سه‌رۆكى هه‌رێمى كوردستان سوپاسى توركیا ده‌كات
ھەولێر-KDP.info- به‌ڕێز نێچیرڤان بارزانى، سه‌رۆكى هه‌رێمى كوردستان، پێشوازیی لە بەڕێز ئه‌رمان تۆپچو، كونسوڵى گشتیی توركیا له هه‌رێمى كوردستان کرد.
له دیدارێكدا په‌یوه‌ندییه‌كانى توركیا له‌گه‌ڵ عێراق و هه‌رێمى كوردستان، دوایین پێشهاته‌كانى دۆخى ڕۆژهه‌ڵاتى ناوه‌ڕاست و مه‌ترسى و لێكه‌وته‌كانى، هه‌روه‌ها جووڵه‌ى هاتوچۆیان له سنووره‌كانى نێوان هه‌رێمى كوردستان و توركیا دواى داخرانى فڕۆكه‌خانه‌كان له عێراق و هه‌رێمى كوردستان، تاوتوێ كرد.
سه‌رۆك نێچیرڤان بارزانى سوپاسى لایه‌نه په‌یوه‌ندیداره‌كانى توركیاى كرد بۆ ئه‌و ئاسانكارییه‌ى بۆ گه‌ڕانه‌وه‌ى گه‌شتیاران و هاووڵاتییانى هه‌رێمى كوردستان و عێراق له خاڵه سنوورییه‌كان پێشكه‌شى ده‌كه‌ن. هه‌ر له‌مباره‌یه‌وه به‌تایبه‌تى ستایشى ڕۆڵى به‌ڕێز كونسوڵى گشتیى توركیاى له هه‌رێمى كوردستان و تیمه‌كه‌ى كرد.
لاى خۆیه‌وه به‌ڕێز كونسوڵى گشتیى توركیا، ئاماده‌ییى لایه‌نه په‌یوه‌ندیداره‌كانى توركیاى بۆ پێشكه‌شكردنى هه‌موو ئاسانكارییه‌ك بۆ گه‌شتیاران و هاووڵاتییان و سه‌ردانیكه‌رانى هه‌رێمى كوردستان له خاڵه سنوورییه‌كان دووپات كرده‌وه، هه‌روه‌ها ستایشى ده‌زگا و لایه‌نه په‌یوه‌ندیداره‌كانى هه‌رێمى كوردستانى له خاڵه سنوورییه‌كان كرد كه ته‌واوى ئاماده‌كارییان بۆ ئه‌و دۆخه كردووه.
له ته‌وه‌رێكى دیكه‌ى دیداره‌كه‌دا، چه‌ند پرسێكى جێى بایه‌خى هاوبه‌شیان، باس كرد.
