رۆژا پارێزگه‌هبوونا دهۆكێ وچه‌ند په‌یڤه‌ك
ره‌شید فندى
رۆژا 27ی گولانێ ژ هه‌ر سال بیرهاتنا پارێزگه‌هبوونا دهۆكێ یه، ده‌مێ به‌ری 44 ساڵا، ئانه‌كۆ ل 27ی گولانا ساڵا 1969ێ، بڕیاره‌ك ژ حكوومه‌تا ئیراقێ یا وی سه‌رده‌می ده‌ركه‌فتی، دا قه‌زایا دهۆكێ یا سه‌ر ب پارێزگه‌ها مویسل ڤه ببیته پارێزگه‌ه و قه‌زایێت دی یێت كوردی بێنه سه‌ر ب پارێزگه‌ها دهۆكێ ڤه، ئه‌و قه‌زا ژی ئامێدیێ و زاخۆ و ئاكرێ بوون، لێ ئاكرێ بساناهی نه‌هاته سه‌ر ب دهۆكێ ڤه هه‌تا ده‌مێ سه‌رهلدانێ.
بابه‌تێ پارێزگه‌هبوونا دهۆكێ دیرۆكا خۆ هه‌یه، هه‌ر ژ سه‌رده‌مێ دانانا ده‌وله‌تا نوی یا ئیراقێ، بزاڤا رزگاریخوازا كوردی، داخوازا پارێزگه‌هبوونا دهۆكێ یا كری، هه‌ر ژ سالێت بیستا و سیها وچلا ژ چه‌رخێ بووری، لێ داخوازا موكوم لسه‌ر ده‌مێ رێككه‌فتنا 29 ی خزیرانا ساڵا 1966ێ هاته كرن، ده‌مێ حكوومه‌تا ئیراقێ یا وی ده‌می بسه‌رۆكاتیا عبدالرحمن به‌ززاز كو عبدالرحمن عارف سه‌رۆكاتیا كۆمارا ئیراقێ دكر، گه‌هشتینه رێككه‌فتنه‌كێ دگه‌ل سه‌ركردایه‌تیا شۆڕه‌شا ئه‌یلوولێ وجه‌نابێ مه‌لا مسته‌فا بارزانی،وچه‌ندین خالێت باش وه‌ك ماف بۆملله‌تێ كورد لپه‌ی سه‌روبه‌رێ هنگی د وێ رێككه‌فتنێدا هه‌بوون، سێ خالێت نهێنی ژی هه‌بوون لسه‌ر ده‌مێ خۆ نه‌هاتنه ئاشكه‌را كرن، ئێك ژ وان خاڵان پارێزگه‌هكرنا دهۆكێ بوو.
پشتی كه‌فتنا حكوومه‌تا عبدالرحمن به‌ززاز وهه‌ر وه‌سا كۆده‌تایا به‌عسیان دژی حوكمێ عبدالرحمن عارف ل ساڵا 1968ێ، وێ حكوومه‌تێ ڤیا هنده‌ك تشتان بۆ كوردا بكه‌ت، و چه‌ند به‌نده‌كا ژ رێككه‌فتنا 29 ی خزیرانێ بجهبینیت وه‌كی دانانا زانینگه‌ها سلێمانیێ وپارێزگه‌هكرنا دهۆكێ.
له‌وما حكوومه‌تا ئیراقێ بڕیاره‌ك ل رۆژا 27ی مه‌ها گولانا ساڵا 1969 ێ ده‌رئێخست كو دهۆكێ ببیته پارێزگه‌ه وهه‌ردوو قه‌زایێت زاخۆ وئامێدیێ بێنه دگه‌ل.
رۆژا 1 – 11 – 1969 ێ رۆژا ده‌ست بكاربوونا ئێكه‌مین پارێزگار بوو بۆ دهۆكێ، ئه‌و ژی عه‌گید سددیق ئامێدی بوو، كو وی ده‌می هێشتا به‌یانا ئادارا ساڵا 1970ێ ده‌رنه‌كه‌فتبوو، ئه‌و پارێزگار سه‌ر ب حزبه‌كا كوردی ڤه بوو كۆ وی ده‌می دگه‌ل حكوومه‌تا ئیراقێ بوون.
خه‌لكێ دهۆكێ ئاهه‌نگه‌كا مه‌زن ل وێ رۆژێ گیڕا ژ به‌ر پارێزگه‌هبوونا باژێڕێ وان وجه‌ماوه‌ر ل وێ مه‌یدانا به‌ر سنگێ قه‌یمقامیا دهۆكێ خڕڤه‌بوو، هه‌ر ئه‌و مه‌یدانه یا نوكه لبه‌ر سنگێ مه‌ركه‌زێ كه‌ڤن یێ دهۆكێ، ئانه‌كۆ رێڤه‌به‌ریا پۆلیسا، وپارێزگه‌رێ نوی ئاماده بوو وچوو جهێ خۆ.
حه‌فتیا بهێت ب ئانه‌هیا خودێ دێ هنده زانیاریێت دی ژی ل دۆر پارێزگه‌هبوونێ به‌ڵاڤ كه‌ین.
