هژماره‌كا سه‌رۆك باژێرڤانیێن پارێزگه‌ها دهۆكێ دێ هێنه گوهۆرین
دهۆک- KDP.info- رێڤه‌به‌رێ گشتیێ باژێرڤانیان ل پارێزگه‌ها دهۆكێ راگه‌هاند، به‌رهه‌ڤی بۆ گوهۆرینا هژماره‌كا سه‌رۆك باژێرڤانیان ل سنوورێ رێڤه‌به‌ریا گشتیا باژێرڤانیان دهێنه كرن.
ئه‌ندازیار دیار به‌حری ره‌سول، رێڤه‌به‌رێ گشتیێ باژێرڤانیان ل پارێزگه‌ها دهۆكێ بۆ ماڵپەرێ فەرمییێ پارتی دیموکراتی کوردستان دیارکر، ل گۆره‌ی بریارا سه‌رۆكێ حوكمه‌تا هه‌رێما كوردستانێ دێ گورانكاری د گه‌له‌ك پۆستان دا هێنه كرن و نوكه ئه‌م وه‌كو رێڤه‌به‌ریا گشتیا ئاماده‌كاریێن خوه دكه‌ین و هه‌لسه‌نگاندنا وان باژێرڤانیان دكه‌ین یێن كارێ خوه ب دروستی ئه‌نجامدای، 47 باژێرڤانی ل سنوورێ رێڤه‌به‌ریا گشتی هه‌نه و هنده‌ك هه‌نه ماوه‌یه‌كێ درێژه د پۆستێ خوه دا ماینه و پێدڤی ب گوهۆرینێ نه.
ئاشكرا ژی كر كو مه‌رج نینه گه‌له‌ك ل سه‌ر پۆستێ خوه مابیت، به‌لێ مه‌رج ئه‌وه كاره‌كێ باش كربیت، ره‌نگه هه‌بن ماوه‌یه‌كێ كورت ژی د پۆستی دا نه، به‌لێ كارێ خوه ب شێوه‌یه‌كێ پێدڤی ئه‌نجام نه‌دایه و یێ سه‌ركه‌فتی نه‌بوویه و نها به‌رهه‌ڤی دهێنه كرن و سه‌رۆكێ باژێرڤانیا زاخۆ ژی دێ هێته گوهۆرین.
ئه‌ندازیار دیار به‌حری ته‌كه‌ست ژی كر كو ئه‌ڤ گوهۆرینێن دهێنه كرن لێكگوهۆرینا سه‌رچاڤان نابیت و هنده‌ك كه‌سێن نوو و خودان شیان دێ جهێ وان گرن.
کاروان باعەدری
