موسا ئەحمەد: ئۆفیسەکانمان خستنە حاڵەتی ئامادەباشییەوە
ھەولێر-KDP.info- سەرۆکی دەزگای خێرخوازیی بارزانی ڕایگەیاند، تیمەکانمان لە بەرەبەیانەوە گەیشتوونەتە ناو چەمچەماڵ و دەستیان بە کار کردووە.
ئەمڕۆ چوارشەممە (10ـی کانوونی یەکەمی 2025)، موسا ئەحمەد، سەرۆکی دەزگای خێرخوازیی بارزانی لە کۆنگرەیەکی ڕۆژنامەوانیدا ڕایگەیاند، "دوای ئەوەی لەلایەن کەشناسییەوە زانیاری و هۆشداریمان پێگەیشت سەبارەت بە پێشبینییەکانی کەشوهەوا و ڕوودانی دۆخی نەخوازراو، دەستبەجێ ئۆفیسەکانمان لە گەرمیان، سلێمانی، چەمچەماڵ و ناوچەکانی دیکە خستە حاڵەتی ئامادەباشییەوە."
سەرۆکی دەزگای خێرخوازیی بارزانی ئاماژەی بەوەش کرد، "تیمەکانمان لە بەرەبەیانەوە گەیشتوونەتە ناو چەمچەماڵ و دەستیان بە کار کردووە، هاوکات لە کەلار و سلێمانیش تیمەکانمان لە ئەرکدان."
سەبارەت بە زیانەکان، موسا ئەحمەد ڕوونی کردەوە، زیانەکان زیاتر لە چەمچەماڵ (ناحیەی تەکیە)، کەلار (ناحیەی ڕزگاری) و کەرکووک (گەڕەکی لەیلان) بوون. ڕاشیگەیاند، "سەرجەم ئامادەکاری و کارەکانمان بە هەماهەنگی لەگەڵ دامودەزگا ئیدارییەکانی حکوومەت ئەنجام داوە، ئەوەش دوای ڕاسپاردەی جەنابی سەرۆک بارزانی دێت بۆ بەهاناوەچوونی هاووڵاتییان."
گوتیشی، "بە ئەرکی خۆمانی دەزانین تیمەکانمان لە ئامادەباشیدا بن و هەوڵ دەدەین بە هەماهەنگی لەگەڵ ڕێکخراوە نێودەوڵەتی و ناوخۆییەکان و سەرمایەدارانی کوردستان -کە هەمیشە پشتیوانمان بوون- بەشێک لە خەم و بارگرانیی هاووڵاتییان کەم بکەینەوە."
