رەمەزان مستەفا: دڤێت کورد د دارێتنا سیاسەتا دەرڤە یا عیراقێ دا پشکداربن

دھۆک-KDP.info- سەرۆکێ کۆمەلا ئەکادیمیێن زانستێن سیاسی ل پارێزگەھا دھۆکێ دیار کر کو دڤێت ھەرێما کوردستانێ پتر گرنگیێ بدەتە بابەت و ڤەکۆلینان ل دۆر بابەتێن دبلۆماسی و سیاسەتا دەرڤە بۆ وێ چەندێ خواندن بۆ بوویەرێن جیھانی ھەبیت و بزانیت یاریا سیاسی ل رۆژھەلاتا ناڤەڕاست و ل سەر ئاستێ نێڤدەولەتی ب چ شێوە دھێتە ئەنجامدان و گۆت: "د ھەمی وەلاتێن جیھانێ دا سیاسەت ب رێکا حکومەتێ و سەرۆکێ ھەرێمێ یان سەرۆکێ جڤاتا وەزیران یان وەزیرێ ناڤخۆ یان فەرمانگەھا پەیوەندیێن دەرڤە دھێتە پەیرەوکرن نە ب رێکا حزبێن سیاسی".

رەمەزان نسرەدین مستەفا، سەرۆکێ کۆمەلا ئەکادیمیێن زانستێن سیاسی ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو مەرەم ژ دروستکرنا ناڤەندێن دبلۆماسی ئەوە کو حکومەتا ھەرێما کوردستانێ ب رێکا فەرمانگەھا پەیوەندیێن دەرڤە بزاڤێن گەلەک مەزن بکەت کو نوونەراتیێن حکومەتا ھەرێما کوردستانێ ل وەلاتێن زلھێز ب تایبەتی وەلاتێن ھەمیشەیی د جڤاتا ئاسایشێ دا ڤەکەت بەرامبەر بالیۆزخانێن ل عیراقێ، ژ بەر کو ڤەکرنا ناڤەندێن ئەکادیمی یێن دبلۆماسی د ناڤ ھەرێما کوردستانێ دا ھاریکارن بۆ حکومەتا ھەرێمێ کو بشێت سیاسەتەکێ یان بەرنامەکی یان ل سەر ئاستێ دەرڤە خواندنەکا باش بۆ دبلۆماسیەتا جیھانێ بکەت.

ناڤھاتی ئاماژە دا وێ چەندێ کو ناڤەندێن دبلۆماسی ل سەر ئاستێ جیھانێ د ھاریکارن بۆ ھەموو حکومەتان بۆ نموونە وەلاتەکێ وەکو ئەمریکا ھەکە ناڤەندێن ئەکادیمی یێن دبلۆماسی نەبن ئاریشە دێ کەڤنە د بابەتێن دبلۆماسی و سیاسەتا دەرڤە دا، بەلێ ھەرێما کوردستانێ دڤێت گرنگیێ بدەتە بابەت و ڤەکۆلینان ل دۆر بابەتێن دبلۆماسی و سیاسەتا دەرڤە بۆ وێ چەندێ خواندن بۆ بوویەرێن جیھانی ھەبیت و بزانیت یاریا سیاسی ل رۆژھەلاتا ناڤەڕاست و ل سەر ئاستێ نێڤدەولەتی ب چ شێوە دھێتە ئەنجامدان، خالا ژ ھەموویان ژی گرنگتر بزانیت پێگەھێ کوردان د سیاسەتا نێڤدەولەتی دا چیە. 

سەرۆکێ کۆمەلا ئەکادیمیێن زانستێن سیاسی ل پارێزگەھا دھۆکێ خویا کر کو گۆتارا سیاسی یا فەرمی یا حکومەتا ھەرێما کوردستانێ یا لاوازە دناڤخۆیا ھەرێما کوردستانێ دا، چونکو حزبێن سیاسی ئەڤرۆ خودان پەیوەندیێن راستەوخوەنە دگەل وەلاتێن دراوسێ، دڤێت پەیوەندیێن ھەرێما کوردستانێ دگەل وەلاتێن دراوسێ و وەلاتێن دی یێن جیھانێ ب رێکا حکومەتا ھەرێما کوردستانێ بیت نە ب رێکا حزبێن سیاسی بیت و دڤێت یاسایەک بھێتە دەرخستن بۆ وێ چەندێ کو نابیت رێک ب حزبێن سیاسی بھێتە دان پەیوەندی و نڤیسینگەھێن خوە د وەلاتێن جیھانێ دا ھەبن، چونکو د ھەمی وەلاتێن جیھانێ دا سیاسەت ب رێکا حکومەتێ و سەرۆکێ ھەرێمێ یان سەرۆکێ جڤاتا وەزیران یان وەزیرێ ناڤخۆ یان فەرمانگەھا پەیوەندیێن دەرڤە دھێتە پەیرەوکرن و گۆت: "دڤێت ئەم خودان گۆتارەکا سیاسی بن، ھەروەسا بزاڤان بکەین بەرژەوەندیێن پێگوھۆڕێن وەلاتێن جیھانێ بینینە د ناڤ ھەرێما کوردستانێ دا، ھەروەسا لەشکرەکێ ب ھێز یێ ئەکادیمی یێ نشتیمانی مە ھەبیت، دیسان چاکسازیێن بنەرەت د بوارێن دبلۆماسی و سیاسی و ئابووری و دارایی دا بھێنە ئەنجامدان و گرنگیەکا زێدەتر ب کەرتێ پەروەردێ بھێتە دان بۆ وێ چەندێ پێگەھێ ھەرێما کوردستانێ بھێز بکەڤیت".

رەمەزانی دیار کر کو د ڤێ قووناغێ دا ھەرێما کوردستانێ پێدڤی ب پشتەڤانیا وەلاتێن زلھێز ھەیە وەکو رووسیا و برێتانیا و فەرەنسا و ئەمریکا و چین بۆ وێ چەندێ ھەر دەمێ یاسایەک ل جڤاتا ئاسایشێ دژی پێگەھێ ھەرێما کوردستانێ ھاتە سەپاندن ئەڤ وەلاتە د پشتەڤان بن بۆ ھەرێمێ، چونکو بەزاندنا سنووران و مایتێکرنێن وەلاتێن دەوروبەر د کاروبارێن عیراقێ ب گشتی و ھەرێما کوردستانێ ب تایبەتی دا مەترسیە ل سەر ھەرێمێ، ژ بەر ڤێ چەندێ دڤێت ئەڤ پەیوەندیە بھێنە بھێزکرن، ھەروەسا دڤێت ھەرێما کوردستانێ بەلانسەکا باش ھەلگریت ب تایبەت دگەل وەلاتێن دراوسێ و گۆت: "دڤێت کورد د دارێتنا سیاسەتا دەرڤە یا عیراقێ دا پشکداربن و پەیرەوا سیاسەتا خوە بکەن و نابیت حکومەتا عیراقێ بێ ھەرێما کوردستانێ سیاسەتەکێ دارێژیت بۆ وێ چەندێ کوردان ژی ھەلویستەکێ فەرمی یێ باوەرپێکری ژ لایێ جڤاکێ نێڤدەولەتی ڤە ھەبیت".

ل دووماھیێ سەرۆکێ کۆمەلا ئەکادیمیێن زانستێن سیاسی ل دھۆکێ ئاشکرا کر کو پێگەھێ ھەرێما کوردستانێ بەری بوویەرێن ١٦ ی ئۆکتۆبەرێ گەلەکێ ب ھێز بۆ و بەرژەوەندیێن وەلاتێن جیھانێ لێ ھەبوون ل سەر ئاستێ بابەتێ مافێن مرۆڤی و دیموکراسیەت و لێبوورین و پێکڤەژیان ئەڤە ھەمی خالێن ھێزێ بووینە کو وەلاتێن جیھانێ گرنگیەکا تایبەت د دا ھەرێما کوردستانێ، بەلێ جھێ داخێ یە پشتی وان بوویەران جڤاکێ نێڤدەولەتی ب چاڤەکێ دی یێ کێمتر تەماشەیی ھەرێما کوردستانێ دکەت، چونکو کوردان سەلماند خودان ھێز و گۆتارەکا سیاسی و بەرنامەکێ سیاسی یێن ئێکگرتی نینین ھەمبەری وان بوویەرێن ل دەڤەرێ دھێنە روودان، ھەروەسا بەلاڤبوونا ناڤمالا کوردی ژی ل سەر ل سەر ئاستێن گەلەک لاواز پێگەھێ ھەرێما کوردستانێ لاواز کریە و گۆت: "نوکە کارەکێ باش یێ دبلۆماسی ل ھەرێما کوردستانێ دھێتە ئەنجامدان و ئەز د وێ باوەرێ دا مە قۆناغا بھێت کورد دێ ژ ئاستێ بەری ١٦ی ئۆکتۆبەرێ ژی دەربازبن و پێگەھەکێ ب ھێزتر دێ ھەبیت، چونکو بزاڤێن دبلۆماسی یێن دھێنە ئەنجامدان ئەڤە ددەمەکی دایە گرنگیدانا وەلاتکێ وەکو فەرەنسا ب ھەرێما کوردستانێ و ئەمریکا ژ نێزیک تەماشەیی رەوشا عیراقێ دکەت و یا دبینیت رەوشا عیراقێ یا تێک دچیت ژ بەر ڤێ چەندێ دێ ھەمی بزاڤان کەت کو ل قۆناغا داھاتی کورد یاریکەرەکێ سەرەکی بیت ل عیراقێ و دەڤەرێ دا".

 

رێوار محەمەد رەشید