(بارزانی لە روانگەیەکی کوردستانییەوە).. لێگەڕێن با بارزانی رەسالەتی مێژوویی خۆی تەواو بکا

حوسێن یەزدانپەنا

لەم بابەتەدا، تێکەڵ بە ململانێکانی تایبەت بە باشووری کوردستان لە سەر دەسەڵاتی سیاسیی هەرێم نابم. ئەوەی مەبەستمە نۆڕین لە بارزانی بە پێوەری بایەخ و بەرژەوەندییە نەتەوەییەکانە:
1- ئەوەی لەم رۆژگارە و لەم ئاستە لە بەرپرسایەتی سیاسیی و حقووقیدا، بڤەی باس و تێکۆشان بۆ سەربەخۆیی و بەدەوڵەتبوونی کوردستانی شکاند، مەسعوود بارزانی بوو. بارزانی لە وەدیهێنانی ئەم ئامانجەدا راستگۆیە و ئەگەر لێیگەڕێن، لە داهاتوویەکی نە زۆر دووردا، وەدیی دێنێ.
2- ئەو سەرکردە سیاسییەی بە ئاشکرا، باسی لە هەڵوەشاندنەوەی سنوورە دەستکردەکان و مافی یەکگرتنەوەی کورد و کوردستان کردووە، هەر ئەو و نموونەی دڵخوازیشی یەکگرتنەوەی ئاڵمانیا و جیابوونەوەی چێکۆسڵۆڤاکیا لە یەکتر بووە.
3- هێما نەتەوەییەکان و یادگارە بە نرخەکانی کۆماری کوردستان: پێشمەرگە، ئاڵای کوردستان و سروودی ئەی رەقیب، مەسعوود بارزانی لە عێڕاق و لە باشووری کوردستان و هەرێمی کوردستان، لە هەڵوەشان و شاردنەوە و لابردن، پاراستنی.
4- لە سەرکردەکانی ئەم قۆناغەی بزووتنەوەی کورد تەنیا مەسعوود بارزانیم پێ شک دێ، بەرانبەر بە دەسەڵاتی بە هێز و گەورەتر لە خۆی، بزانێ بڵێ: نا. ئەو نەیهێشت پۆل بریمەر، کڵاوی "فیدرالیزمی پارێزگاکان" بکاتە سەر کورد.
5- ئەوەی نەیهێشت ئەرتەشی تورکیای دۆستی نازداری ئەمه‌ریکا و تەنیا دەرووی هەناسەی ئەوکاتی هەرێمی کوردستان، لە زاخۆ بپەڕێتەوە و روو لە هەولێر بکا، هەر مەسعوود بارزانی بوو.
6- ئەوەی ئێرانی لە هەرێمی بەر دەسەڵاتیدا، لغاو کردووە و نەیهێشتووە باشووری کوردستان ببێتە باشووری لوبنان، بارزانییە.
7- ئەوەی لە مێژووی کورددا، توانی هەموو حیزبە رکابەر و دەستبەخوێنی یەک سوورەکان لە چواردەوری مێزێک کۆ بکاتەوە و لەسەر خاکی هەرێمێکی بچووک و دەوردروا بە دوژمن، جاڕی کۆنگرەی نەتەوەیی کورد بدا، مەسعوود مستەفا بارزانی بوو.
8- هەر بارزانی بوو کە توانی لە رووداوێکی مێژووییدا، پێشمەرگە بە چەک و چۆڵ و ئاڵای کوردستانەوە، بە سنووری دەوڵەتی تورکیادا، بگەێنێتە کۆبانێ و ئەمه‌ریکا رازی بکا، بە هاواری کۆبانێوە بفڕێ.
9- هەر بارزانییە لە هەرێمە بچووک و گەمارۆدراو بە عارەب و عەجەم و تورکەکەیدا، هەبوونی بنکە و بارەگا و چالاکیی هەموو حیزبە چەکدارەکانی پارچەکانی دیکەی کوردستانی پێهەڵدەگیرێ.
10- لە ناو سەرکردەکانی ئەو وڵاتانەی تووشی "بەهاری عارەبی" بوون، تەنیا سەرۆکی هەرێمی کوردستان بوو، فەرمانی سەرکوتی بۆ لاوانی ناڕازیی هەرێمەکەی دەرنەکرد و زمان و هەنگاوی چارەسەری رەچاو کرد.
بۆیە مەسعوود بارزانی نەک هەر بۆ باشووری کوردستان، بەڵکوو، بۆ سەرجەم کورد، دەرفەتە. سەرکردە سیاسییەکان و تاک و گرووپەکانی کورد دەبێ، کەڵک لەم دەرفەتە وەربگرن. دەنا دانیشتن لە سێبەری سووکی دارەکانی بارزان و ژیان لە پەنای کێلی شێخ ئەحمەد و مەلا مستەفا لە ناو "میللەتی بارزان"دا، بۆ کەسێکی ماندووی، خۆشی لە ژیان نەدیتووی، بە لاوی پیربووی وەک مەسعوود بارزانی، خۆشترە لە رۆنیشتن لە سەر کورسیی قورسی سەرۆکایەتیی وڵاتێکی پڕکێشە و کەلێن و دژبەریی..... لێگەڕێن با بارزانی رەسالەتی مێژوویی خۆی تەواو بکا.

21 پووشپەڕی2715
12ژوولای2015