ھەولێر دەروازەیەك بۆ ئاشتیێ
مەحفوز مایی
دەڤەرا رۆژھەلاتا ناڤین ھەیامەكە دناڤ گەلەك ئاریشە و گەنگەشەیاندا دكەلیت، ھەلبەت ژبەر كو كوردستان ژی كاكلكا ڤێ دەڤەرێ یە و گرنگی و جھەكێ تایبەت د ڤێ دەڤەرێدا ھەیە. ھەر بایەك، ھەر باھۆزەك ل رۆژھەلاتا ناڤین رابیت كوردستان و گەلێ كورد دڤی وەلاتێ پارچەكریدا دكەڤیتە بەر پێلێن ڤان باو وبارۆڤا. ئەڤ پارچەبوونا كوردستانێ ژی وەلێھات كو ئێدی ھەر پارچەكێ تایبەتمەندییێت خوە ھەبن و دڤێت ل گور وان تایبەتمەندییا سەرەدەری دگەلدا بێتە كرن.
دقۆناغا نوكەدا، تشتێ ھەری گرنگ و باشترین رێ دخەباتا ئازادیخوازا نەتەوەیا كورد دا رێیا دیالۆگ و دانوستاندنێ یە. راستە سەردەمەك ھەبوو ژ نەچاری و ژبۆ بەرەڤانیكرن ژ ھەبوونا خوە ل چەند پارچێن كوردستانێ گەلێ كورد چەك ھەلگرت و ل ھەمبەر دوژمنی بەرەڤانی ژ ھەبوونا خوە دكر چونكی دوژمنێ بەرامبەر نەك دیالۆگ قەبوول نەدكر، بگرە ئینكارا ھەبوونا كوردان دكر و بھەمی ھەولێن خوە دڤیا كو كورد نەمینن. ئەو بەرەڤانییا چەكداری دوی دەمیدا كارەكێ پیرۆز و دجھێ خوەدا بوو، ھەر ئەو خەبات ژی بوو وەكر كو ئێدی دژمن ھزرێ ل ژناڤبرنا كوردان نەكەت و نەچار بیت دگەل دیالۆگ و دانوستاندنان ئەنجام بدەت.
ئەڤرۆكە دڤێ بیاڤا خەباتا دیالۆگ و دانوستاندنێ دا، ھەولێر دشێت رۆلەكێ گەلەك گرنگ بلەیزیت ئەو ژبەر چەند ئەگەران:
1- ئەو بووروسەربوورێت شەر و بھەڤچوون و براكوژی و چەك ل پێش ھەر چارەیەكێ بوو، گەلەك دەرسێن باش ژ وان سەربووران ھاتنە وەرگرتن كو رۆژێن تەحل و دژوار بوون و پتر پرسگرێك ئالۆز دبوون، ئەو یا بوویە دەرسەك باش كو ئێدی ھەر كەس و ھەر ئالیەك ژ دل ھەول ددەن كو رێیا دیالۆگێ بگرنە بەر بۆ چارەسەركرنا ھەر گرفتەك و ئاریشەیەكێ.
2- ھێزێن سیاسی و سەكردێن وان ھێزان تەڤ ژوان دھەر دەلیڤەكیدا ئامادەییا خوە دەردبرن بۆ دیالۆگێ و ھەڤدوقەبوولكرنێ.
3- ئەو كەسایەتی و كاریزما كو سەرۆك مەسعود بارزانی ھەی ل جەم ھەر ئالییەكی و ھەر كەسەكی و حەتا دقادا ناڤنەتەویدا ژی گرنگییا خوە ھەیە، ئەو دكاریت رۆلەكی سەرەكی دڤێ بیاڤێدا بلەیزیت كو ژ بۆ ئەنجامدانا كارەكی ھۆسا كەسایەتییەك وەك جەنابێ وی پێتڤی یە، نەخاسمە دوارەكیدا كو سازمانا نەتەوەیێن یەكبوویی نەشێن وی رۆلی باش ببینن.
ئەڤە ھەمی و دسەر ڤان ھەمی ئالاڤ و سەدەمان را، دڤان سالێن بووریدا ھەولێر یا بوویە دەرگەھەك ژ بۆ ئاشتییێ و سەرۆك مەسعود بارزانی دشێت كلیلا بۆ وی دەری پەیدا بكەت.
مە ھەمیا دیت پاشی نەمانا رژێما صەددامی چ ئالۆزی كەتە ناڤبەرا ھێزێن سیاسی ل عیراقێ كو ئەو ژی نە تشتەكێ دویری ھزركرنێ بوو، لێ دەما بەربووینە گیانێ ھەڤدوو و كوشتن و سەربرین دناڤبەرا تایفێن عیراقێدا پەیدا بوو و ئێدی جیران ژ جیرانێ دترسا و خەلك ل سەر ھەویەو مەزھەبان دھاتنە سەرژێكرن، رەوش گەلەك ئالۆز بوو.
ھینگێ مە ھەمیا دیت خەمخورییا سەرۆك بارزانی و پییەكێ وی ل بەغدا و یەك ل ھەولێرێ و ڤی گرۆپی دگەل وی گرۆپی لھەڤ بینە، ئەو بھاریكارییا كەسێن دی یێن ئاشتی خواز شیان وی ئاگری ڤەمرینن، حەتا بۆ ھندەك نەحەزان ببوو جھێ رەخنێ كو سەرۆكی دەست ژناڤ مالا كوردان بەردایە و خەریكی رێكستنا ناڤمالا عەرەبانە.
دیسا ھەر ئەو بوو، تەڤایا ھێزێن سیاسی ل عیراوقێ ئینانە جەم ھەڤ و ل ھەولێرێ پەیمان پێ دانە ئیمزاكرن.
دیسا ژی ھەر ئەو بوو و ئێكا وەسا كر كو ئەڤ حكومەتا مالكی بھێتە دامەزراندن، كو ئەڤرۆكە گەفا ل گەلێ كورد و ئاخا كوردستانێ دكەت و ل شوینا دیالۆگێ لەشكەرێ ب تانك و فرۆكە دئینیتە سەر كوردستانێ.
ھەر بۆ بەرسڤدانا وی ژی، نە ژ سیاسەتا وی یا حەكیمانە بایە كو باوەری بشەری و چەكی نینە بۆ چارەسەركرنا گرفتان، نوكە رەوشەكە دی ل ھەرێمێ ھەباو و شەر و رەڤین و كوشتن و ترس دیسا بسەر مە ھەمیادا گرتبا.
درەوشا رۆژئاڤایێ كوردستانێ دا سەرۆك بارزانی رۆلەكی گەلەك ھێژا دیت دجڤاندنا ھەمی سەر و لایەنێت سیاسی یێ رۆژاڤایێ كوردستانێ، كو ئەگەر ئەو نەبا نەدویر بوو شەرەكێ خراب و بھەڤچوونەك دناڤبەرا ھێزێن سیاسی یێن رۆژاڤایێ كوردستانێ دا قەومیبا، ھینگێ ئێدی چارەسەری دا گەلەك یا بزەحەت بیت. كو بەرھەمێ وان رونشتنێت ل ھەولێرێ ئەڤرۆ كوردێن رۆژائاڤا ل بن سەیوانا دەستەیا بلند كومبوونە و بھەڤرا خەباتێ دكەن.
ئەڤرۆكە ل باكوورێ كوردستانێ ژی رەوشەكە نوی پەیدابووە، كو تێدا زمانێ دیالۆگ و دانستاندنا دێ شێت جھێ چەك و شەری بگریت.
ئەو دیدارێن دەولەتا توركیا دگەل بەرێز عبداللە ئۆجەلان دزیندانا ئیمرالی دا دكەت دڤێت نیەتا ھەر ئالیەكی ساف بیت نەخاسمە دەولەتا توركییا دگەل وان دانوستاندنان ھندەك پێگاڤێت دی ژی پاڤێژیت كو باوەرییێ ل جەم گەلێ كورد دروست بكەت. ژوان بەردانا رۆژنامەڤان و سیاسەتمەدار و رۆشنبیرێت كو ھاتنە زیندانیكرن. ھەروەسا وەكی چەند جاران پ.ك.ك ژ ئالیێ خوە ڤە شەر راگرتییە بلا دەولەت ژی ئۆپەرەسیۆنێن لەشكەری بدە راوەستاندن ھەتا كو ئەنجامێ ڤان دیالۆگان خوەیا دبن.
دیسا ڤە ھەولێر و سەرۆك بارزانی دكارن دڤی واریدا رۆلەك گەلەك باش بلەیزن، كو دیارە ژی دگەلەك موناسەبەیاندا ھەم سەرۆك بارزانی و ھەم ژی سەرۆكی حكومتا كوردستانێ كاك نێچیرڤان بارزانی دایە خوەیاكرن كو ئەو ژ بۆ ئاشتییێ ئامادەنە ھەمی ھاریكارییەكێ بكەن.
ئێدی بلا ھەولێر ببە دەریێ ئاشتیێ و دێ سەرۆك بارزانی شێت كلیدا وی دەری پەیدا بكەت.
