ئێزدیان پێتڤى ب سه‌رۆك بارزانى هه‌یه
جعفر سمۆ
گاڤا ئه‌م باسێ پۆستێ سه‌رۆكاتیا هه‌رێمێ دكه‌ین، مه‌به‌ست نه‌ئه‌وه كو ئه‌م ب زمانه‌كى پارتایه‌تى دپه‌یڤین، لێ ئه‌ڤه ده‌مه‌كه چه‌ندین لایه‌نێن سیاسى هه‌موو كێشێن كوردستانێ ب تایبه‌ت بارودۆخێ ئیرۆ كوردێن ئێزدى تێرا ده‌رباز دبن ژبیركرینه و هه‌موو خه‌باتا وان تنێ بوویه پرسا سه‌رۆكاتیا هه‌رێمێ.
ئه‌ڤێ چه‌ندێ وه‌كریه كو كوردێن ئێزدى هنه‌كێ ژڤان لایه‌نان بێ ئۆمێد بن، چونكى پرانیا ئێزدیان نها دشینگرتینه و چ مال مالێن ئێزدیان ل ده‌ڤه‌را شنگال نینن كه‌چێن وان یان بووكێن وان دناڤا ده‌ستێ درنده‌ترین رێكخراوا تیرۆرستى دا نه‌ین، باشتر بوو دڤێ قوناغێ دا ئه‌ڤ لایه‌ن پرسا ڤان گرتى و گۆرێن ب كۆمێن ئێزدیان ب ئازرینن و فشارێ ل سه‌ر جڤاكا نێڤده‌وله‌تى بكه‌ن بۆ هندێ ئه‌ڤا ب سه‌رێ ئێ.دیان هاتى وه‌كو جینۆساید بده‌ن ناسكرن.
هه‌گه‌ر ئه‌م ئه‌وێ په‌قینا مه‌زن ئه‌وا ل گرعزێر و سیباشێخدر ل سالا 2007 وه‌كو فرمان ب هه‌ژمێرن، تا نها دبنه 74 فرمان ب سه‌رێ ئێزدیان هاتین، كه واته نیڤا دووێ ژ چه‌رخێ بۆرى و ل گه‌ل سه‌رهلدانا بابێ رۆحیێ نه‌ته‌وا كورد بارزانیێ نه‌مر، ژنوو ئێزدیان هه‌ست ب هه‌بوونا خۆكر كو ملله‌ته‌ك یێ هه‌ى خۆ ب خودانێ ئێزدیان دزانت، ژبه‌ر هندێ هه‌ر زوو پرانیا ئێزدیان به‌شدارى شۆره‌شیێن كوردى بوون، و بارزانى بوو قورتالكه‌رێ ئێش و ئازارێن ئێزدیان، و ژهنگى ڤه ئه‌ڤ مالبات بوویه سه‌ده‌مه‌كا سه‌ره‌كى كو ئێزدى ل ڤى وه‌لاتى بمینن، ژبه‌ر هندى ژى هه‌ر ل ده‌ستپێكا سه‌رهلدانێ سه‌رۆك بارزانى دخرڤه‌بوونه‌كا جه‌ماوه‌رى یه مه‌زن دا ئێزدى ب كوردێن ره‌سه‌ن ئینان زمان.
نها ئاخفتنه‌ك به‌ربه‌لاڤ دناڤا جادا ئێزدیان دا هه‌یه كو تم دبێژن هندى مالا بارزان ل سه‌ر ده‌ستهه‌لاتێ بن مه‌ترسى ل سه‌ر ئێزدیان نینه، وه لێ گاڤا ئه‌و ل سه‌ر كورسیكا ده‌ستهه‌لاتى َنه‌مان هنگێ وێ ترسا ئێزدیان مه‌زنتر به، چونكى بارزانى وه‌كریه پرانیا پێكهاتێن گه‌لێ كوردستانێ خۆ دبن سیبه‌را خیڤه‌تا عه‌داله‌تا وى دا هه‌مبێز بكه‌ن. ئه‌ڤجا ئه‌ڤ راگه‌هاندنا بێ مه‌عنه یا هنده‌ك لایه‌نێن سیاسى ل سه‌ر پرسا پۆستى سه‌رۆكاتیا هه‌رێمێ گه‌له‌ك پێكهات ب ئێكجارى بێ ئۆمێد كرینه، و بتر ژهه‌مووان ئێزدى دمه‌ترسیێ كرینه، ژئالیه‌ك دنڤه هه‌گه‌ر ڤان لایه‌نان به‌رژوه‌ندیا ده‌ستكه‌فتێن كوردستانێ ڤیابا وێ ئه‌ڤ پرس پاشڤه بربانه،چونكى سیاسه‌تا سه‌رۆك بارزانى وه‌كر كو دونیا ل هانا كوردان هات، و هه‌گه‌ر سه‌رۆك بارزانى دڤى قوناغێ سیاسه‌ته‌كا ژیرانه ب كارنه‌ئینابه وێ كوردستان جاردى هه‌رفتبا،و هه‌ر كه‌س ڤێ چه‌ندێ دزانت، گه‌ره‌كه گه‌لێ كوردستانێ قه‌بول نه‌كه‌ت په‌رله‌مان موزایداتان ب ده‌نگێ وان بكه‌ن، بلا په‌رله‌مان وى مافى ژخه‌لكى نه‌ستینت، چونكى هه‌گه‌ر مه‌ره‌مێن خراب نینن، دیاره باوه‌رى ب خه‌لكێ كوردستانێ و ئه‌وێن ده‌نگێ خۆ داینێ نینه.
پێتڤى یه رایه‌دارێن ئێزدى ژى دڤێ پرسى دا بێ هه‌لویست نه‌مینن هه‌ر سه‌ر ب چ لایه‌ن ڤه‌بت، چونكى گاڤا ئێزدى دوپاتیێ ل مانا سه‌رۆك بارزانى دكه‌ن، مه‌ره‌م نه‌ئه‌وه وه‌كو سه‌رۆكێ پارتى ره‌فتارێ ل گه‌ل ڤى بابه‌تى دكه‌ن، به‌لكو ئه‌و درژدن بۆ هندێ تنێ سه‌رۆك بارزانى یه بكارت ڤێ ره‌وشا خراب و ێران یا ئێزدیان چاره بكه.
