كارتێكرنا ژیریا بكوم دجڤاكى دا
به‌شار كیكى
راڤه‌كرنا ژێریا بكوم بۆ سه‌ركێشیا كارتێكرنا جڤاكى یا سرۆشتى د جڤاكێن نه‌سه‌قامگیردا كو پێدڤى ب ئیراده‌كا و هێزه‌كا ناڤخۆیى یا ساخله‌م و نوژه‌نكرنا پێزانینێن كاریگه‌ر و پێشكه‌فتى هه‌مبه‌رى وان كارتێكرنێن هنده‌ك شرۆڤه‌كاران كو ب كارتێكرنا هزرێن توندڕه‌و و تێكده‌رانه هاتینه فرشكرن، ب ئارمانجا راستڤه‌كرنا وان ل سه‌ر رێڕه‌وا دروست كوده‌رئه‌نجامێ سه‌قامگیرى و ئاشتى و ره‌تكرنا جوداهیێ یه، ئه‌ڤ پرۆسه نه‌یا ب سناهیى یه هه‌ر وه‌كى دبینن و ئه‌و پێدڤى ب هه‌بوونا كار و بزاڤین چالاك ل سه‌ر كه‌توارى هه‌یه، وێ پێدڤى ب گوهورینا رێكخستنا گۆینا زانینێ هه‌یه كوهه‌تا نها هێش ده‌زگه‌هێن فێركرنێ د هه‌موو لقێن خودا پشتبه‌ستنێ ل سه‌ر دكه‌ت، هه‌ر بگره ژ سه‌ره‌تایێ وهه‌تا دگه‌هێته جهێن پێشكه‌فتى، هه‌روه‌سا رۆلێ مه‌زن و گرنگێ راگه‌هاندنێ د سه‌ركێشا هزرێن هه‌ڤدژ و تێكده‌رانه دا كو ب هه‌ر ره‌نگه‌گێ هه‌بیت دبیته هوكارێ په‌یداكرنا ره‌وشه‌كا ئالۆز د ناڤ جڤاكى دا ناهێته ژبیركرن، كو جڤاكى ب نه‌چارى ڤه ده‌ستان بۆ داهێلیت و به‌رب دیارده‌كا به‌ربه‌رلاڤه ببه‌ت، له‌ورا یا پێدڤیه ل سه‌ر مه پێداچوونا دده‌زگه‌هێن فێركرن و وه‌رگرتنێ دا بكه‌ین كو جڤاكێ مه دڤى بیاڤى دا پشتبه‌ستنا خۆ لسه‌ر دكه‌ت.
لڤێره بۆ مه دیار دبیت مه هزر د چه‌وانیا نووكرنا میكانیزمێن ره‌وشه‌نبیریه‌كا ساخله‌مدا نه‌كرینه، و مه پشتبه‌ستن ل سه‌ر رێكێن سه‌ركه‌فتى بۆ هزر سه‌ركێشیا جڤاكى نه‌كرینه، ده‌رئه‌نجام ژى ئه‌م كه‌فتینه دخه‌فكا ڤه‌گه‌ریانا بۆ پاشڤه ل جهێ ئه‌م پێنگاڤان بۆ پێشڤه بچین، له‌ورا پێدڤیه ئه‌م ل هنده‌ك ده‌رگه‌هێن دیێن وه‌رگرتنێ یێن جودا ژ وان ده‌رگه‌هێن به‌رى نها مه پشتبه‌ستن ل سه‌ر كرین بۆ وه‌رگرتنا پێزانیان ب گه‌رین، یان ژى هه‌ر چو نه‌بیت دلیڤێ بۆ رێكخراو و ده‌زگه‌هێن مرۆڤایه‌تى یێن دڤى بیاڤى دا كاردكه‌ن بۆ بهێته روخساندن ب مه‌ره‌ما به‌رفره‌هكرن و ئه‌نجامدانا كاره‌كێ باشتر.
پێدڤیه ئه‌م ل شاشى و ئه‌گه‌رێن بابه‌تى ده‌ستنیشان بكه‌ین كو بوینه سه‌ده‌ما ڤێ هه‌موو تێكدانێ ل ده‌ڤه‌رێ و چاره‌كرنا ب چاره‌سه‌ریه‌كا سه‌اخله‌م بكه‌ن، پێداچوونا ل گه‌ل خۆ بخۆ بكه‌ین و هزره‌كا به‌رۆڤاژى بكه‌ین و به‌رب هزرێن به‌رته‌نگ و توندڕه‌و ڤه نه‌چین كو به‌رى نها ئه‌م به‌رب كه‌ندالێ هه‌ڤڕكیان برین و ئه‌م ژ پێشڤه‌چوونا زانستى یا جڤاكێن پێشكه‌فتى پێگه‌هشتین دووركرین، ئه‌م دزانین جڤاكێ مه نه‌یێ خرشه و خودان شیان و یێن ژ هه‌ژى بۆ هندێ رێیا راست مه ده‌رابز بكه‌ن هه‌رده‌م تێدا هه‌نه كو مه ژ قرێژ و گه‌مارا توندڕه‌وى و نه‌زانین و تێكدارنێ قورتال بكه‌ن .
دووركه‌فتنا ژ هه‌ستێن توڕه‌بوونێ و نه‌ڤیانێ و كه‌رب و كینێ و حه‌زا كه‌سوكى دێ مه به‌رب جیهانه‌كا به‌رفره‌ها دوور ژ هه‌ڤڕكیێن سه‌رنه‌كه‌فتى به‌ت، كو هه‌رده‌م مرۆڤێ ساده دبیته قوربانیێ وێ و بهایێ وێ مرۆڤێن بێ گونه‌ه ئه‌دا دكه‌ن، ژهه‌ره هوكارێن گرنگێن هاریكار بۆ ڤێ چه‌ندێ پێداچوونا چه‌وانیا په‌یوه‌ندیێن كه‌سایه‌تى ل گه‌ل جڤاكى یه و ره‌تكرنا دوڤچوون و كارتێكرنا نه‌رێنى یا كومێن توندڕه‌و هه‌ر چو ناڤ بۆ هه‌بیت، جه‌ختكرنا ل سه‌ر ئاڤكرنا خویه‌تى و به‌رهه‌ڤكرنا هه‌موو شیانێن پێكڤه‌ژیانا ئاشتى یا ئاڤاكه‌ر كو دبیته ئافراندنا ژینگه‌هه‌كا ب ئێمناهى و ساخله‌م و دروست و دیتنه‌كا راست بۆ نێرینا رۆلێ كه‌سایه‌تى دگه‌ل جڤاكى دا ژ بۆ ئاڤاكرنێ نه‌بۆ هه‌ڕفاندن و ژناڤبرنێ.
پێدڤیه ل سه‌ر مه هه‌موویان ده‌رگه‌هێن ئێمناهیێ و شارستانیێ و كاریگه‌ر بۆ گوهۆڕینا ژیریا ب كوم یا نه‌رێنى بگه‌رین به‌رب ژیریا ب كوما ئه‌رینێ داكو تووشى ئیفلاجێ نه‌بیت و ئه‌م د گێژه‌ڤانكا هه‌ڤڕكیا شه‌ڕ و نه‌زانینێ دا ل دۆر خۆ بزڤڕین، مه‌یدانا شه‌رى ل گه‌ل ژیرَێ ره‌خنه‌گر بۆ ده‌ستنیشانكرنا رێیا راست دژوار نه‌كه‌ین، دڤێت ئه‌م گوهداریا وى بكه‌ین بۆ چاره‌كرنا شاشیان و ئه‌م هه‌موو ده‌بازى كنارێ ئارامیێ ببین، و خۆ لسه‌ر پێن خوه بگرین ل سه‌ر ئاخه‌كا بهێز كو هه‌موو پێكهاتێن جڤاكى ب ئاشتى و به‌خته‌وه‌رى و پێشڤه‌چوون تێدا به‌رده‌وام بژین، ده‌رئه‌نجامێ وێ ئافراندنا هه‌ڤسه‌نگیێ د پرۆسیسا ژیانێ دا كو كارتێكرنا نه‌رێنى ل سه‌ر ژێیاتیا مرۆڤى نه‌كه‌ت، ل گه‌ل پاراستنا خویاتیى ژ ب سه‌رداچوونێ بۆ رێكێن ب ئاسته‌نگ و نه‌خۆشى كو ل دووماهیێ ئێمناهى بۆ په‌یدا نه‌بیت.
*سه‌رۆكێ جڤاتا پارێزگه‌ها نه‌ینه‌وا
