنگە بۆ ھەلبژارتنێن داھاتی یێن عیراقێ ھەکە بھێت و ئەڤ لیستە دروست ژی نەبیت بێ گۆمان ئەڤ بارگرانیە ھەموو دێ بۆ پارتی دیموکراتی کوردستان مینیت و دڤێت پارتی ب ھەموو سەنگێ خوە و ب ھەموو رەنگان کارەکێ خۆرت ل سەر ڤان دەڤەران بکەت بۆ وێ چەندێ ئەو کاودانێن خرابێن ھاتینە سەپاندن بگوھۆڕیت و ھەڤسەنگیێ ب پارێزیت و رێکێ نەدەت چ ھاوکێشێن دی یێن سیاسی ل سەر ھەرێما کوردستانێ و پارتی ب خوە ژی بھێنە سەپاندن و گۆت: "دڤێت ھەموو بەرھەڤی بۆ ھەلبژارتنێن داھاتی یێن عیراقێ بھێنەکرن کو بڕیارە ل ھەیڤا خزیرانا سالا ٢٠٢١ بھێنە ئەنجامدان، بەلێ ئەو کاودانێن ل عیراقێ دھێنە پێش ئاماژێن خراب ل پشت ھەنە دوور نینە کاودانەکێ نوو بھێتە پێش ھەلبژارتن نەھێنە ئەنجامدان".
ناڤھاتی خویا کر کو ھەڤسەنگیا سیاسی ل عیراقێ سەنگێ وێ یێ سەرەکی ھەر پارتی دیموکراتی کوردستانە و لیستەکا کوردستانێ دێ شێت وێ ھەڤسەنگیێ پارێزیت و دێ رێگریێ ل زوورینە و کەمینەیا د پەرلەمانی دا ھێتەکرن، ب تایبەتی ژی لایەنێن شیعی و ئێدی یاسایا ھەلبژارتنان ب کەیفا وان ناھێتە دارێتن و دەربازکرن و بابەتێن گوھۆڕینێن دستووری ژی ب وی رەنگی نابن کو ھەموو مەرەما وان ئەوە مافێن دستووری یێن ھەرێما کوردستانێ سنووردار کەن و قەوارێ ھەرێمێ بچووک کەن و گۆت: "ب دیتنا من مەرەم ژ ئەنجامدانا ھەلبژارتنان ئەوە کو ئێدی سەنگێ پارتی دیموکراتی کوردستان لاواز کەن و قەوارێ ھەرێما کوردستانێ بچووک کەن و ب دستووری وەکو پارێزگەھەک رەفتارێ دگەل بکەن ژ بەر ڤێ چەندێ دڤێت ب ھەموو رەنگان رێگری ل ڤان پیلانان بھێتە کرن و رێگرتن ل ڤان پیلانان ژی ب لیستەکا کوردستانی یە یان ژی پارتی یە لەوڕا ژی دڤێت کارەکێ خۆرت ل سەر ڤێ چەندێ بھێتەکرن".
بەدرخانی ئاشکرا کر ھەلبژارتنێن پێشوەخت ل ھیچ وەلاتەکی گوھۆڕینێن بەرچاڤ ب خوە ڤە نەدیتینە، بەلکو کاودان بەر ب ئاقارەکێ خرابتر ڤە برینە، ل عیراقێ ژی ھیچ گوھۆڕینەکا مەزن ناھێتە پێش ھەکە ھەلبژارتن بھێنە ئەنجامدان، چونکو کاودانێن عیراقێ ژ ھەموو لایان ڤە گەلەک د ئالۆزن و نیشان ھەنە رەنگە کاودانێن خراب بھێتە پێش، بەلێ ھەکە ھەلبژارتن ژی بھێنە ئەنجامدان دڤێت دوزا کوردی ل دەڤەرێ ب ھەلبژارتنێن عیراقێ ڤە نەھێتە گرێدان، چونکی دوزا کوردان ل دەڤەرێ دەربازی قووناغەکا دی بوویە ل باشوور و رۆژئاڤایێ کوردستانێ، ب تایبەتی ژی ل باشووری پشتی ئەنجامدانا ریفراندومێ کورد و ھەر کاودانەکێ دی یێ بھێتە پێش کارتا ریفراندۆمێ یا ددەستێن سەرکردایەتیا کوردی دا و ئێدی دشێن رێگریێ ل وان پیلانێن ل بەغدا دژی ھەرێما کوردستانێ دھێنە دارێتن بکەن.
رێوار محەمەد رەشید
