كاك جەمیل بایك، پارتی شنگالی لە داعش ستاندەوە
مەحموود محەممەد
زۆرجار لە شەڕێكدا هەلومەرجەكان هاوكار نابن و پاشەكشێی كاتی یاخود شكانیش روودەدات، بەڵام بە پلان و هێز و توانایەكی نوێوە بەرەنگاری دوژمن دەبیتەوە و سەركەوتوو دەبیت.
ئەوەی لە شنگال روویدا، نەخوازراو بوو، بەڵام روویدا، لە زۆر شەڕی گەورەدا دەوڵەت هەبوون سەرنەكەوتوون بەڵام تەسلیمی دوژمنیش نەبوون و دواتر تۆڵەی كراوەتەوە. ئەگەر (كاك جەمیل و كاك رەزا و كاك مراد) نەختێك خۆیان زەحمەت بدەن و مێژووی چەند وڵات و چەند شەڕێك لە ئەوروپا و له ئاسیا بخوێننەوە، زۆر بابەتی لەم چەشنەیان دێتە بەرچاو.
بەڵێ كارەساتێك لە شنگال روویدا، بەڵام پەیمان درا و شنگال ستێندرایەوە، سەرەڕای شنگال تەواوی ناوچەكانی دیكەی كە سوپای عێراقی بەجێی هێشتبوون، هێزی پێشمەرگە لە داعشی پاككردنەوە.
دەبوایە كاك جەمیل ئەو هەموو سەركەوتنانەی هێزی پێشمەرگەی كوردستانی هەر لە خانەقین و جەلەولاوە تا كەركووك و مەخمور و دەشتی نەینەوا، نادیدە نەگرتبایە و تەنیا باسی شكانێكی نەكردایە! هەرچەندە ئەویش و حزبەكەشی قەت چاوی بینینی سەركەوتن و پێشكەوتنەكانی حزب و پارچەكانی دیكەی كوردستانیان نەبووە و لەمەو دواش چاوەڕوان ناكرێت لە رابردوو و ئێستایان باشتربن.. ئەگەر بەگوێرەی تیۆریەكەی هاوسەرۆكی (كەجەكە) بێت، كە ئەگەر هێزێك لە شەڕێكدا سەركەوتوو نەبوو، ئیتر پاش ئەوەی دوژمنەكەشی تێكشكاند و دەری پەڕاند مافی بەسەر ئەو شوێنەوە نامێنێ! دەبێ بەو بەڕێزە بڵێین: خۆت و حزبەكەت لە كوێوە هاتوون و ئێستا لەكوێن؟ سەرتاسەری ژیانی سیاسی و عەسكەریتان شكست و هەڵاتن بووە، دواتریش نەتان توانیوە نزیكی ئەو شوێنانەش ببنەوە كە لەشەڕدا شكاون و لێیان هەڵاتوون، كەواتە بە چ حەقێك تەدەخولی چارەنووسی باكوری كوردستان دەكەن كە سەدان كیلۆمەتر لێی دووركەوتونەتەوە و هەڵاتوون و لە شوێنێك گریساونەتەوە كە هێزی پێشمەرگەی كوردستان و خەڵكی شوڕشگێڕی باشووری كوردستان لە پێناوی رزگاركردنیدا دەیان ساڵ شەڕی بۆ كردووە و قوربانی بۆداوە و ئازادی كردووە، لە كاتێكدا ئێوە ناوتان لە كولەكەی تەڕیشدا نەبووە؟!
كەواتە ئێوەش بۆتان نییە باسی ئامەد و جزیرێ و وان و گەڤەر و... هتد بكەن، چونكە نە لەشەڕ و نە لە سیاسەتدا سەركەوتوو نەبوون و شكاون و لێیان هەڵاتوون. ئەوەی تۆ و هاوكارانت "رەزا ئاڵتون و موراد قەرەیلان" دەیڵێن تەنیا و تەنیا خاڵ بەخاڵی شەڕی بە وەكالەت و رێگاگرتنە لە پێشكەوتنەكانی خەڵكی هەرێمی كوردستان. ئەوان زیرەكن و بە ئێوەی دژ بەكوردی دەكەن!
ئێمەی خەڵكی هەرێمی كوردستان خەریكی شتی گەورەین و ئێوە خەرێكی شتی بچوك، ئێمە خەریكی سەربەخۆیی كوردستانین و ئێوە خەریكی كانتۆن و جیاكردنەوەی شار و شاخەكانی كوردستانن. ئێوە مادام موهیممەتان بوەتە بەرگری لە توركیا و عێراق و ئێران و سوریا، خۆ حكوومەتەكانی ئێستای ئەم چوار وڵاتە زۆر بەتواناتر لە ئێوە پارێزگاری لە یەكپارچەیی وڵاتەكانیان دەكەن. پرسیار لێرەدایە: ئەو هەموو كوڕ و كچە گەنجەی كورد بۆ بەكوشت دەدەن و چۆن خەڵكی باكوری كوردستان لێتان قبوڵدەكەن، ئایە پڕۆژە و ئەجێندای ئێوە لە پڕۆگرام و ئەجێندای ئەو ولاتانە باشترە؟ لە موئەسەساتی سیاسی و یاسایی و عەسكەری ئەو وڵاتانە دڵسۆزترن بۆ دەسەڵاتەكانیان.!
رەزا ئاڵتون گوتەنی، رۆژهەڵاتی ناوەڕاستی دیموكراتی دروست دەكەن! ئەدی هەر ئێوە نەبوون باسی دەوڵەتی گەورەی كوردستانتان دەكرد كە لە هەر چوار پارچە پێك بێت و حزب و لایەنەكانی دیكەتان بە پاشڤەرۆ لەقەڵەم دەدا كە باسی ئۆتۆنۆمی و فیدراڵیان دەكرد؟ ئێستا كە خەڵكی هەرێمی كوردستان هەلومەرجەكان بە لەبار دەزانن و زەمینەی سەربەخۆیی_یان سازكردوە، بۆ بوونەتە دڕكی بەرپێی ئەم پێشكەوتنە و هاتنەدی ئاواتی لە مێژینەیان؟ راستە وەكو میزی حوشتر بەرەو دواوە گەڕاونەوە، بەڵام هێزی گەلی كوردستان لە پێشڕەوی دایە و بە ئێوە و ئاغاكانتان رێی لێ ناگیرێ.
كاك رەزا، باس لە گەمارۆی سەر بارزانی و پارتی دەكات! خۆتان هەڵخەڵەتاندووە، ئەو كوڕ و كچە كوردانەی بۆ كوردایەتی و بەدەستهێنانی مافی نەتەوایەتییان چەكیان هەڵگرتووە هەڵمەخەڵەتێنن، بارزانی و پارتی بە ئێوە و ئەوانەی باسیشتان كردوون گەمارۆ نادرێن.
پارتی نە بڕیاری هەیە و نە پێویستی پێیەتی حزبەكەی ئێوە لەناو بەرێت، یەكێك لە شتە باشەكانی پارتی ئەوەیە كە گرێی دەرونی نییە، چونكە بۆ بەدیلی هیچ حزب و لایەنێك دروست نەبووە، ئەوە خەڵكی دیكەیە خۆی رزگار نەكردووە لەو بەدیل بوونە و هەر لە سەرەتای دامەزراندنیانەوە ئەو گرێ دەرونیەیان هەیە. مانەوە و نەمانەوەی حزبەكەتان پەیوەندی بە خەڵكی باكوری كوردستانەوە هەیە نەك ئێمەی خەڵكی هەرێمی كوردستان.
زۆر سەیرە كاك جەمیل و سەركردایەتیی pkk باوەڕیان بە خەباتی نەتەوەیی و دەوڵەتی نەتەوەیی و سەربەخۆیی نەتەوەكان نییە كەچی بەستنی كۆنگرەی نەتەوەیی بە پێویست دەزانن! بۆچی؟ بۆئەوەی هەرچی لەهەرێمی كوردستان بەدەست هاتووە و دروست كراوە هەڵوەشێتەوە لە دامودەزگاكانی شەرعی و یاسایی، لە جێگای ئەواندا دوو ئەنجوومەن دروست بكرێن: "ئەنجوومەنی سیاسی" و "ئەنجوومەنی عەسكەری"... سەرۆكایەتیی هەرێم و پەرلەمان و حكوومەت و وەزارەتی پێشمەرگە و تەواوی دامودەزگاكانی كە تاوەكو ئێستاpkk ئیعترافی پێنەكردوون، لەكار بخرێن و جەنابیان بێنە سەر ئەو حازریەی كە بەخوێن و خەبات بەدەست هاتووە.!
هەر یەكەتان قسەیەك دەكەن! تۆ دەڵێی: بۆیە لە شنگالین تا خەڵكی شنگال خۆ بەڕێوەبەری دروست بكەن (كە ئەمەیان پەیوەندی بە ئێوەوە نییە، ئەوە خەڵكی شنگال و هەرێمی كوردستانن بڕیار لێ دەدەن)، لەولاشەوە رەزا ئاڵتون راستییەكەی دەڵی كە هیچ پەیوەندی بە خەڵكی شنگالەوە نییە، دەڵێ: بارزانی و پارتیمان گەمارۆداوە لە شنگالەوە تا مەخمور.
هەڕەشەكانتان روون و ئاشكران و هەوڵەكانتان بۆ رێگا گرتنە لە سەربەخۆیی كوردستان، بەڵام دڵنیابن بە هیمەتی كوڕ و كچانی هەرێمی كوردستان كە قۆناغ بە قۆناغ هەر لە لامەركەزی و ئۆتۆنۆمیەوە تا فیدراڵی، هەزاران شەهید و قوربانیان داوە، تەحەمولی كیمیا باران و ئەنفال و راگواستن و گۆڕە بەكۆمەڵەكان و وێرانكردنی شار و لادێكانیان كردووە و سەربەرزانە بەشێكی زۆری مافەكانیان بەدەست هێناوە، بۆ سەربەخۆیی لە هیچ شتێك درێغی ناكەن و سەركەوتووش دەبن، پەشیمانیش بۆ ئێوە و ئەوانەی دنەتان دەدەن دەمێنێتەوە.
2 ی نیسانی 2017
