قەرز و ریبا
سەلام عەبدوڵڵا
دوابەدوای ئەوەی كە حكوومەتی عێراقی بودجە و مووچەی هەرێمی كوردستانی بڕی، هەموو دەزانین وەزعی حكوومەتی هەرێم و هاووڵاتییان بە چی گەیشت، هەرچەند ئەو راستییەش دەزانین كە خەڵكی كوردستان زۆر خۆڕاگرانە بەرگەی ئەو زوڵمەی گرت و بەرەورووی وەستا كە، مرۆڤ دەتوانی بە شانازییەوە باسی ئەم هەڵوێستە جوامێرییەی بكات.
هەمووش دەزانین كە بیانووەكانی حكوومەتی عێراقی بۆ بڕینی مووچە و بودجە هیچ بنەمایەكی راستی تێدا نییە و تەنها گوشارە بۆ سەر حكوومەتی هەرێم، چونكە وەك دەردەكەوێت بەغدا هیچ خۆشحاڵ نییە بەو بەرەوپێشەوەچوونەی هەرێم لە هەموو بوارەكاندا و بە مەترسی بۆ سەر خۆی راڤە دەكات.
لەگەڵ ئەو خۆڕاگرییەی خەڵكی كوردستانیشدا حكوومەتی هەرێم بە بەردەوامی دەگەڕێ بۆ سەرچاوەیەك بۆ ئەوەی بتوانێت بەبێ حكوومەتی بەغدا مووچەی فەرمانبەرانی هەرێم دابین بكات، هەوڵدان بۆ هەناردەكردنی نەوت لە رێگەی توركیاوە یەكێكە لەو هەوڵانەی حكوومەتی هەرێم، هەرچەند بەغدا تا ئێستا بە هەموو شێوەیەك دژایەتی ئەو پڕۆسەیە دەكات كە دەستوورییە و دەستووری عێراقی پشتیوانی لێ دەكات.
حكوومەتی هەرێم هەر بەوەشەوە نەوەستاوە و ئێستا لە هەوڵی ئەوەدایە كە لە بانكەكانی دەرەوەی وڵات قەرز دابین بكات بۆ ئەو مەبەستە، كەچی سەیر ئەوەیە هەندێك لە ئەندام پەرلەمانی سەر بە حزبە ئیسلامییەكان هەر لە ئێستاوە، دژایەتیی خۆیان بۆ ئەو هەوڵە راگەیاندووە و دەڵێن گوایە لە پەرلەمان دەنگ بەو بڕیارە نادەن، ئەویش بە پاساوی ئەوەی گوایە ئەمە (ڕیبایە)! و حەرامە، وەك ئەوەی ئەوان هاتبنە نێو پەرلەمانی كوردستانەوە بۆ دامەزراندنی جمهوریەتێكی ئیسلامی لەم هەرێمەدا.
جا پاساوێكی تری بێ جێش دەهێننەوە، وەك ئەوەی پەرلەمانتارێكی یەكگرتوو دەڵێ: ئەم قەرزە زیانی هەیە، چونكە دەبێتە بارگرانی بەسەر خەڵكی كوردستانەوە. ئەم قەرزە بە پلەی یەكەم بۆ دابینكردنی بژێوی و مووچەی خەڵك، ئینجا پڕۆژەی ستراتیژی پێ بنیاد دەنرێت، كە دەبێتە مایەی گەشەسەندنی ئابووری لە وڵات، ئیدی بۆ دەبێ ئەم قەرزە ببێتە مایەی زیانی خەڵكی.
پەرلەمانتارێكی كۆمەڵی ئیسلامیش وەك خەڵكی ئەم وڵاتە نەبێت و لە كوردستان نەژی دەڵێ: حكوومەت پێویستی بە قەرز نییە؟!!
سەیر ئەوەیە، ئەم قسانە پەرلەمانتاری پەرلەمانی كوردستان دەیكەن، ئەمانە لە چ دنیایەكدا دەژین كە ئاگایان لە وەزعی وڵاتەكەیان نەبێ.
لە كۆتاییدا دەڵێم: حكوومەتی هەرێم بەنیازە لە وڵاتانی رۆژئاوا، 5 ملیار دۆلار قەرز بكات، بۆ ئەم پەرلەمانتارە ئیسلامییانە، ئەو خێرە ناكەن لە وڵاتە موسڵمانەكان ئەو (5،000،000،000)ـەمان بەبێ (ڕیبا) بۆ پەیدا بكەن.
