هاوسەنگیی سیاسی و ئابووری
نەورەس ڕەشید
سەردانی رێزدار نێچیرڤان بارزانی سەرۆکی حکوومەتی کوردستان ووشاندی یاوەری بۆ رووسیا و بەشداریکردنیان لە کۆنفرانسی وزە لە شاری سان پترسبۆرگ، پێوەرە بۆ پێگە و سەنگی سیاسی و ئابووریی کوردستان. هەروەها کۆبوونەوەی سەرۆکی حکوومەتی کوردستان و شاندەکەی لەگەڵ سەرۆکی دیپلۆماسیەتی رووسیا دواتر لەگەڵ سەرۆکی بریاردەری دەوڵەتی رووسیا، دوای ئەوەش لەگەڵ دوو ناوەندی ئابووریی بەهێز، پێوەرێکی دیکەیە بۆ پێگە و سەنگی سیاسی و ئابووریی کوردستان.
رووسیا وەک سوپەرپاوەر بە عەیاری قورس لە ڕووی سیاسی و ئابووری و سەربازییه‌وه بریار ئەدات. گەڵاڵەنامەی رێکكەوتنی ئابووری و واژۆکردنی لەنێوان رووسیا و کوردستان وەک کیانێکی سیاسیی خاوەن بڕیاری سەربەخۆ، پایەی سیاسی و ئابووریی کوردستان بەهێزتر و فراوانتر دەکەن، رووسیا بۆ مجامەلە و فێڵکردن رێكکەوتنی ئابووری لەگەڵ هەرێمێکی ئابڵۆقەدراودا ناکات، گەر هەرێمەکە لە ناو هاوکێشەی سیاسی و ئابووریدا ڕۆڵی دیار و، سیاسەتی ستراتیژی سەربەخۆی نەبێت.
سەردانی شاندی حکوومەتی کوردستان بۆ رووسیا، جێگەی دەستخۆشی و پیرۆزباییە. ئەوانەی لە کەناری سەنگەرەکانی دوژمنان و داگیرکەرانی کوردستان بوونەتە ئامرازی پرۆپاگەندە دژی حکوومەت و سەربەخۆییی کوردستان با بزانن کوردستان لەناو بازنەی هاوپەیمانی ئەمەریکا و بەرەی رووسیادا لایەکی نەگرتووە و لایەکەیتر بەربدات، بەڵکو هەردوو جەمسەرەکەی گرتووە و خۆی پێوە گرێداون، کە مانا و ناوەرۆکی ستراتیژیی هەیە. ئەوانەیشی لە ناو حزبەکانن لە ئەندامانی مەکتەبی سیاسی و بەناو پەرلەمانتارن کە دەڵێن ئاگامان لە سیاسەتی نەوت نییە شەرمەزارییە بۆیان لەمەودوا ئەو لێدوانانە دووبارە بکەنەوە، قوباد تاڵەبانی لە تەنیشت نێچیرڤان بارزانییەوە چیی دەکات، ئەوبێ ئاگایە یان ئێوە بێ ئاگان؟.
