سەرۆکی هەرێم و سەرۆکوەزیرانی هۆڵەندا لە میونشن پەرەپێدانی پەیوەندییەکانیان تاوتوێ کرد

میونشن-KDP.info- به‌یانیى ئەمڕۆ شەممە 2026/2/14، لە چوارچێوەی كارنامه‌كه‌یدا له‌ کۆنفرانسی ئاسایشی میونشن، بەڕێز نێچیرڤان بارزانی، سەرۆکی هەرێمی کوردستان، لەگەڵ بەڕێزان دیک شۆف، سەرۆکوەزیران و ڕووبن برێکەلمانس، وەزیری بەرگریی هۆڵەندا کۆبووەوە.

لە كۆبوونه‌وه‌كه‌دا پەرەپێدانی پەیوەندییەکانی هۆڵەندا لەگەڵ عێراق و هەرێمی کوردستان و بەردەوامیی هاوکارییەکانی ئەو وڵاتە لە بوارە جیاكاندا تاوتوێ کران. سەرۆک نێچیرڤان بارزانی سوپاسی هۆڵەندای کرد بۆ پشتگیرییە بەردەوامەکانی بۆ هەرێمی کوردستان.

لای خۆیانەوە، شاندی هۆڵەندی دووپاتیان کردەوە کە وڵاتەکەیان بە بایەخەوە لە پەیوەندییەکانی لەگەڵ هەرێمی کوردستان دەڕوانێت و بەردەوام دەبێت لە پشتگیریکردنی ئارامی و گەشەپێدان لە ناوچەکەدا.