دویڤەلانكێن ئیخوانا، چبكا كوردایەتیێ ل دەف نەمایە !
د.عەلی حسێن بلانی
وێنێن مورسی دانان لسەر بروڤایلێن خۆ ل فەیسبووكی، مە گوت چنینە، هەر چركەكێ پوستەك لسەر گورەپانا (رابعە العدویە) ئینا خار، مە گوت ئەوژی قەبیلە، برایێن مە ل كوردستانا رۆژئاڤا دهاتنە كوشتن و وان هەر دهوول بۆ ئخوانێت مسرێ لێدا، مە گوت ئازادیە و هەر ئێك یێ ئازادە د هەستێ خودایێ دلسوز بیت بۆ مللەتێ خو یان بۆ مللەتەكێ بیانی، لێ دەما رابن بخوپیشاندانا ل هەولێرا بایتەخت بو پشتگیری كرنا مورسی د وی دەمیدا یێ كو پتر ژ 15 هزار برایێن مە یێن كوردێن روژئاڤا ئاوارەدبن بەرەڤ كوردستانێ و ماڵ و حالێن خۆ هێلایین و حكوومەت ب هەمی شیانێن خو هەول ددەت كەمپا د ماوێ 24 دەمژمێران دا بو وان دابین بكەت، ئەڤە ل هەمی هێلین سوور دەرباز دبیت و چ وژدان قەبیل ناكەن و عەیبە ئەڤرو پێڤە بێژینە وان جورە كەسان، كورد.
هەر چەندە ئەو مروڤێن بێ خێر و بكێرنەهاتی نە چ ل كوردان كێم دكەن و نە چ ل كوردستانێ زێدە دكەن و ئەگەر حەز بكەن بلا بێژن ئەم مسرینە نە كوردین، لێ بلا باش بزانن ئەڤ پێنگاڤە گەلەك یا ژ وان زێدەبوو و گران دێ لسەر وان راستیت، ئەوان راستیا خۆ بۆ تەڤا خەلكێ كوردستانێ دیاركر كانێ ئەو چ تاكە كەسن و چ ئایدلوجیا وان هەیە و چەوان دەست وپێ وهزر و وژدانێن وان هەمی ب ئخوانێت مسرێ ڤە دگرێداینە.
دەما كەسەك دهێتە كوشتن، مروڤ غەمبرادبیت و دبیتە جهێ دل گرانیێ. ئەز ل وێ باوەرێ مە كو هەمی خەلكێ كوردستانێ و ئێك ژ وان ئەز، بۆ ئەو كەسێن ل مسرێ دهێنە كوشتن دعاجزین، لێ هزر و بیر و خەم و روندكێن مە یێن مەزن و دلێ ئێشای یێ دەڤ كوردێن روژئاڤا، یێن كو دهێتە كوشتن و ڤەكوشتن وسوتن و ئاوەرەكرن و هەر روژێ حەلبچەكا نووی ل ناف وان دهێتە رویدان و فەرمانەكا نووی ل كوردان رادبیت، نە ل سەرا حوكمەكی ل دەستێن وان چبیت و نە ژ بەر كومبوونا وان ل گورەپانا دژی لەشكەری، بتنێ ژ بەر هندێ كو كوردن.
ل ڤێرە بۆ وان خوپیشاندەرێن بكێرنەهاتی دبێژم ئایە كارەساتا كێ مەسترە؟ كارەساتا دەهان و سەدان هزار كوردێن روژئاڤا یان كارەساتا ژ دەستدانا كورسیكا مورسی؟ ئێدی خۆ دەم نەما هین ل خۆ ب زڤرن، زاروكێن وە ل پاشەروژێ بەری خەلكەكێ دی، دێ نڤرینا ل وە كەن !
