بۆیە پێت دەڵێم سەرۆك
مەحفوز مایی
دناڤ دیرۆكا بزاڤا رزگارییا ھەمی گەل و نەتەوەیێن جیھانێ یێت بندەستدا، ھەردەم كەسەك، رێبەرەك، رێشاندەرەك ھەبووە كو بكەیتە پێش كاروانێ خەبات و بەرخوەدانێ، حەتا ئەو كاروان دگەھیتە ھندەك قوناغێت دیار و ئێدی ئەو كەس مینا سەمبۆلەكی دكەڤنە ناڤ ھزر و مەژیێ وی خەلكیدا، كو ئێدی گەلەك زەحمەتە ھێزەك بشێت وێ سەمبولێ ژ مەژی و ھزرا وان بشووت. نە ھەر دناڤ خەلك و گەلێ خوەدا، بگرە دناڤ ھەمی جیھانێدا ئەو دبنە جھێ رێز و تەقدیرێ و دیروك ناڤێ وان ب پیتێن زێری دنەخشینیت.
ھەلبەت نموونە بۆ ڤێ چەندێ گەلەكن، نەخاسمە د سەدسالا بووریدا ناڤێ ھندەكا ژوان مینا ستێرێن گەش ل ئاسمانێ جیھانێ بریقەدار بوون. مە نەڤێت ئەم ل ڤێرێ ناڤێت وان رێز بكەین چونكی بابەتێ مە نە ل سەر وان كەسانە.
لێ د دیرۆكا بزاڤا رزگاریخوازا گەلێ كورد دا ژی مە ژی مینا وان گەلێن ئازادیخواز چەندین قەھرەمان، رێبەر و سەروەر ھەنە كو گەلێ كورد شانازیێ ب ھەبوونا وان و ناڤێ وان دكەت.
مستەفایێ بارزانی، ئەو رێبەر و قەھرەمان بوو كو ژیێ خوە ھەمی درێكا خەباتا ژ بۆ ئازادییا گەل و وەلاتێ خوە دەرباسكر. ھەر ژ سەرھلدانێت بارزان د دەستپێكا سالێن چلان دا و حەتا رۆژا وەغەركنا دیماھیێ ل 1-3-1979ێ دا، كو ئەو دیروك ژی ب نەخێن زێرین یا ھاتیە نڤیساندن و گەلێ كورد نفش بۆ نفشی دێ شانازیێ پێكەت.
دەرس و رامانێن كو ژ خەبات و بەرخوەدانا بارزانیێ نەمر ھاتنە وەرگرتن بوونە مینا خاندنگەھەكێ و سال بۆ سالێ و دەستە دەستە شاگرد ژ ڤێ خاندنگەھا كوردینیێ دەردكەڤن. ئەڤرۆكە دناڤ فەلسەفەی كوردایەتیێ دا شووپ و پەیرەوا وێ كوردینیێ ب ناڤێ رێبازا بارزانی یا بەردەوامە و سەرۆك مەسعود بارزانی سەركێشێ وێ شووپ رێبازێ یە كو ئەڤرۆكە گەلێ كورد ل پارچا باشوورێ وەلاتی گەھاندییە قوناغێن سەربەستی و ئازادییا نێزیك ل سەرخوەبوونێ.
ھەر ژ سەردەما پیلانا ناڤنەتەوی یا ل دژی وۆرەووا گەلێ كورد ل سالا 1976ێ ل جەزائیرێ ھاتە موركرن و شورەشا گەلێ كورد توشی وێ شكەستنێ بوو. ھەر ھینگێ و ب فەرمانا بارزانیێ نەمر سەرۆك مەسعود بارزانی ئالایێ خەباتا رێبازا بارزانی دا دەستێ خوە و رۆژ بۆ رۆژێ كاروانێ خەباتێ دیسا ب گوڕ تێھن بوو، سال بۆ سالێ رێبەرییا سەرۆك مەسعود بارزانی ب بەردەوامییا رێبازا بارزانی و زیرەكی ھشیارییا خوە و خەبات و بەرخوەدانا گەلێ كورد و پێشمەرگێن قەھرەمان، شیا ژ گەلەك ئاستەنگێت مەزن دەرباس بیت و بزاڤا رزگاری بگەھینیتە قوناغێت سەربەستی و ئازادییێ.
دڤان چەند سالێت سەرۆكاتییا سەرۆك مەسعود بارزانی ل ھەرێما كوردستانێ، پێنگاڤێت گەلەك مەزن و گرنگ دوارێ دبلوماسییێ دا ھاڤێتن كو پێگەیەك گرنگ بۆ ھەرێما كوردستانێ دناڤ قادا ناڤنەتەوی دا دروستكر. ئێدی چاڤێ گەلك وەلات كوپیاێت جیھانی بەرێ وان كەفتە كوردستانێ و رۆژ بۆ رۆژێ قونسولگەریێ وەلاتێن جیھانێ مالا خوە دانا ھەولێرێ. و ئێدی كەساتییا سەرۆك مەسعود بارزانی بۆ كەساتییەك گرنگ دناڤ ھەرێمێ و جیھانێ دا.
ئەو ھەمی كار و ھەلویستێن وی ل بەغدا و ل سەر پرسگرێكێن كوردستانێ ئەنجامداین وەكر كو مافێ كوردان بێتە پاراستن. ھەرچەندە مخابن گەلەك لایەنێن كوردی نەك ھاریكار نەبوون، بگەرە ل دژی وی رادوەستان ژی لێ وی دەست ژ دۆزا گەلێ خوە بەرنەدا.
ھەردەم سەرۆك مەسعود بارزانی خەمخورێ ئێكرێزییا ناڤمالا كوردان بوو. دسەر ھەمی جوداھی و دژاتیكرنێ دا ژی، وی ھەردەم رێز بۆ ھەمی ھێز و لایەنێن كوردستانێ دانینە و ل سەر پرسێن نیشتمانی نەتەوی شارا دگەل وان كریە. ھەر ئەو بوو ژ بۆ ئێكرێزی و براتییا كوردان كوردكوژی یا بدەستێ كوردان حەرام كر.
22-7-2013 پێنگاڤەكا ھەری مەزن و گرنگ د دیروكا نەتەوەیا كورد دا ھاڤێت. ھەر ژ قەندیل و حەتا ھەمی پارچێن كوردستانێ وێ بانگی ھەمی ھێز و لایەنێت سیاسی یێت كوردستانا مەزن كرن و ئەو ل سەلاحەدین، ل بارەگایێ خوە ئینانە جەم ھەڤ. ئەڤە ئەو پێنگاڤ بوو كو ب سالانە گەلێ كورد چاڤەرێیە. ئەڤرۆكە ل سەر گازیا وی تەمامی ھێز و لایەنێن كوردستانا مەزن پێنگاڤا مەزن ژ بۆ كونگرەكا نەتەوەیی ھاڤێت
ئەڤرۆكە بەرێ بنیاتی یێ دانانا وێ كونگرەیا نەتەوی بدەستێ مەسعود بارزانی و لبن چاڤدێرییا وی ھاتە دانان.
ئھا ژبەر ڤان كارێن دخزمەتا نەتەوەیا كورد دا ئەز دبێژمە تە سەرۆك.
