پارتی بۆ مە مان و نەمانە باوەرییا مە ب تنێ ب پارتی دهێت
دهۆک-KDP. info- تیشێرتەکێ زەر ل بەرخۆ کرییە و هێمایێ پارتی ل سەر سینگێ وییە، و ب کەیفەکا مەزن دەستێ باپیرێ خۆ گرتیە و بەرەف پارکا بارزانی دچن... مام حەسەن، زەلامەکێ دهۆکی یێ ٥٦ ساڵە، بۆ مالپەرێ فەرمی یێ پارتی دیموکراتی کوردستان دبێژیت: ئەڤ پارکە جهێ من یێ هەرویە، رۆژانە ئەز و نەڤیێ خۆ سەرەدانا ڤێرێ دکەین، لێ ئەڤرۆ رۆژەکا تایبەتە، ژبەر ڤێ چەندێ ژی نەڤیێ من بلوزێ پارتی ل بەر خۆ کرییە، بهنا من ل ڤێ پارکێ فرەه دبیت دەمێ پەیکەرێ بارزانی دبینم، دزانم کوردستان هێشتا ب خێرە و دهۆک ئاڤایە.
ل پارێزگەها دهۆکێ و دەڤەرا بەهدینان حەژێکرن و پەیوەندییەکا موکوم و مێژوویی ژبۆ پارتی دیموکراتی کوردستان دهێتە دیتن، نە ب تنێ دڤێ یادێ دا بەلکو ل هەر کەیف خۆشییەکێ ئالایێن زەر دهێنە بلندکرن، و ژڤێ چەندێ دیار دبیت کو پارتی دهەمی یاد و سەرکەفتنێن تایبەت و گشتی دا ئامادەیە.
ل هەمان پارکا بارزانی خێزانەک ل وێرێ چایەک ڤەدخوار و ژنەکا دانعەمر ژی پەیامنێرا ک.د.پ مێهڤان کر، ل دەما مایکا مە کەفتە بەرسینگێ وێ ئافرەتێ ئێکسەر گوت، “بژیت کورد، بژیت بارزانی“ و گوتنا خۆ ب ڤی شێوەی تمام کر، ”پارتی بۆ مە مان و نەمانە، باوەرییا مە ب تنێ ب پارتی دهێت، و ئەم ب هەبوونا پارتی ب خودانین، پیروزبیت ئەڤ یادە ل مە هەمییان.
ئەڤرۆ ٧٩مین ساڵیادا دامەزراندنا پارتی دیموکراتی کوردستانە و رۆژا ژدایک بوونا سەروک و مەرجەعێ گەلێ کوردستانێ سەروک مەسعود بارزانی یە، و ل هەرێما کوردستانێ وەکو رۆژەکا نەتەوەیی و نیشتیمانی یا گرنگ دهێتە هژمارتن تێدا دەهان بەیاننامە و پیروزباهیێن فەرمی ل دام و دەزگەهێن حزبی و حکومی دهێنە گێران و ئاراستەکرن، و ل تورێن کومەلایەتی ژی سەدان پوستێن پیروزباهی و ڤیانێ ژبۆ پارتی دیموکراتی کوردستان و سەروک بارزانی بەڵاڤبووینە، دیار دکەن، کو ١٦ی تەباخێ، نە ب تنێ رۆژەک ئاسایە، بەلکو رۆژا دەسپێکرنا خەبات و ئیرادە و ئاڤاکرنا پاشەروژێ یە.
سەجا شێرزاد
