پشتەڤانییا حکومەتا هەرێما کوردستانێ بۆ کەرتێ وەرزشی یانەیێن کوردی گەهاندییە لوتکێ

 سەرکەفت رەشید، شلوڤەکارێ وەرزشی و ماموستایێ زانکویێ کو تایبەت بۆ مالپەرێ فەرمی یێ پارتی دیموکراتی کوردستان ئاخفتی، دبێژیت:

“ل چەند ساڵێن دویماهیێ دا حکومەتا هەرێما کوردستانێ پشتەڤانییەکا پێشچاڤ ل کەرتێ وەرزشێ ب گشتی و وەرزشا تەپا پێی ب تایبەتی کرییە ئەو ژی ب، دابینکرنا داهاتەکێ تایبەت بۆ یانەیێن وەرزشی و باشترکرنا رەوشا گورەپانان ژلایێ مەزنکرن و نویژەنکرنا وان دیسان دابینکرنا هوڵ و ئامادەکاری و پێدڤیاتییان، و پشتەڤانیکرنا بەژداربوونێن دەرەکی و نیڤدەولەتی یا یانەیان و ل دویماهیێ چالاکرنا کار و ئەرگێن رێڤەبەریێن وەرزش و لاوان ل سەر ئاستێ پارێزگەهان، و ئەڤ چەند خالە پێکڤە پێنگاڤەک ئەرێنی نە ژبۆ پێشڤەبرنا وەرزشێ ل هەرێما کوردستانێ ب شێوەیەکێ ئەڤرۆ یانەیێن مە یێن کوردی بەژداری قارەمانیێن ژدەرڤە و نیڤدەولەتی ببن.

 

یا دیارە پشتەڤانییا حکومەتا هەرێما کوردستانێ یانەیێن کوردی نە ب تنێ هێلایە دقوناغێن بەژداربوونێ دا، بەلکو گەهاندییە رێزێن دویماهیێ ژقارەمانییان و ب دەستڤەئینانا ناسناڤان، و ئەڤ چەندە دڤان خالان دا دیاردبیت:

 

١- ب دەسڤەئینانا کوپا کەنداڤی کو دبیتە ئێکەم دەستکەفت ژڤی جوری ل سەر  ئاستێ دەرەکی.

 

٢- سەرکەفتنا یانا دهۆک ب کوپا عیراقێ کو دبیتە دەستکەفتەکا مێژویی بەرامبەر ب رابردویێ نێزیک.

 

٣- بەژداربوونا هندەک یاریزانێن هەرێمێ دیانەیێن عیراقی یێن وەرزشی یێن جودادا وەکو یێن تەنس و باسکت بول و ڤولی بول و هونەرێن وەرزشی یێن شەری و هەلبژارتیێ عیراقێ دا.

 

و ب ڤێ چەندێ دووپات دبیت کو هەرێما کوردستانێ ب شێوەیەک جدی و بەرچاڤ ل گورەپانا نیڤدەولەتی یا وەرزشی ئامادە و دیارە.

 

ژساڵا ١٩٧٥ێ و هەتا نوکە ئێکەم جارە ل سەر ئاستێ عیراقێ دوو یانەیێن کوردی ژئێک پارێزگەه بەرامبەر ئێک بگەهنە یاریێن دویماهیێ یێن کوپا عیراقی، و سەرکەفت رەشید دووپات دکەت کو هەبوونا ڤان جورە هەڤرکیێن وەرزشی و مژویلبوون ب ئەنجام و دەمێن یارییان بوویە ژێدەرەک سەرەکی ژبوو دویر کەفتنا خەلکێ ژرەوشا سیاسی و ئابوری یا نەجێگر ل عیراق و هەرێما کوردستانێ، و ئەڤ خۆشییە چەند خالەکان دئینن پێش:

 

١- ئێکگرتنا خەلکێ هەرێما کوردستانێ دویر ژجودابوونا لایەنێن سیاسی و ئاین و ئایدولوجیا و هزر و تەمەنان.

 

٢- گێرانا ئاهەنگ و دیلانێن جەماوەری یێن کەیفخۆشیێ یێن دەگمەن ژبۆ خەلکێ.

 

٣- گورەپانێن یارییان بوونە جهێ بدەستڤەئینانا هیڤی و ئومێد و ناسنامەیا نیشتیمانی.

 

سەرکەفتنێن یانەیا دهۆک یا وەرزشی و یانەیا ئافرەتێن دهۆک و یانەیا سەنحاریب ل ڤێ دویماهیێ، نە ب تنێ ب دەستڤەئینانا ناسناڤان بوو، بەلکو ب دەستڤەئینانا دەگمەنترین چرکەیێن نیشتیمان پەروەری و کەیف خۆشی و سەر بلندیێ بوون، کو ئێکەم جارە جادەیا کوردستانی ب ڤی شێوەی دیتی و هەست پێکری.

 

سەجا شێرزاد-دهۆک