نێچیرڤان بارزانى: به‌ڕێز و پێزانینه‌وه له مێژوو و ئه‌رك و خزمه‌تى ده‌نگى كوردستان ده‌ڕوانین
هەولێر-KDP.info- نێچیرڤان بارزانى، به‌بۆنه‌ی تێپه‌ڕبوونی 62 ساڵ به‌سه‌ر دامه‌زراندنی ئێزگه‌ی ده‌نگی كوردستان، پەیامێكی ئاراستەی به‌ڕێوه‌به‌ر و كارمه‌ندانى ده‌نگى كوردستان كرد و گوتی، به‌ڕێز و پێزانینه‌وه له مێژوو و ئه‌رك و خزمه‌تى ده‌نگى كوردستان ده‌ڕوانین.
ئەمەی خوارەوە دەقی پەیامی (نێچیرڤان بارزانی)یە بۆ ساڵیادی دامەزراندنی ئێزگەی دەنگی کوردستان..
به‌ڕێزان به‌ڕێوه‌به‌ر و كارمه‌ندانى ده‌نگى كوردستان
سڵاو و ڕێز..
له یادى (62) ساڵه‌ى دامه‌زراندنى ئیزگه‌ى ده‌نگى كوردستاندا، به گه‌رمى پیرۆزباییتان لێ ده‌كه‌م، هیواى له‌سشاغى، سه‌ركه‌وتن و پێشكه‌وتنى به‌رده‌وامتان بۆ ده‌خوازم.
ده‌نگى كوردستان وه‌ك یه‌كێك له ناوه‌نده گرنگه‌كانى سه‌ره‌تاى كارى میدیایى له كوردستان، هه‌ر له ڕۆژى دامه‌زراندییه‌وه و به درێژاییى شۆڕش، ده‌نگى دلێر و ڕه‌سه‌نى هه‌موو پێكهاته‌كانى كوردستان بووه. له‌گه‌ڵ گیانفیدایى و قوربانیدانى پێشمه‌رگه، ڕووبه‌ڕووى سته‌م بووه‌ته‌وه، هه‌روه‌ها چه‌ندین كادیرى دیار و به‌تواناى ڕاگه‌یاندنى پێگه‌یاندووه.
له سه‌رده‌مى ئازادیشدا، به‌تایبه‌تى له ساڵانى دواى ڕاپه‌ڕینه‌وه، ڕۆڵى دیارى خۆى له كارى میدیایى و ڕۆژنامه‌وانیدا گێڕاوه و هه‌میشه ئاماده‌یى هه‌بووه، بۆیه جێى شانازییه بۆ ده‌نگى كوردستان كه به‌شێكه له بیره‌وه‌ریى گشتیى گه‌لى كوردستان و تا ئه‌مڕۆ له خزمه‌ت به‌رده‌وامه.
به‌ڕێز و پێزانینه‌وه له مێژوو و ئه‌رك و خزمه‌تى ده‌نگى كوردستان ده‌ڕوانین و هه‌ر سه‌رفراز و سه‌ركه‌وتوو بێت.
نێچیرڤان بارزانى
2025/9/28
