سەرۆکی حکوومەت لەگەڵ وەزیری وەبەرهێنان و بازرگانی میسر کۆبووەوە
داڤۆس-KDP.info- ئەمڕۆ سێشەممە ٢٠ـی کانوونی دووەمی ٢٠٢٦، مەسروور بارزانی، سەرۆکی حکوومەتی ھەرێمی کوردستان لە داڤۆس، لەگەڵ حەسەن ئەلخەتیب وەزیری وەبەرھێنان و بازرگانیی دەرەکیی کۆماری میسر کۆبووەوە.
لە دیدارەکەدا جەخت لە گرنگیی برەودان بە پەیوەندییەکانی ھەرێمی کوردستان و میسر کرایەوە و باس لە سەردانی ئەم دواییەی سەرۆکی حکوومەت بۆ قاھیرە و گفتوگۆکانی لەگەڵ سەرۆک کۆماری میسر عەبدولفەتتاح سیسی کرا.
ھەردوولا ھاوڕابوون لەسەر بەھێزکردنی پەیوەندیی دوولایەنە لە بواری وەبەرھێنان و ئاڵوگۆڕی بازرگانی. لەمبارەیەوە سەرۆکی حکوومەت ئاماژەی بە واژۆکردنی گرێبەستێک دا کە لەم دواییانە، حکوومەتی ھەرێمی کوردستان، لە چوارچێوەی پڕۆژەی ڕووناکی، لەگەڵ کۆمپانیای ئیسکرامیکۆی میسری کردوویەتی بۆ دابینکردنی پێوەری زیرەکی کارەبا.
