ئالوگورا بازرگانی و دەربازبوونا رێڤینگان ل دەروازێ ئیبراهیم خەلیل بەردەوامە
دھۆک-KDP. info-- ژێدەرەک تایبەت ژدەروازەیا ئیبراهیم خەلیل بۆ kdp: تیمێن مە ٢٤ دەمژمێران کاردکەن ژبۆ دەربازبوونا خەلکێ و نەهێلانا قەرەبالغیێ.
“نە شەر و ئالوزیێن رۆژهەڵاتا ناڤین و نە ژی یێن ئەورۆپا و ئەمریکا، کارتێکرنێ درەوشا ئارام یا هەرێما کوردستانێ دا دکەن، چونکە هەرێما کوردستانێ، بۆنیەکا تەحتی یا بهێز ژبۆ ئارامکرن و ئاڤەدانکرنا دەڤەرێ دروستکرییە هەروەسا کاریزمایا سەروک و کەسێن ئێکێ یێن حکومەتا هەرێما کوردستانێ و پەیوەندیێن وان یێن هەرە باش دگەل جڤاتا نیڤدەولەتی وەکرییە کوردستان دناڤا هەژمارێن وان یێن شەر و شکاندن و وێرانکرنێ دا نەبن"، ئەڤە گوتنا رێناس جانۆ بۆ، دئێک ژهەڤپینێن تایبەت دا دگەل مالپەرێ فەرمی یێ پارتی دیموکراتی کوردستان، کو دنوکە دا، ئەو گوتن بۆ خەلکێ هەرێما کوردستانێ دهێتە سەلماندن، چونکە پشتی شەرێ ئیسرائیل و ئیرانێ یێ دویماهیێ، ئەوێ ژ١٣ی ڤێ مەهێ ٢٠٢٥ێ دەسپێکری و هەتا نوکە بەردەوام، دیاردبیت، کو دەرگەهێ سەرەکی یێ ئارام و بوویە پەناگەهێ هەمی رێڤینگان دەروازەیێ ئیبراهیم خەلیلە ل زاخۆ.
لەتیف ئوسمان، جێگرێ سەروکێ ژورا بازرگانی یا دهۆکێ و سەرپەرشتێ ژورا بازرگانی یا زاخۆ، تایبەت بۆ مالپەرێ فەرمی یێ پارتی دیموکراتی کوردستان سەبارەت ب ئاساییبوونا ئالوگورا بازرگانی و هاتن و چوونا رێڤینگان ددەروازەیێ ئیبراهیم خەلیل یێ نیڤدەولەتی گوت:“هەر ژدەسپێکا شەرێ ئیسرائیل و ئیران هیچ گورانکارییەک ل دەروازێ ئیبراهیم خەلیل نەهاتییە کرن و بەردەوام رێیا بازرگانی و گەشتیاری ڤەکرییە، بەلکو بەروڤاژی، پشتی رێ و گەشتێن ئاسمانی هاتینە گرتن هاتن و چوونا رێڤینگان ل دەروازەی باشتر لێ هاتییە هەروەسا پشتی شەرێ ئیرانێ و نە هاوردەکرنا کەل و پەلێن ئیرانی بازرگان پەنایێ دبەنە هاوردەکرنا کەل و پەلێن تورکی و ب ڤی رەنگی ئامارێن هاوردەکرنا رێڤینگ و کەل و پەلان بلند بووینە چونکە ئیبراهیم خەلیل دبیتە ئارامترین هەلبژادە ژبۆ هەمی وەڵاتێن جیهانێ”
ل دویف ژێدەرێن تایبەت کو بۆ kdp دیارکرین، تیمێن کارگێری و ب رێڤەبرنا دەروازێ سنووری یێ ئیبراهیم خەلیل بەرییا نوکە ب دوو شێفت یان دوو دەمان سپێدێ و ئێڤار کاردکرن، لێ نوکە ژبۆ باشتر ب رێڤەبرنا کاری و نە دروستکرنا قەرەبالغیێ هەردوو تیم یێن هەردوو شێفتان هەروەسا تیمێن هەردوو لایان تورکیا و کوردستان، ب ٢٤ دەمژمێران کار دکەن.
سەجا شێرزاد-دهۆک
