حكوومەت بڕیاریدا لە باج و كرێی دوو مانگی كرێنشینانی خۆشبێت

ھەولێر-KDP.info- ئەمڕۆ پێنجشەممە، وەزارەتی دارایی و ئابووری هەرێمی کوردستان بڕیاریدا بە لێخۆشبونی باج و كرێی دوو مانگی بەهۆی رێككارەكانی خۆپارێزی لە ڤایرۆسی كۆرۆنا بۆ كرێچییەكانی حكوومەتی دەركرد.

لەو نوسراوەدا كە ئەمڕۆ ئاراستەی بەڕێوەبەرایەتیی گشتیی باجەکان و خانوبەرەی میری کراوە، ماوەی چالاکی بۆ بەدەستهێنانی داهات کە دەکەونە ژێرباری وەرگرتنی باج بە هەموو جۆرەکانییەوە بەمشێوەیەی خوارەوە پۆلێنكردوە.

1. خانوبەرەی میری

جێبەجێکردنی بڕگەی 1 و 2 بە بڕیاری ژمارەی 51 لە 05-05-2020ی ئەنجومەنی وەزیران بۆ لێخۆشبونی کرێ و سودی دواکەوتنی کرێچییەکانی موڵکەکانی وەزارەتی دارایی و ئابووری لە بەڕێوەبەرایەتییەکانی خانوبەرەی میری بۆ ماوەی 2 مانگ بەهۆی رەچاوی ماوەی رێکارەکانی خۆپارێزی لە ڤایرۆسی کۆرۆنا لە 11-03-2020 تاوەکو 11-05-2020 کە لەو ماوەیە نەیانتوانیوە بەشێوەی ئاسایی موڵکەکان بەکاربهێنن.

2. سەبارەت بە وەرگرتنی باج بەمشێوەیە دەبێت:

- بەخشینی باجدەران لە سزا و سودی دواکەوتن لە باجدان بەهۆی رەچاوی ماوەی رێکارەکانی خۆپارێزی لە ڤایرۆسی کۆرۆنا ئەگەر ماوەکە کەوتبێتە نێوان 11-03-2020 تاوەکو 10-05-2020.

- درێژکردنەوەی ماوەی دانی قیست بۆ ماوەی دوو مانگ بەهۆی رەچاوکردنی ماوەی رێکارەکانی خۆپارێزی لە ڤایرۆسی کۆرۆنا لە 11-03-2020 تاوەکو 10-05-2020.

- درێژکردنەوەی ماوەی پێشکەشکردنی راپۆرتی باجی لێبڕینی راستەوخۆ بەپێی ئەو رێنماییانەی کە لە وەزارەتی دارایی و ئابووریی دەرچوە. 

- سەرجەم ماوە یاساییەکانی پابەندبونی باجدەر بە رێکارەکانی باج بۆ ماوەی دوو مانگ لە 11-03-2020 تاوەکو 10-05-2020 بەهۆی رەچاوکردنی ماوەی رێکارەکانی خۆپارێزی لە ڤایرۆسی کۆرۆنا.

3. سەبارەت بە وەرگرتنی باجی دەرامەت و کۆمپانیاکان و خانوبەرە بەمشێوەیە دەبێت: 

- باجی دەرامەت و کۆمپانیاکان

پێویستە لەکاتی خەمڵاندنی باجدەران بۆ ساڵی 2020ی دارایی رەچاوی وەستانی چالاکییەکان بکەن بۆ ماوەی دوو مانگ بەهۆی رەچاوی رێکارەکانی خۆپارێزی لە ڤایرۆسی کۆرۆنا لە 11-03-2020 تاوەکو 10-05-2020 واتە ئەو ماوەیە خەمڵاندنیان بۆ ناکرێت.

- باجی خانوبەرە

- لەکاتی وەرگرتنی باجی خانوبەرە و زەوی دەبێ رەچاوی ماوەی رێکارەکانی خۆپارێزی لە ڤایرۆسی کۆرۆنا کە لە 11-03-2020 تاوەکو 10-05-2020 دەستپێدەکات.