هەموو پۆستێك بە قوربانی یەك چركەی سەربەخۆییی كوردستان بێت
شیرین فوئاد مەعسووم*
ئەم حكوومەتە دەمارگیر و تاییفیە و نائازادەی عێراق، دەیەوێت گەلەكەمان و بەرپرسەكانمان بترسێنێت بەوەی تووشی دادگایان بكات وەكو كاك هۆشیار زێباری كاتێك بە ناعەدالەتی لە پۆستەكەی دوور خرایەوە، یان بەڕێز رێبوار تاڵەبانی سەرۆكی ئەنجوومەنی پارێزگای كەركووك كە لەسەر ئاڵادانانی كوردستان دابوویان بە دادگا، رەفزكردنەوەی ریفراندۆمی سەربەخۆییی كوردستان و لادانی كاك دكتۆر نەجمەددین كەریم بە زۆرینەی دەنگی پەرلەمانتارانی شۆڤینی عێراقی، هەمان نموونەی حكوومەتەكانی پێشووی عێراقمان دێنێتەوە یاد.
ئێمەی كورد هەمیشە تامەزرۆی سەرخۆبوون و ئازادی بووین، فێرنەكراوین یەك دڵۆپی خوێنی پیرۆزی پێشمەرگە بە هەموو خۆشییەكانی ژیان بدەین جگە لە سەربەخۆیی نەبێت. كاتێك كە گەلی ئێمە شۆڕش لە دوای شۆڕش بە نەپچڕاوی خەباتی دەكرد نە لەبەر نان بوو، نە لەبەر مووچە بوو و نەلەبەر بوونی ئاو و كارەبا بوو؛ چونكە لە سەردەمەكانی حوكمڕانیی عێراق گەلی كوردستان ئەمانەیان هەموو هەبوو، بەڵام ئێمە خاوەنی ئازادی و ماف و سەربەخۆییی خۆمان نەبووین، بۆیە تا ئەمڕۆیش ئێمە لە هەنگاوەكانی شۆڕش و خەباتكاری داین، ئامانج و سەربەخۆیی پێویستی بە فیداكارییە.
من وەكو كچە پێشمەرگەیەك هیچ رۆژێك لە ژیانی رۆژانەماندا بیرم لەوە نەكردبووەوە فێریش نەكرابووم كە خەباتی گەلی كوردستان بۆ ڤێلا و كۆشكی سەلام و كۆمارییە، فێر كرابووم كە خەباتكارانی وەكو بەڕێز موستەفا بارزانی و باپیرەم مەلامەعسووم نەوەی وەكو باوكم و كەسانی وەكو بەڕێز مام جەلال و سەرۆك بارزانی ئامادە دەكەن بۆ خزمەتكردنی گەل و سەربەخۆییی كوردستان، با لەنێو زیندان بین، بەڵام سەربەرز و ئازاد و خاوەن ئیرادەی خۆمان بین.
هیچ كات و هەرگیز خۆشی و دەستكەوتەكانی ژیان جێگرەوەی سەربەخۆیی و ئازادیی كوردستان ناگرنەوە، لەوەش پشتڕاستم كە سەركردەیەكی دڵسۆز و شۆڕشگێڕی وەكو باوكم، چاوەڕێی بەغدای نەكردووە و نایشیكات تا متمانەی لێ وەربگیرێتەوە وەكو سەرۆككۆمار، بەڵكو لە یەكەمین رۆژی دەستبەكاربوونیەوە وەكو چارەسەرێكی تەنگەژەی سیاسیی كورد ئەم پۆستەی وەرگرت، هەروەك ناسراوە بە رجل الدولە ورجل مواقف الصعبە، بۆیە هەمیشە چاوەڕێی هەڵكردنی گڵۆپی سەوز بووە لە كوردستانەوە نەوەك لە عێراق.
زەڕڕەیەك خاكی وەتەن نادەم بە قەسری قەیسەری.
❊ دكتۆرا لە سیاسەتی ئەمریكا بەرانبەر بە كورد
لە ڕۆژنامەی خەبات وەرگیراوە
