پەیامێكی پێویست بۆ گۆڕان
سه‌روتاری رۆژنامه‌ی خه‌بات
پارتی دیموكراتی كوردستان خۆی بە داكۆكیكاری یەكڕیزیی ناوماڵی كوردستانی دەزانێت، لە ئاستی هەرێمی كوردستاندا زۆر بە سینگ فراوانیەوە مامەڵەمان لەگەڵ دیاریدەی تەندروستی فرەلایەنی كردووە و دەیكەین.
بوونی ئۆپۆزسیۆنی راستەقینە، كە ئامانجی رەخنە لە پێناو باشتركردن بێت زۆر ئاساییە، بەڵام لە ژێر ناوی ئۆپۆزسیۆنەوە هەنگاونان بە پێچەوتنەی ئاڕاستەی بەرژەوەندییە گشتیەكان نا ئاساییە.
ماوەیەكە هەست دەكەین بزووتنەوەی گۆڕان فراوانتر و ئاشكراتر بەشێوەیەكی ناڕەوا دژایەتی پارتی دەكات، وەك پارتی دەستی دۆستایەتیمان بۆ گشت لایەك درێژ كردووە، هەوڵمانداوە رینە كۆنەكان هەڵنەدەینەوە و بەرەو ئایندە هەنگاو بنێنین، لەگەڵ بزووتنەوەی گۆڕانیش زۆر هەوڵی نزیكبوونەوەمانداوە. لە پێناو لێكتێگەیشتن و یەكڕیزیی ناوماڵی كوردستانی لەلایەن بەڕێزان جەنابی سەرۆكی پارتی و جێگری سەرۆكی پارتی و مەكتەبی سیاسیمانەوە زۆر هەوڵ هەبووە بۆ كرانەوەی زیاتری نێوان گۆڕان و پارتی، هیچ كاتێ نەمانویستووە لە پرۆسەی سیاسیدا لاتەریك بكرێن، هەوڵماندا بەشدار بن لە حكوومەت و بەڕێوەبردنی وڵاتدا، هەوڵماندا لە گشت كۆبوونەوەكانی لایەنە سیاسیەكانی هەرێمدا بەشدار بن وكاریگەرییان لەسرە چۆنیەتی هەنگاونان و ئاڕاستە كردنی پرۆسەی سیاسی هەبێت، بەڵام ئەوان هەمیشە خۆیان دزیوەتەوە، لایەنەكانی دیكەی ئۆپۆزسیۆنیش لە مەیدانی سیاسیدا هەن و هیچ كاتێ نە داواكراوە و نە هەوڵداروە پاشكۆی هیچ لایەنێك بن، بەڵام بەشداریی كارایان لە كۆڕ و كۆبوونەوە پێویستیەكاندا كردوو و ڕای تایبەتی خۆیان هەبووە، ئەوەی لە بزووتنەوەی گۆڕان بەدیكراوە دژبوونی پێشوەختەیە بەرامبەر بە هەر شتێك.
لە پەرلەماندا هێشتا پرۆژەیاساییەك خوێندنەوەی بۆنەكراوە گوێ ناگرن و دەست بە تەپڵ لێدان دەكەن و ئەوجا دوای تێپەڕبوونی پرۆژەكە دێن و لە دەرەوەی پەرلەماندا خوێندنەوەی بۆ دەكەن. بانگهێشتی كۆبوونەوەی لایەنە سیاسیەكان دەكرێن و بە بایكۆتكردن وەڵامدەدەنەوە، ئەوجا دێن باس لەتاكڕەویی و دوورخستنەوە و بەشداری پێنەكردنیان لە سازدانی بڕیاری سیاسیدا دەكەن.
ئێمە وا هەست دەكەین كە بزووتنەوەی گۆڕان دژی هەر كۆدەنگیەكی نیشتمانییە، ئەمەشیان زیانی بۆ بەرژەوەندییە نیشتمانییەكان هەیە، ئەوەی گۆڕان هەوڵی بۆ دەدات تێكدانی یەكڕیزییە، ئۆپۆزسیۆن بوون و تێكدانیش دوو شتی جیاوازن.
هەستمان بەوە كردووە، كە ئەم هەڵوێستانەی گۆڕان لەیەك فاكتەرەوە سەرچاوەی گرتووە، ئەویشیان دژایەتی پارتی و بارزانی-یە. ئەوان بڕیاری پێشوەختەیان هەیە بۆ دژایەتی هەر هەنگاوێك كە چ لەلایەن پارتیەوە یاخود بەهاوبەشی لەگەڵ لایەنەكانی دیكە نرابێت.
وەك پارتی ئەو پەیامەمان بۆ گۆڕان هەیە، گەر ئەوان ئۆپۆزسیۆنن، چەمكی ئۆپۆزسیۆن بوون ڕوون و ئاشكرایە و گرفتمان لەگەڵ ئەم چەمكە نییە، بەڵام گەر ئەوان ئەرك و ئامانجی خۆیان تەنیا بە دژایەتی پارتی و بارزانی پێناسە دەكەن و تا ئاستی تێكدان و پیلانگێڕی نهێنی و ئاشكرا، ئامادەن بەرژەوەندییە گشتیەكانیش لە پێناو ئم ئامەنجەیان بخەنە مەترسیەوە، ئەوا لێیان قبوڵ ناكرێت و هەڵوێستمان دەبێت.
ئێوە فریشتە نین و كارنامەكەتان ئاشكرایە و ناتوانن خەڵك چەواشە بكەن، هەورازێكی سەختتان گرتۆتەبەر و خەڵكانێكی زۆر خۆیان تاقیكردۆەتەوە و سەرنەكەوتوون، ئێوەش سەرناكەون.
