زانکۆی سەلاحەدین بۆ KDP.info: بەیانی ١٨ـی ١٠ـی ٢٠٢٦ کۆتا دەرفەتە
هەولێر-KDP.info- زانکۆی سەلاحەدین لە ڕێگەی بەڕێوەبەری ڕاگەیاندنەکەیەوە، سەرنجی قوتابیانی تازە وەرگیراو بۆ ساڵی خوێندنی (٢٠٢٦-٢٠٢٧) بۆ مەترسیی دواکەوتنیان لە پرۆسەی خۆتۆمارکردن ڕادەکێشێت و جەخت لەوە دەکاتەوە کە بەیانی (١٨ـی ١٠ـی ٢٠٢٦) کۆتا دەرفەتە.
لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان، دکتۆر سامان عەبدوڵلا، بەڕێوەبەری ڕاگەیاندنی زانکۆی سەلاحەدین، ڕایگەیاند، "بەپێی ڕێنماییەکانی ناوەندی وەرگرتن و بە دیاریکراوی بڕگەی (١٨)، خاڵی (١)، هەر قوتابیەک ماوەی (١٠) ڕۆژ بەسەر بڵاوبوونەوەی ناوەکەیدا تێپەڕێت و پەیوەندی بەو کۆلێژ یان بەشەوە نەکات کە تێیدا وەرگیراوە، ڕاستەوخۆ مامەڵەی هەڵوەشانەوەی وەرگرتنی بۆ دەکرێت.
ناوبراو ئەوەشی خستەڕوو کە بەیانی، ڕێکەوتی ١٨ـی ١٠ـی ٢٠٢٦، دوایین وادەی فەرمییە بۆ خۆتۆمارکردن و دوای تێپەڕبوونی ئەم ڕێکەوتە، هیچ قوتابیەک مافی نامێنێت و ناتوانێت مامەڵەی خۆتۆمارکردن ئەنجام بدات، بۆیە داوا لە سەرجەم قوتابییە بەڕێزەکان دەکات بێ دواکەوتن سەردانی کۆلێژەکانیان بکەن.
بڵند ئیبراهیم