دڤێ گەلێ كورد ب گشت ب ئاوایەكی دلسۆزانە دەستێن خوە بدن هەڤ و ئارامیا كوردستانێ بپارێزن
ئیرفان شەمزینی
دژمنێن گەلێ كورد و كوردستانێ رۆژا 29 ئیلۆنا 2013، ب پیلانەكە قرێژ و ب تەرۆریستێن كرێ گرتی ڤە ل پایتەختا هەرێما كوردستانێ ئێرشێن هۆڤانە و نەمرۆڤانە برن ل سەر گەلێ مە. ئەڤ ئێرشێن نەمرۆڤانە یێن تەرۆریستی ل دژی سەركەفتن، دەمۆكراسی، ئازادی و پێكڤە ژژانا گەلێ كوردستانێ بوو. پشتی رژێما بەعس، گەلێ كوردستانێ د رۆژهلاتا ناڤین دە بنگەهەكە براتیێ ئاڤا كریە و ئەو دەمۆكراسیا كو رێڤەبەریا هەرێما كوردستانێ ژ بۆ گەلێ كوردستانێ كریە دیاری، وەك دەرزیەك چاڤێ نەیارێن گەلێ كورد و كوردستانێ رە چەقیا یە. ئەڤ نەحەزێن گەلێ كورد، هەردەم سیاسەتەكی قرێژ ل هەمبەر گەلێ كورد بكار ئانینە، لێ نكارینە ئیرادەیە گەلێ كورد بشكینن. دەما كو ب وی ئاوایی نكارینە ئیرادەیا گەلێ كورد بشكینن، وسا هزر دكرن كو، دێ ئیرادەیا گەلێ كورد ب رێیا موسولمانەتی بشكینن و هەولدانە ناڤێ ئیسلاما پیرۆز بكن ئەمرازێ سیاسەت و پیلانێن خوە یێن قرێژ و تاری. دەما كو ئەو پیلانێن وان ژی ل هەمبەر گەلێ كورد بسەر نەگرتیە، دەست ئاڤێتن ئێرشێن تیرۆریستی یێن هۆڤانە. هەمو جیهان دبینە كو، ئارامی و ئەولەهیا كوردستانێ نموونەیەكە ل رۆژهالتا ناڤین. ژبەر ڤێ یەكێیە ئەڤ ئێرشێن هۆڤانە یێن ل هەمبەر هێزێن ئاسایشا هەرێما كوردستانێ، ل دژی ئارامی و ئازادیا تەڤاڤی گەلێ كورد و كوردستانێ بوو.
ئەو هێزێن تاری، كو دخوازن ب ئێرشێن هۆڤانە سەبرا گەلێ كورد بجەربینن، ڤێ یەكێ ژبیر دكن كو، گەلێ كورد، ل هەمبەر كیمیابارانا هەلەبجە، ئەنفال، ئیشكەنجە و ب كۆمكوژیێن هۆڤانە، سەرێ خوە ژ بۆ نامەردان نەچەماندیە و ئیرۆ پێڤە ژی ناچەمینە. ئەو نەیار و كریارێن كرێگرتیێن وان یێن هۆڤانە و نەمرۆڤانە، نكارن رێیا پێشیا ئازادی و پێشكەتنا گەلێ مە بگرن. ژ بەر كو، ئالایا كوردستانێ، ب خوینا هەزاران شەهیدان ڤە هاتیە دالقاندن و هەر وسا دەمۆكراسیا كوردستانێ كو د رۆژهلاتا ناڤین دە وەك نوومینە تێ دیتن، ب سایا رێڤەبەریا حكوومەتا هەرێما كوردستان و ب پشتگریا هێزا ئاسایشا هەرێما كوردستانێ ڤە ئاڤا بوویە. حكوومەتا مە یا كوردستانێ، هێڤی، روومەت و سەربلندیا مە هەمو كوردێن جیهانێیە و دڤێ ئەم گەلێ كورد ب گشت،، ب هەستەكە كوردەیاتی پشتگریا حكوومەت و هێزێن ئاسایشا هەرێما كوردستانێ بكن، دا كو زارۆیێن مە، د پێشەرۆژێ دە د ژیانەكە دەمۆكراتیك و ئازاد دە بژین. دڤێ گەلێ كورد ب گشت، ب ئاوایەكە دلسۆزانە دەستێن خوە بدن هەڤ و ئارامیا كوردستانێ بپارێزن.
