ئەندامێکی تیمی دوناڵد ترامپ بۆ KDP.info قسە دەکات
واشنتۆن - KDP.info - پرۆفیسۆری یاسای نێودەوڵەتی و ئەندامی تیمی دۆناڵد ترامپ بۆ هەڵبژاردنەکانی ٢٠٢٠ دەڵێت، ئەمەریکا پەیوەندیی باشی لەگەڵ هەرێمی کوردستان هەیە.
پرۆفیسۆر د. گابرییەل ساوما، بە ماڵپەڕی فەرمیی پارتی دیموکراتی کوردستانی گوت: "ئەگەر خوێندنەوەیەکی مێژوویی بکەین بۆ پێوەندییەکانی ئەمەریکا لەگەڵ کورد، دەتوانین ناوی لێ بنێن لەگەڵدابوون و، بە شێوەیەکی هاوسەنگ پشتیوانیی حوکمی زاتییان کردووە، ئەوەندەی لەگەڵ ئامانجەکانی ئەمەریکا بگونجێت.''
ساوما گوتی: "ئەمەریکا پەیوەندیی باشی لەگەڵ کوردستان هەیە و لە سەردەمی هێنری ئەلفرێد کیسنجر و دواتریش لە وەزیرەکانی تری دەرەوە هەر پەیوەندیی باشیان هەبووە."
ساوما گوتیشی: "لە دوای جەنگی جیهانیی دووەم ئەمەریکا بە شێوەیەکی تەدریجی کەوتە شوێنی بریتانیا لە ڕۆژهەڵاتی ناڤین وەک وڵاتێکی کاریگەر و بەڕاستییش دیپلۆماتکارانی ئەمەریکا و کورد پەیوەندییان هەبووە و ئەمەریکا لە دەستپیکی ساڵەکانی حەفتای سەدەی رابردوو گرینگی بە کورد داوە."
ئەندامی تیمەکەی دۆناڵد ترامپ گوتیشی: "هێزەکانی کورد بە پێشمەرگە و هێزەکانی تریشەوە توانییان بە هاوکاریی ئەمەریکا داعش تێک بشکێنن و ئەمەش هەنگاوێکی گەورەیە."
کاروان باعەدری
