پشتیوانی لقی پێنجی بەغدا بۆ دەستپێشخەری و پڕۆژە ئامانجدارەکانی ئافرەتان دووپات کرایەوە

بەغدا-KDP.info- ئازاد حەمید شەفی، بەرپرسی لقی پێنجی پارتی دیموکراتی کوردستان لە بەغدا، بە ئامادەبوونی عەبدولکەریم عەگید و هەدیل سەلاح، ئەندامانی دەستەی کارگێڕی، و ئەزهار مەجید، بەرپرسی یەکێتیی ئافرەتانی کوردستان، لەسەر بانگهێشتی بەشی ڕێکخراوە جەماوەری و پیشەیییەکانی یەکێتی ئافرەتانی کوردستان، پێشوازی لە ژمارەیەک لە ئافرەتانی چالاکوان و پیشەیی کرد.

ئەم دیدارە لە چوارچێوەی بەهێزکردنی پەیوەندییەکان لەگەڵ تواناکانی ئافرەتان و ئاڵوگۆڕکردنی بیروڕا و پێشنیازەکان بوو سەبارەت بە ڕۆڵی ئافرەتان لە کۆمەڵگەدا و بەشدارییان لە بواری جیاوازی پیشەیی، ڕووناکبیری و کۆمەڵایەتی.

لە کۆبوونەوەکەدا جەخت لەسەر گرنگیی پشتیوانیکردنی تواناکانی ئافرەتان و سوودوەرگرتن لە ئەزموون و لێهاتووییەکانیان کرایەوە بە مەبەستی چالاککردنی ڕۆڵیان لە ناو کۆمەڵگەدا. هەروەها پشتیوانی لقی پێنج بۆ دەستپێشخەری و پڕۆژە ئامانجدارەکانی ئافرەتان دووپات کرایەوە، بەتایبەت ئەو پڕۆژانەی دەبنە هۆی تواناسازیی ئافرەتان لە ڕووی پیشەیی و ئابوورییەوە و دەرفەتی نوێی داهێنان و کارکردنیان بۆ دەڕەخسێنن.

ئەم چالاکییە لە چوارچێوەی بایەخدانی بەردەوامی لقی پێنجی پارتی دیموکراتی کوردستان دێت بۆ پەیوەندیکردن لەگەڵ ئافرەتانی چالاکوان، گوێگرتن لە داواکاری و بیرۆکەکانیان، و ڕەخساندنی دەرفەتی زیاتر بۆ بەشداریی کارایان لە گشت بوارەکاندا.