نەوشیروان بۆ خاتری كێ شەڕ بە بارزانی و پارتی دەفرۆشێ؟
دژوار قادر
لە دەسپێكدا دەمەوێ بەوە دەست پێبكەم، كە لە كۆتاییدا دەمەوێ پێتانی بڵێم: نەوشیروان خۆی لە ململانێیەك ئاڵاندووە، كە ئەنجامە یەكلابووەكەی نەك هیچ كاریگەرییەكی نەرێنی بەسەر ژیانی سیاسی پارتی و خانەوادەی بارزانییەوە نابێت ، بەڵكو بە كۆتایی ژیانی سیاسی بزووتنەوەكەی خۆی تەواو دەبێت.
لە شەڕدا ترسنۆكەكان هەمیشە خۆیان دەدەنە پشتەوە، لە سیاسەتیشدا بەهەمان شێوە فاشیل و نا نیشتمانییەكان بە هێنانەوەی پاساوی نا واقیعی خۆیان لە هەر كۆدەنگییەك دەدزنەوە، كە بۆ بابەت یا كێشەگەلێكی دیاریكراو یا جێگیر دێتە دروست بوون. لە دنیای سیاسەت، ئەم حالەتە دوو خوێندنەوەی بۆ دەكرێ: یا ئەوەتە ئەو هێزە وابەستەی ئەجێندایەكە خۆی دەستی لە داڕشتنیدا نییە، بەلكو بۆی ئامادەكراوە و تەنها جێبەجێی دەكات، یا هێزێكی رووخاوە و دژی بەشداری كردن و داڕشتنی هەر بەرنامەیێكە، كە بەهۆیەوە سەركەوتن بەدی دێت.
لەبەر یەك هۆی سادە و ساكار بە هیچ شێوەیەك وەڵامی ئەو قسە دوور لە راستی و كات نەگونجاوانەی نەوشیروان مستەفا رێكخەری گشتی بزووتنەوەی گۆڕان نادەمەوە، كە لە دوا دیمانەیدا لە تەلەفزیۆنی كەی ئێن ئێنی زمانحاڵی بزووتنەوەكەیدا كردنی، چونكە پێموایە ئامانجی دیدارەكەی بۆ هەموو لایەك ئاشكرایە: ئەویش رق و كینەی ئاشكرای ئەو "پیاوەیە" كە بەرامبەر خەباتی خانەوادەی بارزانی و پارتی هەیەتی، دەنا سەرلەبەری قسەكانی لەم بارودۆخە قەیراناویەی ئێراق و ناوچەكە پێدا تێدەپەڕێ بەتاڵن و هیچ ناخەنە سەر خەرمانی خەبات و تێكۆشانی گەلی كورد بۆ گەیشتن بە مافە رەواكانی.
نەوشیروان بۆ گەوجاندنی خەڵك و ئاوەژووكردنەوەی واقیعەكە ئەو رق و كینەی خۆی بەرامبەر ئەو خەباتە بە رەخنە گرتن لە هەندێ بابەت (ناكۆكی نێوان هەولێر و بەغدا، دەرهێنان و ناردنە دەرەوەی نەوت، دامەزراندنی ئەنجوومەنی ئاسایشی كوردستان، بەگژداچوونەوەی پیلانی ئەم و ئەو دەوڵەت) ئاوێتە كردبوو، كە خۆی بەر لە هەر كەسێكی دیكە دەزانێ ئەوانە بەشێكن لەو خەباتەی، كە شێخ عەبدولسەلام بارزانی لەسەرەتای سەدەی رابردوو دەستی پێكردووە و تا بە ئەمڕۆ دەگات بەردەوامە و ئێستاش بەهۆی ئەو گۆڕانكارییانەی لە ناوچەكە روویان داوە و روودەن لە ئامانجە گەورەكە نزیك بۆتەوە.
پێشتر باسمان كردووە و خەڵكی دیكەش، كە بایەخ بە خەباتی كورد لە پێناو مافە رەواكانی دەدەن باسیان لەو راستییە كردووە، كە ئەوە خانەوادەی بارزانی و پارتی نییە بە زۆر خۆی بەسەر بارودۆخەكە سەپاندووە، بەڵكو بەرنامە و پەرۆشی و خەباتە نە پساوەكەیەتی بۆ رزگاری نەتەوەیی وایكردووە میللەت بە فریادرەس لێیان بڕوانی، بە بەڵگەی ئەوەی هیچ كاتێك و لە ژێر هیچ بارودۆخێكدا سازشیان لەسەر مافەكان نەكردووە و ناكات، هاوكات میللەت لە سایەی حكومڕانیاندا ئاسودە و خۆشگوزەران بووە.
كەواتە پەیمانێك لە نێوان میللەت و ئەو دووانە (خانەوادەی بارزانی و پارتی) دا هەیە، كە لە پێناو مافەكاندا یەك بارستەی پتەوە و بە فڕنی خەباتی كوردایەتی جۆشدراوە، بۆیە هەوڵدان بۆ شكاندنی یا سڕینەوەی كارێكە زیاتر لە مەحاڵ دەچێت، مێژووش ئەوەی سەلماندووە. چونكە دوژمنان بە هەموو فۆرم و عەقڵیەتەكانەوە لە مێژە بۆ سڕینەوەی خانەوادەی بارزانی بەختی خۆیان تاقیكردۆتەوە، شكستیان خواردووە. بۆ بە بیرهێنانەوە گرنگ و جێی خۆیەتی ئاماژە بە هەندێكیان بدەین، وەك: هەوڵی دەسەڵاتی عوسمانیەكان، كە بە پیلان شێخ عەبدولسەلام بارزانیان شەهید كرد، دواتر بە تەمەنی سێ ساڵیەوە بارزانی نەمریان لەگەڵ دایكیدا زیندان كرد، هەوڵی هاوبەشی ئینگلیز و حكوومەتی پاشایەتی ئێراق لە سییەكان و چلەكانی سەدەی رابردوو، بە هێرش كردن و بەكارهێنانی هەموو جۆرە چەكێك بۆ سەر دەڤەری بارزان، هەروەها راگواستن و نەفیكردنیان بۆ ناوچەكانی دیكەی ئێراق بە تایبەتی بۆ باشووری عەرەبنشین، هەوڵەكانی رژێمی پاشایەتی ئێران بە بەكارهێنانی هێزی سەرباز و بۆردومان كردنی ماڵ و منداڵ و دروستكردنی تۆڕی سیخوڕی لە ناو شۆڕشی ئەیلوول، هەوڵەكانی حكوومەتە یەك لە دوای یەكەكانی ئێراق هەر لە قاسمەوە تا دەگاتە سەدام و حكوومەتە شڕەكەی مالیكی (كە تاوانەكانی رژێمی شۆڤینی سەدام لە هەموویان دڕندانەتر و قێزەونتر بوون و لە یادومانی زۆرێكمان هەر زیندوون)، هەر یەكەیان بە جۆر و شێوازێك بۆ لە ناوبردن و درز خستنە ریزی گەلەكەمان بەختی خۆیان لە بەرامبەر ئەو خەباتە تاقیكردۆتەوە و تێیدا سەرنەكەوتوون، تازە بە تازە ناسنامە و بەرنامە ئاشكرایەكی (لە لای گەلی كوردستان) وەك نەوشیروان دێت بەختی خۆی تاقی دەكاتەوە، بە راستی مایەی پێكەنینە.
بە مانەیەكی دیكە ئەگەر ئەم (ئەركە!!) بەلای نەوشیروان نوێیە ، بەلای پارتی زۆر كۆنە و ئەزموونێكی دەوڵەمەندیشی لەگەڵیدا هەیە، هەمیشەش ئەو شەڕانە بە بەرژەوەندی پارتی تەواو بوونە، چونكە میللەت پارتی و خانەوادەی بارزانی دەناسێ، كە بۆ بەرزكردنەوەی ئەم میللەتە چ قوربانییەكی گەورەیان داوە و چ بەرنامەیەكی پتەویشیان هەیە. كەواتە لەبەر ئەو وەبیرهێناوەی لە سەرەوە ئاماژەم پێدان و لەبەر ئەو پەیمانەی لە نێوان میللەت و پارتیدا هەیە مەحاڵە ئەو بارستە جۆشكراوە بەكوردایەتی بە كەسێكی وەك نەوشیروان یا چەند فرچكدراوێك بهەژێ.
نەوشیروان، چونكە ئاراستە و قورمیش كراوە و ئەجێندای خەڵكی دیكە جێبەجێ دەكات، تەنانەت نازانێ تەوقیتی هاتنە قسەشی بە سەركەوتوویی هەڵبژێرێ. واتە خۆی لە ململانێیەك ئاڵاندووە، كە ئەنجامە یەكلابووەكەی نەك هیچ كاریگەریەكی نەرێنی بەسەر پارتی و خانەوادەی بارزانییەوە نابێت ، بەڵكو بە كۆتایی ژیانی سیاسی بزووتنەوەكەشی تەواو دەبێت، چونكە ئەو رۆژەی ئەو باسی لە شكستی پارتی و بارزانی دەكرد و تۆمەتی دەدەنە پاڵیان، هەولێری پایتەختی كوردستان بزاوێكی تایبەت بە رەوشی ناوچەكەی لەخۆ گرتبوو، بەیەكەوە كۆمەڵە هێزیك لێرەبوون، كە لە مێژوودا یەكەمجارە كوردستان بەو قوڕساییە لە هەڵسەنگاندنی بارودۆخی تایبەت بە ناوچەكە نەك هەر بەشداری بكات، بەڵكو بە پێچەوانەی كۆبوونەوەكانی كۆتایی جەنگی یەكەمی جیهان، بۆچوون و بەرنامەكەشی بۆ تەناهی و سەقامگیری ناوچەكە حسابی بۆ دەكرێت.
ئەمڕۆ خەڵكی كوردستان زۆر لەو هەشیارترن، بە لێكدانەوەیەكی نا واقیعی نەوشیروان چەواشە بكرێن، لەبەرئەوەی دەزانن لە سەر بنەمای دژایەتی كردنی پارتی و بارزانی سەرچاوەیان گرتووە.
