چما بارزانی؟ ژ نڤیسینا: کیفاح مەحمود کەریم

   دەما ئەم بەحسی مستەفا بارزانی یێ نەمر دکەین، ئەم بەحسی ئێک ژ مەزنترین سەرکردەیێن شورەشان ل جیھانێ دکەین، ئەو سەرکردەیێن دەست ب پێڤاژوویا خۆ ژبۆنا ئازادی و رزگاربوونێ کرین پشتی جەنگێ جیھانی یێ دوویێ و ئەو دەرئەنجامێن ژێ جەنگێ جیھانی یێ ئێکێ بەرپا بووین مینا رێککەفتن و دابەشکرنێن ستەمکارانە لسەر نەخشەیێ رۆژھەلاتا ناڤین و میراتگریا ئیمپراتوریا عوسمانی و چەوساندنەکا زۆر بۆ مافێن چەندین مللەتان. بارزانیێ نەمر ب سەرکێشیکرنا باشترین دەستبژێر ژ ھەڤال و رێبەندێن ریچبازا خۆ بەرخۆدانا خۆ ژبۆ پرۆژەیەکێ نەتەەیی یێ مەزن ل نیڤا دوویێ ژ سالێن چلان ژ چاخێ بووری دەست پێکر و دنیڤ دلی رۆژھەلاتا ناڤین دا و دناڤبەرا چار دەولەتێن  خاکا کوردستانا خەونا ھەرکوردەکی داگیرکری. پێڤاژوویا بارزانیێ نەمر نەبتنێ ھەوەکا قورتالکرنێ یان  ھێزەکا پشتەڤانیێ بوو ژبۆ ئاڤاکرنا کومارەکێ ل رۆژھەلاتا ناڤین بەلکو پتر پروسەیەکا دیروکی بوو بۆ لڤاندن و بزاڤتنا کەلتوورەکێ کەلەکەبوویی یێن سەدان سالان ژ پاشگوھکرن و پەراوێزکرن و بوھشتنێ، و لێکەڕیان ژ جھەکی لژێر رۆژێ ل ڤێ جیھانا نوی پشتی راوەستیانا جەنگێ جیھانی یێ دوویێ و دابەشبوونا ئەردێ وەلاتی لسەر عیراقێ و تورکیا وسوریا و ئیرانێ.

     ئەڤ پێڤاژوویا بارزانیێ نەمر گاڤا ئێکێ بوو بەرەف گەلالەبوونا پەیرەوەکی بو مللەتی ژبۆ ھشیاربوونێ و دەربازبوونێ ژ بێدەنگی و ڤەدەربوونێ و ژ کەلتورێ ناوچەگەری و میرنشینی و عەشیرگەریێ بەرەف پروژەیەکێ نەتەوەیێ یێ سەردەمیانە کو ھەمبێزا روحەکا بلندا خەباتێ و بەرخۆدانێ بکەت و ب ھەلسوکەفتەکەکێ ھەڤچەرخ و پێشکەفتی ل سەرەدەریکرن و دانوستاندنێ لگەل ئەلەمەنتێن پرسا کوردی. ھەروەھا بارزانیێ نەمر زەمینە خۆشکر ژ چەوانیێ سەرەدەریکرنێ لگەل دوژمنی و داکوکیکرنێ لسەر ھندێ کر کو ھەڤڕکی و ململانێ نەلگەل نەتەوێن عەرەب و تورک و فارسە بەلکو ھەڤڕکی یەکە لگەل وان رژێمێن سیاسی یێن ستەمکار یێن کو حوکمرانیا وان نەتەوان دکەن.

     لگۆڕ ڤان پرەنسیپ و بنەمایێن شکودار بارزانیێ نەمر بناغە و بنواشە بۆ پروژەیێ خۆ یێ مۆرالی و شارستنا دانا داکو مللەتێ خۆ پێ ھشیار و ب ئاگەھـ بکەت ژبۆ رزگاربوونێ ژ ستەما سیاسی و جڤاکی و عەشیر گەری و چینایەتی لەوما ھەمی تەخ و توێژێن جودا جودا یێن جڤاکی لدوور خۆ کومکرن و ھەڤبەندیێن مرۆڤایەتی و تەبایی دنێڤبەرا واندا بەربەلاڤکر. بارزانیێ نەمر ھەردەم دەرگەھـ بەرین ژبۆ دیدار و گفتوگو و دانوستاندنان و قبوولکرنا یێ دی ھەتا کو نەیار ژی بیت ڤەکری ھێلا بوو.. بارزانیێ نەمر ھەردەم بۆ پێشمەرگە و سەرکردێن خۆ شروڤە دکر و دگۆت کو ئەوێ ئەڤرۆ جەنگێ لگەل ھەوە دکەت نە دوژمنە لێ یێ ناچار و مەجبوورە و سوبەھی دێ بیتە ئیخسیرێ ھەوە و دڤێت ھوین وەکو برا و ھەڤال بن لگەل وان. دیسان پێشمەرگێن قەھرەمان ھان ددان کو مەردایەتی و مێرخاسی ئەوە کو تۆ رێزێ ل ئیخسیری بگری و وەک مێڤان رەفتاریچ لگەل بکەی، و داخواز دکر کو ھەر دەم ددویر بن ژ کوشتن و تیرور و کوشتنا کەسیچن سڤیل ژبەرکو وان چ پەوەندی ب ھەڤرکی یێ ڤە نینە، و پەرپرسیاریا مە بتنێ بەرەڤانیکرنە ژبۆ پاراستنا ناسناما مللەتی و بجھئینانا ئازادیێ و بەرجەستەکرنا شەنگستێن ھەڤگەھشتن و تەبایی و پێکڤەژیانێ ل وەلاتەکێ ئازاد و دیموکراسی کو رێز ل مرۆڤان بھێتەگرتن. بڤی گیانی بارزانیێ نەمر دەست ب پرۆژەیێ خۆ یێ نەتەوەیی و نیشتیمانی و مرۆڤپەروەری کر کو یێ ئاڤاکری بوو لسەر رێکخستیەکا مۆرالی بۆ دۆزا مرۆڤایەتیێ بگشتی و دۆزا رەوایا کوردینیێ بتایبەتی و مافێن مرۆڤان ل ھەر جھـ و سەردەمەکی. ھەر ب وی پەیرەوی کوردستانیان ب تەمامی و نەمازە مللەتێ کورد.. گەلەک ژ ئارمانجێن خۆ ب دەستڤەئینان پشتی سەرھەلدانا پیروزا بھارا 1991ێ ..

     ئەڤ دەستکەفت و بەرھەمێ ئەڤرۆ ژ رەنج و بەرکارێ وێ دارێ یە یا کو بارزانیێ نەمر چاندی و ب خوین و روندکێن شەھید و خەباتکارێن کورێن ڤی وەلاتی ھاتیە ئاڤدان. لەوڕا پێدڤی یە ئەڤرۆ ئەم ھەمی و لسەر ھەمی ئاست و بەرپرسیارییان شایستەی وان ھزرێن گەش و رێبازا پیرۆز و زەلالا بارزانیێ نەمر بین دویر ژ زێدەروویی و گەندەلی و ئەم پڕ باوەرین کو ھەوادارێن ڤێ رێبازا راستەقینە دێ ھەر دسەرکەفتی بن و ژ ھەر گەف و مەترسیەکێ پارێزن داکو ھەرێمەکا دیموکرات و ئازاد و دادپەروەر بێتە بونیاتنان، ژبۆی کو ئەم ھەمو پێکڤە دباوەرەکا موکوم و مەزن دا بیت کو بارزانی پێدڤیا ئەڤرۆ و سوبەھی یە ژی.

وەرگێران ژ عەرەبی: شةمال ئاكرةیی