شاخەوان عەبدوڵڵا: پەیامی ھاوخەمی سەرۆک بارزانی مان گەیاندە نەجەف
نەجەف-KDP.info- بۆ گەیاندنی پەیامی هاوخەمی سەرۆک مەسعود بارزانی بۆ کۆچی دوایی مەرجەعی ئاینی، ئایەتوڵڵای عوزما شێخ محەمەد ئیسحاق فەییاز، دکتۆر شاخەوان عبدالله، ئەندامی کۆمیتەی ناوەندیی پارتی دیموکراتی کوردستان و سەرۆکی فراکسیۆنی پارتی لە ئەنجومەنی نوێنەرانی عێراق، بە نوێنەرایەتی سەرۆک بارزانی، سەرۆکایەتی شاندێکی حزبی و پەرلەمانیی کرد بۆ شاری نەجەف.
دکتۆر شاخەوان عەبدوڵڵا رایگەیاند کە پەیامی قووڵی هاوخەمی و ڕێزی جەنابی سەرۆک بارزانییان گەیاندە خانەوادەی بەڕێزی کۆچکردوو و مەرجەعە ئاینییەکان لە شاری نەجەف و، لە پەیامەکەدا جەخت لەسەر ڕۆڵی مێژوویی و حەکیمانەی ئەو زاتە گەورەیە کرایەوە لە پاراستنی پایەکانی لێبوردەیی و ئاشتی کۆمەڵایەتی لە عێراقدا.
مەرجەعیەتی باڵا و بنەماڵەی کۆچکردوو، وێڕای دەربڕینی پێزانینی قووڵی خۆیان بۆ ئەم هاوخەمی و بەدەنگەوەهاتنەی جەنابی سەرۆک بارزانی، تیشکیان خستە سەر پێگەی مێژوویی و نیشتمانی بەڕێزیان لە بەهێزکردنی پردەكانی پەیوەندی و برایەتی نێوان سەرجەم پێکهاتەکاندا.
